قاسىم-جومارت توقايەۆ جۋرناليستەر الدىندا سويلەگەن سوزىندە قازاقستان رەسپۋبليكاسىنىڭ پرەزيدەنتى رەتىندە رەسەي فەدەراسياسىنا جاساعان العاشقى ساپارىنىڭ سيمۆولدىق ءمانىن اتاپ ءوتىپ، ەكى ەل اراسىنداعى قارىم-قاتىناستاردىڭ ەرەكشە سيپاتىن ايتتى دەپ جازادى Qamshy.kz اقپارات اگەنتتىگى اقوردانىڭ دەرەگىن نەگىزگە الا وتىرىپ.
– ماسكەۋگە رەسمي ساپارمەن كەلۋگە شاقىرعان رەسەي فەدەراسياسىنىڭ پرەزيدەنتى ۆلاديمير پۋتينگە، سونداي-اق قوناقجايلىق كورسەتىپ، جىلى قابىلداعانى ءۇشىن رەسەيلىك دوستارىمىزعا ريزاشىلىق بىلدىرەمىن. بۇل ساپار ەكى تاراپتىڭ دا وداقتاستىقتى ودان ءارى دامىتىپ، قازاقستان مەن رەسەي حالىقتارىنىڭ دوستىق بايلانىستارىن نىعايتۋعا ۇمتىلاتىنىن كورسەتتى، – دەدى مەملەكەت باسشىسى.
قاسىم-جومارت توقايەۆ قاتىسۋشىلارعا قازاقستاننىڭ تۇڭعىش پرەزيدەنتى – ەلباسى نۇرسۇلتان نازاربايەۆتىڭ مەملەكەت باسشىسى وكىلەتتىگىن توقتاتۋ تۋرالى شەشىمى جونىندە ايتتى جانە بۇل قادام قازاقستاننىڭ كەلەشەگى ءۇشىن جاسالعان ساياسي دانالىق پەن ۇلكەن جاۋاپكەرشىلىكتىڭ جارقىن ۇلگىسى بولىپ تابىلاتىنىن ەرەكشە اتاپ ءوتتى.
– بۇل تاريحي وقيعا الەمدىك قوعامداستىقتىڭ ءبىزدىڭ ەلىمىزگە زور قۇرمەتپەن قاراۋىنا تۇرتكى بولدى. بۇگىندە نۇرسۇلتان نازاربايەۆ بارشا قازاقستان حالقىنىڭ ىستىق ىقىلاسىنا بولەنىپ، قولداۋىنا يە بولىپ وتىر. ول ەلباسى مارتەبەسىندە قاۋىپسىزدىك كەڭەسىنىڭ جانە Nur Otan باسقارۋشى پارتياسىنىڭ ءتوراعاسى لاۋازىمىنداعى ءوزىنىڭ اۋقىمدى قىزمەتىن اتقارا بەرەدى، – دەدى قازاقستان پرەزيدەنتى.
مەملەكەت باسشىسى ءوزىنىڭ پرەزيدەنت رەتىندەگى قىزمەتى قازاقستان مەن رەسەي اراسىنداعى ىنتىماقتاستىقتىڭ «التىن عاسىرىندا» باستالعانىن اتاپ ءوتىپ، نۇر-سۇلتان مەن ماسكەۋدىڭ جان-جاقتى ديالوگىن نىعايتۋ جونىندەگى ستراتەگيالىق باعداردى جالعاستىرۋعا جانە بۇعان دەيىنگى قول جەتكىزىلگەن ۋاعدالاستىقتاردىڭ ساباقتاستىعىن قامتاماسىز ەتۋگە زور نيەتتەستىك بىلدىرەتىنىن ايتتى.
"مەن رەسەي-قازاقستان ىنتىماقتاستىعىنىڭ التىن عاسىرىندا پرەزيدەنت لاۋازىمىنا كىرىستىم.مەنىڭ العاشقى رەسمي ساپارىمنىڭ تەرەڭ سيمۆولدىق ءمانى بار، ول ءبىزدىڭ ەلدەرىمىزدىڭ قارىم-قاتىناسى ەرەكشە مارتەبەگە يە ەكەنىن بىلدىرەدى"،- دەدى توقايەۆ.
ۇسىنعان: اسەل بولات قىزى
