اتاۋلى الەۋمەتتىك كومەكتى تاعايىنداۋدا بىرىزدىلىك جوق. الماتى وبلىسى ۇزىناعاش اۋىلىنداعى كوپبالالى انالار وسىلاي دەپ شاعىمدانىپ وتىر. ايتۋلارىنشا، كوميسسيا ءۇيدىڭ ىشىندەگى جيھازدى دا ەسەپكە الىپتى. ءتىپتى كەيبىرىنىڭ ۇيىندەگى كىلەمى مەن تەلەديدارىن دا ساناعان. الايدا، جەرگىلىكتى بيلىك مۇنى جوققا شىعاردى دەپ حابارلايدى Qamshy.kz اقپارات اگەنتتىگى كتك ارناسىنىڭ دەرەگىن نەگىزگە الا وتىرىپ.

الماتى وبلىسىندا اتاۋلى كومەكتى الۋعا قۇجات وتكىزگەن انالار نارازىلىق ءبىلدىردى. جامبىل اۋدانى، ۇزىناعاش اۋىلىنداعى جۇرت تاڭنان بەرى اكىمدىك ماڭىن توراۋىلداپ ءجۇر. ايتۋلارىنشا، وتباسى تابىسىن ەسەپتەۋ بارىسىندا كەيبىرىنىڭ ۇيىندەگى كىلەم مەن تەلەديداردى ەسەپكە العان. ەندى ءبىرىنىڭ باسپاناسىز ەكەنىنە قاراماعان. ياعني، تابىستى ەسەپتەۋدە بىرىزدىلىك جوق. وتباسىنىڭ جاعدايىن وسىلاي انىقتاۋ اقىلعا قونىمسىز دەپ اشىنادى.

الماگۇل مۇراتوۆا، ۇزىناعاش اۋىلىنىڭ تۇرعىنى: - تەليەۆيزور، شكاف، ديۆان بولسا بەرىلمەيدى دەيدى. سوندا ءبىز ەكى كىلەمنىڭ ۇستىندە وتىرۋىمىز كەرەك پە؟ ءتىپتى گاز، سۋ وتكىزىلمەگەن بولۋى كەرەك دەيدى. ال ۇكىمەت تەك جالاقىعا قاراپ بەرىلەدى دەدى. دۇرىس پا؟

زەمفيرا اقىلبايەۆا، ۇزىناعاش اۋىلىنىڭ تۇرعىنى: - ماعان «سەن بايسىڭ» جاردەماقى نەگە كەرەك دەيدى؟ مەنىڭ ءۇيىم جوق. مەن ەنەممەن بىرگە تۇرامىن. كۇيەۋىمدە ماشينا بار. 1 جىل بولدى مەملەكەتتىك جۇمىسقا تۇردى. 50 مىڭ الادى جالاقى، مەن 10 500 تەڭگە الام. سونى 5 بالاعا جەتكىزە الا ما؟

2 ساۋىردەن بەرى قۇجات قابىلدايتىن جەردە مامان از، - دەيدى. قارجىلاي كومەكتى الۋعا ءوتىنىش بەرگەننەن كەيىن، ارنايى قۇرىلعان كوميسسيا سول وتباسىنى تەكسەرۋى ءتيىس. وسىلايشا ماتەريالدىق حاتتاما تولتىرىلىپ، سونىڭ قورىتىندىسىنا سايكەس جاردەماقى تاعايىندالادى ەكەن.

سالتانات شايدىلدايەۆا، ۇزىناعاش اۋىلىنىڭ تۇرعىنى: - ەكى ايەلدىڭ ارتىنان 100 ادام ءجۇر. ول ادامداردى اپارىپ ءۇيىڭدى كورسەتۋ كەرەك ەكەنسىڭ. ول تەكسەرەدى ەكەن. ءقازىر تۇسكى اسقا كەتتى. ەندى قاي ۋاقىتتا كەلەتىندەرىن بىلمەيمىن.

جاۋاپتىلار تۇسكى ۇزىلىسكە كەتكەندە جۇرت اشۋىن قىزمەت كورسەتكەن جالعىز مامانعا توكتى. تۇسكى استان ورالعان اكىمنىڭ ورىنباسارى ءتيىستى ماماندار بولىنەتىنىن ايتىپ، ەشكىم ەسكەرۋسىز قالمايدى دەپ سەندىردى.

داميرا ناۋرىزبايەۆا، ۇزىناعاش اۋىلدىق وكرۋگى اكىمىنىڭ ورىنباسارى: - بۇگىننەن باستاپ 5 ادام ءبولىنىپ جاتىر. ءار ۇيگە كىرەدى. قاجەتتى بولسا بارلىعى الادى.

اكىمدىك ماماندارىنا جۇمىسپەن قامتۋ ورتالىعى دا كومەكتەسەدى. ءارقايسى كوشە-كوشەنى ارالاپ، اتاۋلى كومەككە شىن مۇقتاجداردىڭ ارا-جىگىن اجىراتىپ، انىقتاۋى ءتيىس. 21 مىڭ تەڭگەگە ۇمىتتىلەردىڭ ءبىرى - اينۇر اتاكييەۆا. بۇرىن مەملەكەتتەن جارمەداقى العان ەمەس. ءبىزدىڭ ءتۇسىرىلىم توبى كوميسسياعا ەرىپ تۇرمىسى ناشار وتباسىنىڭ تابىسىن ەسەپتەپ قايتتى. 16 شارشى مەترلىك لاشىقتى 3 ادام پانالايدى. يەسىنە اي سايىن 15 مىڭ تولەيدى. وتباسىنىڭ كىرىسى - 42 مىڭ تەڭگە.

اينۇر اتاكييەۆا، جالعىزباستى انا: - بالالارىمنىڭ اقشاسىن شىعارىپ بەرسە ەكەن دەيمىن. جەتپەيدى مەنىڭ تابىسىم.

كوميسسيا مۇشەسى جالعىزباستى انانىڭ تۇرمىسىمەن تانىسىپ، كورگەنىن حاتتاماعا ءتىزىپ شىقتى.

اراي ستامقۇلوۆا، ۇزىناعاش اۋىلدىق وكرۋگى اكىمى اپپاراتىنىڭ باس مامانى: - تۇرمىس جاعدايىڭىزدى كوردىك. سىزگە الەۋمەتتىك جاردەماقى تاعايىندالادى. بىزگە كەلىپ قۇجاتتارىڭىزدى جيناساڭىز بولادى.

اكىمدىكتەگىلەردىڭ ايتۋىنشا، 1 ساۋىردەن باستاپ تاعايىندالاتىن جاردەماقىنى الۋ ءۇشىن ءار وتباسى قۇجات وتكىزگەن سوڭ كوميسسيا مۇشەلەرى ارنايى بارىپ تابىسىن تەكسەرەدى. ءتىپتى قوراسىنداعى مالى دا ەسەپكە الىنادى ەكەن. سوندىقتان ەشكىم تاسادا قالماس ءۇشىن ءارقايسىن ءجىتى تەكسەرەمىز جانە وعان ۋاقىت كەرەك دەيدى.

ۇسىنعان: فاريزا جومارت قىزى