–ءبىرقاتار مينيسترلەر، جۋرناليستەر مەن بلوگەرلەردىڭ  قۇرامىنداعى جۇمىس توبىنىڭ اقمولا وبلىسىنا  ءىسساپارى جالعاسۋدا دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.

2019 جىلعى 29 ناۋرىزدا پرەمەر-مينيستردىڭ ورىنباسارى گ.ن.ءابدىقالىقوۆانىڭ باسشىلىعىمەن ەڭبەك جانە حالىقتى الەۋمەتتىك قورعاۋ ءمينيسترى ب.م. ساپاربايەۆتىڭ، ءبىلىم جانە عىلىم ءمينيسترى ك.ن. ءشامشيدينوۆانىڭ، دەنساۋلىق ساقتاۋ ءمينيسترى ە.ا. ءبىرتانوۆتىڭ، قۇرىلىس جانە ءتۇرعىن-ۇي كوممۋنالدىق شارۋاشىلىعى كوميتەتىنىڭ ءتوراعاسى م.جايىمبەتوۆتىڭ، «Nur Otan» پارتياسىنىڭ حاتشىسى ف.قۋانعانوۆتىڭ، «اتامەكەن» ۇكپ باسقارماسى ءتوراعاسىنىڭ ورىنباسارى  ل.رامازانوۆانىڭ، جۋرناليستەر مەن بلوگەرلەردىڭ  قۇرامىنداعى جۇمىس توبىنىڭ اقمولا وبلىسىنا  ءىسساپارى جالعاسۋدا.

شۋچينسك قالاسىنىڭ جوعارى پەداگوگيكالىق كوللەدجىنىڭ جاستارىمەن كەزدەسۋ بارىسىندا ۆيسە-پرەمەر جاستار جىلىن وتكىزۋ جونىندەگى جول كارتاسى شەڭبەرىندە 5 نەگىزگى باعىت بويىنشا 80-نەن استام ءىس-شارا ىسكە اسىرىلۋىنا اسا نازار اۋداردى. ولار  جاستاردى تۇرعىن ۇيمەن، جۇمىسپەن قامتۋدى، ءبىلىمدى دامىتۋدى، ۆولونتەرلىكتى، عىلىمي گرانتتار بەرۋدى، الەۋمەتتىك بەلسەندىلىكتى كەڭەيتۋدى، جاس وتباسىن، دەنساۋلىقتى جانە الەۋمەتتىك ينكليۋزيۆتىكتى قولداۋدى قامتيدى.

بۇگىنگى كۇنى كوللەدجدە «مەكتەپكە دەيىنگى ءبىلىم»، «مەكتەپكە دەيىنگى تاربيە جانە وقىتۋ»، «دەنە شىنىقتىرۋ جانە سپورت»، «كاسىپتىك وقىتۋ»، «مۋزىكالىق ءبىلىم»،  «نەگىزگى ورتا ءبىلىم» ماماندىقتارى بويىنشا 1 مىڭنان استام ستۋدەنتتەر ءبىلىم الادى. جۇمىسپەن قامتۋ ۇلەسى 97% قۇرايدى. ستۋدەنتتەر مەملەكەتتىك جاستار ساياساتىنا قولداۋدى بىلدىرە وتىرىپ كرەاتيۆتىك ۇسىنىستارى مەن پىكىرلەرىن ءبىلدىردى.

سونداي-اق بۋراباي اۋدانىنىڭ كەنەسارى اۋىلىنىڭ، ءبىرجان اۋدانىنىڭ ماكينكا اۋىلىنىڭ جانە بۋلاندى اۋدانىنىڭ  التىندى اۋىلىنىڭ حالقىمەن كەزدەسۋلەر وتكىزىلدى.

"ءاربىر باعىتتا ولشەمدى كورسەتكىشتەر، تەتىكتەر جانە وسىعان ارنايى بولىنگەن قاراجاتتار بار. ناقتى جانە انىق شارالار قامتىلعان. ولار حالىقتىڭ الەۋمەتتىك ءالجۋاز توبىن قورعاۋدى كۇشەيتۋگە، سونداي-اق ولاردىڭ ءال-اۋقاتىن ارتتىرۋ ءۇشىن بارلىق مۇمكىندىكتەر مەن جاعدايلاردى ۇسىنۋعا مۇمكىندىك بەرەدى. ازاماتتاردىڭ ءال-اۋقاتى ولاردىڭ قولىندا. ەڭبەككە جارامدى ءاربىر ازامات ەڭبەك ەتۋگە مىندەتتى. ال فيزيكالىق نەمەسە باسقا دا سەبەپتەر بويىنشا جۇمىس ىستەۋگە جاعدايى جوق ادامدارعا مەملەكەت الەۋمەتتىك قولداۋ كورسەتەدى" – دەپ اتاپ ءوتتى گۇلشارا ءابدىقالىقوۆا.

وسى اۋىلداردا پرەمەر-مينيستردىڭ ورىنباسارى كوپبالالى جانە از قامتىلعان وتباسىلاردىڭ ۇيلەرىن ارالادى. مەكتەپ جاسىنداعى 4 بالانى تاربيەلەپ-وسىرىپ وتىرعان تىلەك تولەگەننىڭ وتباسىنا ەرەكشە نازار اۋدارىلدى. «ەڭبەك» ناتيجەلى جۇمىسپەن قامتۋ جانە كاسىپكەرلىكتى دامىتۋ باعدارلاماسى شەڭبەرىندە  2 ملن. 200 مىڭ تەڭگە ميكروكرەديت الىپ، ول 10 ءىرى قارا مال ساتىپ العان. اۋىلدىق بيزنەسمەن ءوز وتباسىن قامتاماسىز ەتۋ قانا قويماي، جاڭا جۇمىس ورىندارىن قۇرىپ وتىر.

گۇلشارا ءابدىقالىقوۆا وبلىس باسشىلىعىنا وسىنداي تابىستى ۇلگىنى ودان ءارى جالعاستىرۋدى تاپسىردى.

جۇمىس توبىنىڭ باسقا دا مۇشەلەرى اقمولا وبلىسىنىڭ اۋداندارى مەن اۋىلدارىنا باردى.

ءبىلىم جانە عىلىم ءمينيسترى  ك.ن. ءشامشيدينوۆا ءبىرقاتار ءبىلىم بەرۋ ۇيىمىنا، ونىڭ ىشىندە «ايشا» جانە «بالدىرعان» بالاباقشالارىنا، IT-ليسەيگە، ش. ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنە، كوكشەتاۋ قالاسىنىڭ جوعارعى تەحنيكالىق كوللەدجىنە، چاگلينكا ا. جوعارعى اگروتەحنيكالىق كوللەدجىنە، زەرەندى ا. م. عابدۋللين اتىنداعى مەكتەپ-ينتەرناتقا، اقكول بالالار ۇيىنە باردى.

2018 جىلى مەملەكەت باسشىسىنىڭ تاپسىرماسىمەن اتتەستاتتاۋدىڭ جاڭا جۇيەسى بويىنشا ساناتىن راستاعان جانە جاڭا ءبىلىم بەرۋ مازمۇنى بويىنشا جۇمىس ىستەيتىن مۇعالىمدەردىڭ جالاقىسى 30-50%-عا ارتتىرىلدى. ماۋسىمنان باستاپ مەكتەپكە دەيىنگى مەكەمەلەردىڭ تاربيەشىلەرىنىڭ، تاربيەشىلەردىڭ كومەكشىلەرىنىڭ جالاقىسى سارالانعان تۇردە 30%-عا ارتتىرىلادى. 

اقمولا وبلىسىندا ءۇش اۋىسىمدىق وقىتۋ ماسەلەسىن شەشۋ ءۇشىن 7 وبەكت جانە وقۋ ورىندارىنىڭ جەتىسپەۋشىلىگىن تولىقتىرۋ ءۇشىن 1 وبەكت سالىنۋدا. بيىلعى جىلى 280 ورىنعا شاقتالعان 1 بالاباقشانى پايدالانۋعا بەرۋ، 1075 ورىنعا ەسەپتەلگەن مەكتەپكە دەيىنگى ۇيىمدى اشۋ جانە قازىرگى 120 ورىندى كەڭەيتۋ جوسپارلانىپ وتىر.

رەسپۋبليكالىق بيۋدجەتتەن 8،2 ملرد. تەڭگەگە 7 وبەكت سالىنۋدا. ونىڭ ىشىندە 2 وبەكت 2019 جىلى پايدالانۋعا بەرىلەدى دەپ جوسپارلانۋدا.

دەنساۋلىق ساقتاۋ ءمينيسترى ە.ءبىرتانوۆ جۇمىس ساپارى شەڭبەرىندە بۇلاندى، ەڭبەكشى، ستەپنوگورسك جانە اقكول اۋرۋحانالارىنىڭ مەديسينا قىزمەتكەرلەرىمەن كەزدەستى. دەنساۋلىق ساقتاۋ سالاسىنىڭ قىزمەتكەرلەرى مەديسينالىق-سانيتاريالىق العاشقى كومەكتىڭ ساپاسى مەن قولجەتىمدىلىگىن جوعارىلاتۋ، جالاقىنى ارتتىرۋ، سالانى سيفرلاندىرۋ جانە ت.ب. بويىنشا قابىلدانىپ جاتقان شارالار تۋرالى تۇسىنىكتەمە بەرىلدى.

«Nur Otan» پارتياسىنىڭ حاتشىسى فارحاد قۋانعانوۆ ەسىل جانە استراحان اۋداندارىنىڭ تۇرعىندارىمەن كەزدەسۋ بارىسىندا ەلباسى ن.ءا.نازاربايەۆ «Nur Otan» پارتياسىنا 4 جوبانى: ينجەنەرلىك جانە الەۋمەتتىك ينفراقۇرىلىمعا باستى نازار اۋدارىلاتىن «قۇتتى مەكەن»، اۋىلدىق جەرلەردى دامىتۋعا باعىتتالعان «اۋىل – ەل بەسىگى»، از قامتىلعان جانە كوپ بالالى وتباسىلاردى قولداۋدى كوزدەيتىن «باقىتتى وتباسى» جوبالارىن جانە پارتيانىڭ قوعامدىق قابىلداۋ بولىمدەرى بازاسىندا حالىقتىڭ الەۋمەتتىك تۇرعىدان قورعالاتىن توپتارىن قولداۋعا باعىتتالعان «حالىققا كومەك» ءبىرىڭعاي الەۋمەتتىك تەرەزەسىن ىسكە قوسۋدى تاپسىرعانىن اتاپ ءوتتى.

سونداي-اق، جۇمىس توبىنىڭ ءار مۇشەسى ازاماتتاردى جەكە قابىلدادى جانە وبلىستارعا قاراستى اۋىلدار مەن  قالالاردىڭ تۇرعىندارىمەن كەزدەستى.

ەل بويىنشا جۇمىس ساپارلارى ەلباسىنىڭ «الەۋمەتتىك قامقورلىق» جاڭا شارالارىن ءتۇسىندىرۋ ءۇشىن جالعاسىن تابادى.

ۇسىنعان: ماقپال سەمباي