جاپوندىقتاردىڭ ءار ءىسى بەرەكەلى، ناتيجەلى. نەگە؟ سەبەبى ولار ءۇشىن ءىستى اياعىنا دەيىن جەتكىزۋ قۇرمەتكە بولەنگەنمەن تەڭ. ءتىپتى، اۋلا تازالاۋشىلاردىڭ ءوزى تاعدىرلارىنا نالىعان ەمەس. جۇمىس ىزدەپ اۋرە دە بولمايدى. ولار ارماندارىن كەز-كەلگەن جۇمىس ورنىندا جۇزەگە اسىرا الادى. مۇنىڭ ءوزى كايدزەن دەپ اتالادى.

ەكىنشى دۇنيەجۇزىلىك سوعىس اياقتالعان سوڭ كايدزەن ءادىسىن تاجىريبەگە ەنگىزۋدىڭ ارقاسىندا جاپوندىق كومپانيالار، ونىڭ ىشىندە Toyota كومپانياسى اياعىنان تىك تۇرىپ، مول تابىسقا كەنەلدى. 

كايدزەننىڭ 6 قاعيداسى. جاپوندار ءومىرىن قالاي جەڭىلدەتتى؟

2000 جىلداردان باستاپ بۇل ءادىس ەلىمىزگە دە تانىلا باستادى. العاشىندا قابىلداۋ وڭاي بولمادى، قورقىنىش سەزىمى بولدى، الايدا بۇگىندە جاپون فيلوسوفياسىنىڭ ارقاسىندا جەتىستىككە جەتىپ وتىرعان قانشاما كومپانيا، قانشاما باسشى بار. ءبىر كەزدەرى تىعىرىقتان شىعارعا جول ىزدەپ، كايدزەنگە تاپ بولعان باسشىلار تابىسقا جەتۋ جولدارىن بايانداپ بەردى.

ەرعالي بەگىمبەتوۆ، Amanat سقتاندىرۋ كومپانياسىنىڭ باسقارما باسشىسى

مەن كايدزەن ادىسىنە بايقاۋسىزدا، ويلاماعان جەردەن كەلدىم. 2005 جىل بولاتىن. ارينە، بۇل ءادىستىڭ فيلوسوفياسىنا ءۇڭىلىپ، جەتە ءتۇسىنۋ ءۇشىن 1 جىلعا جۋىق ۋاقىتىم كەتتى. تولىق تۇيسىنگەننەن كەيىن عانا ءبىزدىڭ ساقتاندىرۋ كومپانياسىنا ەنگىزدىم.

كايدزەن مەنى نەسىمەن قىزىقتىردى؟ ونىڭ فيلوسوفياسى قاسيەتتى جازبالاردىڭ ەشبىرىنە قايشى كەلمەيدى. ول كەزدەرى باتىستىڭ باسقارۋ دوكتريناسىمەن جالعاستىرا المايتىنىمدى ءتۇسىندىم. مەن ءۇشىن، ءتىپتى، ول ءادىس تىعىرىققا تىرەپ قويعان سەكىلدى بولدى. ال كومپانيا كايدزەن جۇيەسىن ەنگىزۋ ءۇشىن ەڭ الدىمەن اكسيونەرلەرىمنىڭ ماقۇلداۋى قاجەت بولدى. ولار كەلىسىم بەردى.

كوپتەگەن كومپانيا تۇتىنۋشىسى ءۇشىن كەرەكتى، قاجەتتى، باعالى دۇنيەنى بىلە بەرمەيدى. بۇدان بۇرىن مەنىڭ دە جولىم وزگە ەدى، الايدا «جۇيە نەگىزدى ۇيىم» («ورگانيزاسيا كاك سيستەما») كىتابىن وقىعان سوڭ كوزقاراسىمدى تۇبەگەيلى وزگەرتتىم. سونىمەن قوسا، 2006 جىلى بيزنەستەگى تابىس تەك تۇراقتى كليەنتەن كەلەدى دەپ ويلاعان ەدىم. ءقازىر بۇل ويىم ءۇشىن قاتتى ۇيالامىن.

كايدزەن ادىسىنە قىزىعۋشىلىق تانىتساڭىز بولعانى، ناتيجەگە قول جەتكىزە باستايسىز.

بيزنەس-پروسەسىمىزدى ىلگەرىلەتە باستاعاندا، كليەنتتەرىمىزگە اسەر قالدىرارلىق دۇنيەنى ءبىرىنشى ورىنعا قويدىق. ءبىراق تەلەفون قوڭىراۋلارىن قابىلداي المادىق. ال بۇل ماسەلەنى شەشۋ ءۇشىن بىزگە نەبارى 24 000 تەڭگە قاجەت ەدى. ونىڭ 12 مىڭىنا ەكى  تەلەفون اپپاراتىن، تاعى 12 مىڭىنا بونۋستار ساتىپ الدىق. ءقازىر بىزدە ستاندارت قالىپتاسقان – كليەنت ءۇشىنشى شىرىلدان سوڭ-اق كومپانيامەن تىلدەسە الۋى ءتيىس.

ءوز تاجىريبەمنەن كايدزەن ەنگىزۋدەگى ەرەكشەلىكتەر دەپ مىنالاردى اتاعىم كەلەدى:

-كومپانياداعى بارلىق ماسەلەنىڭ، قيىندىقتىق قاينار كوزى – ونىڭ العاشقى، نەگىزگى بەينەسىندە. ادامدار بەلگىلى ءبىر جۇيەگە ساي جۇمىس ىستەيدى. ول جۇيەنى وزگەرتۋ تەك العاشقى باسشىنىڭ عانا قولىنان كەلەدى.

-بەيرەسمي باسشىلاردى انىقتاپ، ولاردى ءوزىڭنىڭ جاقتاسىڭ ەتۋىڭ ءتيىس.

-قاتەلەر مىندەتتى تۇردە بولادى، قاشىپ قۇتىلا المايسىز. تەك سول قاتەلىكتەردەن ساباق الىپ ۇيرەنىڭىز.

كايدزەن ادىسىنە ءبىر تابان جاقىندادىڭىز با، بولدى، ناتيجەگە سول ساتتەن باستاپ قول جەتكىزە باستايسىز. ونىڭ ۇستىنە قازاقستاندا باسەكەلەستىك از، سول سەبەپتى كايدزەندى ەنگىزۋ ارقىلى جۇمىس ىستەۋ الدەقايدا ءتيىمدى.

كايدزەن ورتالىعىنا كىردىڭ – عاجايىپقا ساپار شەكتىڭ (فوتورەپورتاج)

مارات باققۇلوۆ، الماتى جەلدەتكىش زاۋىتى ديرەكتورلار كەڭەسىنىڭ ءتوراعاسى

2008 جىلى ماسكەۋلىك زاۋىتتاردا ساتۋمەن اينالىسىپ ءجۇرىپ ءوز ءىسىمدى باستاۋدى ماقسات تۇتتىم. بۇل ماقساتىم ورىندالىپ، ءوندىرىسىمىزدى ىسكە قوستىق. شىنىندا، ول گاراج ەدى. الايدا ءتۇرلى قيىندىققا تاپ بولدىق. قازاقستاندىق زاۋىتتار بەلگىلەنگەن ۋاقىت بويىنشا جۇمىس ىستەي المايتىنىنا كوز جەتكىزدىك. تاۋار دا ۋاقىتىلى جەتپەيتىن. ول كەزدە رەسەيلىك زاۋىتتار كايدزەننەن حابارسىز ەدى (كۇلدى). مىنە، سوندا ءبىز ويلانا باستادىق.

كومپانيامىز گۇلدەپ، ءونىمىمىز ارتتى. بۇل ادامداردىڭ سانى مەن تاپسىرىستارعا دا ايتارلىقتاي اسەر ەتتى. ماعان كايدزەن ءادىسى قاتتى ۇنادى، ءتيىمدى. ول ادىسپەن جۇيە قۇرۋ ءۇشىن ەۋروپالىق قايتا قۇرۋ جانە دامۋ بانكىنەن گرانت الىپ، ولار بىزگە 40 مىڭ ەۋرو كولەمىندە قارجى ءبولدى. ەققدب-نىڭ قولداۋى ءبىز ءۇشىن ۇلكەن كومەك بولىپ ەدى. زاۋىتىمىزعا ەڭ ۇزدىك كەڭەسشىلەردى شاقىردىق. ولار بىزگە جۇيە جونىندە تولىعىراق ءتۇسىندىرىپ بەردى.

كايدزەنمەن اينالىسا باستاعانىمدا مەن تەك ساتا الاتىن ەدىم، ءبىراق وندىرە المايتىنمىن. ءقازىر وندىرە الامىز، ونىڭ ۇستىنە مولىنان وندىرەمىز، ەندى سولاردى ساتۋ ماسەلەسىمەن اينالىسۋىمىز كەرەك.

ءقازىر مەن زاۋىتقا اپتاسىنا ءبىر رەت بارامىن. مۇنداعى ماقساتىم – ءار قىزمەتكەرىمە وز-وزىنە باسشى بولۋدى ۇيرەتۋ. ناتيجەسى جامان ەمەس. ءتوراعا ءارى مەنشىك يەسى رەتىندە ءوزىمدى جايلى سەزىنەمىن. ەڭ باستىسى، زاۋىتتىڭ ىشكى ماسەلەسىنە الاڭدامايمىن.

جۇلدىز كاكەنوۆ، «Marden Property» ج ش س ديرەكتورى

Marden Property كومپانياسىنىڭ ىرگەسىن 2006 جىلى قالادىق. وفيستىك جىلجىمايتىن مۇلىكتى باسارامىز. انىعى – ءۇش بيزنەس-ورتالىق ءبىزدىڭ قاراماعىمىزدا: «الما-اتا ىسكەرلىك ءۇيى» (نۇر-سۇلتان)، Marden (استانا) جانە Baykonyr (الماتى).

كايدزەنمەن 2012 جىلدان باستاپ اينالىسامىز. جاپونيالىق ادىسكە باسقارۋ ماسەلەسىندە قيىندىقتار تۋعاندىقتان اۋىستىق. كەڭەسشى ىزدەۋ ءۇشىن قازاقستانداعى ەۋروپالىق قايتا قۇرۋ جانە دامۋ بانكى باعدارلاماسىنىڭ بازاسىنا سۇيەندىك. كايدزەن بويىنشا ەلىمىزدە 40-قا جۋىق كەڭەس بەرەتىن كومپانيا بار، ءقازىر سانى وسپەسە... ولاردىڭ 11-ىمەن جازىسىپ كوردىك. ناتيجەسىندە، 4 كومپانيامەن كەزدەسىپ، «پرەكو كونسالتينگ» كومپانياسىمەن كەلىسىمگە كەلۋگە وقتالدىق. ەكى كەڭەسشىنى ءبىزدىڭ شتاتقا شاقىرىپ، سودان باستاپ Marden Property كومپانياسى ءۇشىن جاڭا كەزەڭ باستالدى.

ەگەر كايدزەن ءادىسىن ەنگىزىڭىز كەلسە، كومپانياڭىزعا ادام شاقىرىڭىز، تابىستارىڭىزدى كورسىن – سىزگە دە، وعان دا جاقسى بولادى.

ال بىزدە قانداي قيىندىقتار بولدى دەيسىزدەر عوي؟ بارلىق كومپانيا ءوزىنىڭ مينۋستارىن ىسىرىپ قويىپ، تەك جاقسى جاقتارىن كورسەتكىسى كەلەدى عوي. نەسى بار، بىزدە دە ءبارى جاقسى بولاتىن. ءبىراق ءقازىر جاعدايىمىز تىپتەن كەرەمەت. جاعدايعا اناليز جاساپ كورگەندە، جىلدام ءارى ساپالى ارەكەت جاساپ جاتقانىمىزدى بايقادىق. كايدزەن دە سوڭىمىزدان ەرىپ كەلەدى. بىزدە جۇيە بولاتىن، الايدا توقتاپ تۇردى. ول جۇيەنىڭ كوپتىگى سونشالىق، ءتىپتى كايدزەن-مەنەدجەرلەر ول تۋرالى بىلمەگەن. اقىل سۇراعانىمدا، ەڭ بىرىنشىدەن، جۇيەنى ىسكە اسىرۋعا كەڭەس بەردى. ءتارتىپ ورناتۋىڭىز ءتيىس بولدى.

كايدزەننىڭ كۇشى ورلەي ءتۇستى. وعان دا، بىزگە دە بىرگە جۇمىس ىستەگەن جايلى بولىپ بارادى. ەڭ باستىسى، كايدزەننىڭ يدەيالارى ەشقاشان قيىندى تۋعىزبايتىن.

تاعى نەنىڭ ماڭىزدى ەكەنىن بىلەسىزدەر مە؟ بىزگە كوپ كومپانيا كەلدى، اراسىندا باسەكەلەستەرىمىز دە بولدى. ءوز تاجىريبەمىزبەن ءبولىسۋ ءۇشىن، ءبىز بارىمىزدى سالىپ دايىندالامىز. ءوفيستىڭ ءىشىن تازالايمىز، جيناستىرامىز، ءار زاتتى ءوز ورنىنا قويىپ، رەتكە كەلتىرەمىز. قوناق كەلگەن سايىن جانىمىز راحات تابادى (كۇلدى). كەلگەن ادامعا تابىسىڭدى كورسەتۋ – ناعىز «كايفتىڭ» ءوزى ەمەس پە؟

ءسوزىمدى قورىتىندىلاي كەلە مىنانى ايتقىم كەلەدى: باسشى كايدزەنگە ۇنەمى كوڭىل ءبولىپ وتىرۋى ءتيىس، ءتىپتى بۇل باعىتتا ناعىز كاسىبي ماماندار جۇمىس ىستەسە دە...

ايتا كەتەرلىك ماڭىزدى دۇنيە – كايدزەندى كومپانياعا ەنگىزۋ ءۇشىن ونداعى بارلىق قىزمەتكەر اتسالىسۋى ءتيىس. كەي عالىمدار ايتادى عوي، قوعامدا بىرنارسەنى وزگەرتۋ ءۇشىن تۇرعىندار دا ويىن وزگەرتۋى ءتيىس.