قازاقستاندا كەزەكتەن تىس پرەزيدەنتتىك سايلاۋ 2019 جىلدىڭ 9 ماۋسىمىندا وتەتىن بولادى. بۇل تۋرالى قاسىم-جومارت توقايەۆ حالىققا ۇندەۋى بارىسىندا ايتتى دەپ حابارلايدى Qamshy.kz اقپارات اگەنتتىگى.
مۇنداي شەشىمگە پرەزيدەنت ەلباسى نۇرسۇلتان نازاربايەۆپەن، پارلامەنت سپيكەرلەرىمەن ءارى ۇكىمەت باسشىسىمەن اقىلداسا وتىرىپ كەلگەن.
"پرەزيدەنتتى حالىق تاڭدايتىن بولادى. مەن باسشى رەتىندە سايلاۋدىڭ ءادىل ءارى تازا وتۋىنە كەپىلدىك بەرەمىن"، - دەدى قاسىم-جومارت توقايەۆ پرەزيدەنت رەتىندەگى العاشقى ۇندەۋىندە.
ايتا كەتەيىك، قازاقستاندا 30 جىلعا جۋىق بيلىك قۇرعان نازاربايەۆ 19 ناۋرىزدا كەنەتتەن پرەزيدەنت قىزمەتىنەن كەتەتىنىن مالىمدەدى. ول مالىمدەمەسىندە سايلاۋ وتكەنشە قاسىم-جومارت توقايەۆ پرەزيدەنت بولاتىنىن ايتقان.
توقايەۆ 20 ناۋرىزدا انت بەرىپ، قىزمەتىنە كىرىستى. ال توقايەۆتىڭ ورنىنا نۇرسۇلتان نازاربايەۆتىڭ ۇلكەن قىزى داريعا نازاربايەۆا سەنات سپيكەرى بولىپ تاعايىندالعان.
ۇسىنعان: گۇلىم جاقان
