قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ توراعالىعىمەن كەڭەس ءوتتى دەپ حابارلايدى Qamshy.kz اقپارات اگەنتتىگى اقورداعا سىلتەمە جاساي وتىرىپ.

جيىنعا قازاقستان رەسپۋبليكاسىنىڭ تۇڭعىش پرەزيدەنتى – ەلباسى كەڭسەسىنىڭ باسشىسى م.قاسىمبەكوۆ، قازاقستان رەسپۋبليكاسىنىڭ تۇڭعىش پرەزيدەنتى – ەلباسىنىڭ كومەكشىسى – قازاقستان رەسپۋبليكاسىنىڭ پرەزيدەنتى ءىس باسقارۋشىسىنىڭ ءبىرىنشى ورىنباسارى ا.بيسەمبايەۆ، قازاقستان رەسپۋبليكاسىنىڭ تۇڭعىش پرەزيدەنتى – ەلباسى كەڭسەسىنىڭ، سونداي-اق تۇڭعىش پرەزيدەنت قورى مەن كىتاپحاناسىنىڭ قۇرىلىمدىق بولىمشەلەرىنىڭ جەتەكشىلەرى قاتىستى.

جيىن بارىسىندا ەلباسى نۇرسۇلتان نازاربايەۆقا قازاقستان رەسپۋبليكاسىنىڭ تۇڭعىش پرەزيدەنتى – ەلباسى كەڭسەسىنىڭ قىزمەتىنە بايلانىستى ۇيىمداستىرۋشىلىق-قۇقىقتىق ماسەلەلەردىڭ اياقتالعانى جونىندە باياندالدى، سونداي-اق، قازاقستان رەسپۋبليكاسىنىڭ تۇڭعىش پرەزيدەنتى – ەلباسى كەڭسەسىنە كادرلاردى ىرىكتەۋ جۇمىستارىنىڭ ناتيجەلەرى تۋرالى اقپارات ۇسىنىلدى.

نۇرسۇلتان نازاربايەۆ تۇڭعىش پرەزيدەنت كەڭسەسىنىڭ الدىنا قويىلعان مىندەتتەردىڭ ۋاقتىلى جانە ءتيىمدى ورىندالۋىن قامتاماسىز ەتۋ قاجەتتىگىن اتاپ ءوتتى.

"مەن تۇڭعىش پرەزيدەنت – ەلباسىنىڭ ءتيىستى كونستيتۋسيالىق زاڭمەن رەتتەلەتىن مىندەتتەرىن اتقارۋعا كىرىستىم. سونىمەن قاتار، مەن قاۋىپسىزدىك كەڭەسىنىڭ، قازاقستان حالقى اسسامبلەياسىنىڭ ءتوراعاسىمىن، «Nur Otan» پارتياسىنا باسشىلىق ەتۋدى جالعاستىرا بەرەمىن. الدىمىزدا اۋقىمدى جۇمىس تۇر. وسى قىزمەتتى قامتاماسىز ەتۋ ءۇشىن تۇڭعىش پرەزيدەنتتىڭ كەڭسەسى قۇرىلدى. ۇيىمداستىرۋ ماسەلەلەرىنىڭ بارلىعى شەشىلدى. ەندى ءبارىمىز جۇكتەلگەن مىندەتتەردى ورىنداۋعا كىرىسۋىمىز كەرەك"، – دەدى ەلباسى.

نۇرسۇلتان نازاربايەۆ مەملەكەتتى ودان ءارى دامىتۋ جونىندەگى ستراتەگيالىق مىندەتتەردى ساپالى شەشۋ ماقساتىمەن ۆەدومستۆوارالىق ءوزارا ءتيىمدى ىقپالداستىق ورناتۋدىڭ قاجەتتىلىگىن ايتتى.

"بۇگىندە پرەزيدەنت تە، ۇكىمەت تە مەن بەكىتكەن باعدارلامالىق قۇجاتتاردا، جولداۋدا قامتىلعان، سونداي-اق پارتيا سەزىندە ايتىلعان مىندەتتەردى ورىنداۋ باعىتىندا جۇمىس ىستەۋدە. ءبارىمىز قازاقستاننىڭ يگىلىگى ءۇشىن، ەلىمىزدىڭ تۇراقتىلىعىن، بىرلىگى مەن دامۋىن قامتاماسىز ەتۋ ءۇشىن جۇمىس ىستەۋگە ءتيىسپىز. بۇل – بارىمىزگە ورتاق مىندەت"، – دەدى نۇرسۇلتان نازاربايەۆ.

قازاقستاننىڭ تۇڭعىش پرەزيدەنتى قوعامدىق ماڭىزى بار باستامالاردى جۇزەگە اسىرۋدىڭ ماڭىزدىلىعىنا باسا ءمان بەردى. بۇل رەتتە، ەلباسى نۇرسۇلتان نازاربايەۆ تۇڭعىش پرەزيدەنت قورىنىڭ تالانتتى جاستارعا جان-جاقتى قولداۋ كورسەتۋگە باعىتتالعان جوبالارىن ىسكە اسىرۋدىڭ وزەكتىلىگىن اتاپ ءوتتى.

جيىن قورىتىندىسى بويىنشا ەلباسى ءبىرقاتار ناقتى تاپسىرما بەردى.

ۇسىنعان: فاريزا جومارت قىزى