بۇگىن مەملەكەت باسشىسى قاسىم-جومارت توقايەۆ ساعات 13:00-دە قازاقساندىقتارعا ۇندەۋ جاريالايدى. ال ۇندەۋ جاسايتىنىن جاريالاماس بۇرىن پرەزيدەنت اقوردادا Nur Otan پارتياسى ءتوراعاسىنىڭ ءبىرىنشى ورىنباسارى ماۋلەن اشىمبايەۆتى، "اق جول" دەموكراتيالىق پارتياسىنىڭ ءتوراعاسى ازات پەرۋاشيەۆتى، قازاقستان كوممۋنيستىك حالىق پارتياسى ورتالىق كوميتەتىنىڭ حاتشىسى ايقىن قوڭىروۆتى، "اۋىل" حالىقتىق-دەموكراتيالىق پاتريوتتىق پارتياسىنىڭ ءتوراعاسى ءالي بەكتايەۆتى قابىلداعان. 

"كەزدەسۋ بارىسىندا قوعامدىق-ساياسي كۇن تارتىبىندەگى وزەكتى ماسەلەلەر تالقىلاندى"، - دەلىنگەن اقوردانىڭ رەسمي سايتىندا. 

توقايەۆتىڭ ارنايى ۇندەۋىن حالىق سايلاۋعا بايلانىستى بولجاپ وتىر. "قازاقستاندا مەرزىمىنەن بۇرىن  پرەزيدەنتتىك سايلاۋ ءوتۋى مۇمكىن" دەپ شۋلاستى. 

كونستيتۋسياعا سايكەس، قازاقستاندا پرەزيدەنتتىك سايلاۋ 2020 جىلدىڭ اياعىندا ءوتۋى ءتيىس. الايدا 2019 جىلى اقپاننىڭ 4-ىندە قازاقستان پرەزيدەنتى نۇرسۇلتان نازاربايەۆ كونستيتۋسيالىق كەڭەستەن كونستيتۋسياداعى «پرەزيدەنت وكىلەتىنىڭ توقتاۋى تۋرالى 42-بابى 3-تارماعىن ءتۇسىندىرۋدى» سۇراعان. سودان بەرى الەۋمەتتىك جەلى قولدانۋشىلارى مەرزىمىنەن بۇرىن سايلاۋ وتەدى دەپ بولجاي باستادى. ءبىراق نازاربايەۆ ەرتەڭىندە-اق قازاقستاندىقتارعا ارنايى مالىمدەمە جاسادى. وندا حالىقتىڭ بەكەر ابىگەرگە تۇسپەۋىن، ۋاقىتىنان بۇرىن سايلاۋدىڭ بولمايتىنىن ەسكەرتكەن. 

 ال قازاقستاندا 30 جىلعا جۋىق بيلىك قۇرعان نازاربايەۆ 19 ناۋرىزدا كەنەتتەن پرەزيدەنت قىزمەتىنەن كەتەتىنىن مالىمدەدى. ول مالىمدەمەسىندە سايلاۋ وتكەنشە قاسىم-جومارت توقايەۆ پرەزيدەنت بولاتىنىن ايتقان.

توقايەۆ 20 ناۋرىزدا انت بەرىپ، قىزمەتىنە كىرىستى. ال​ توقايەۆتىڭ ورنىنا نۇرسۇلتان نازاربايەۆتىڭ ۇلكەن قىزى داريعا نازاربايەۆ سەنات سپيكەرى بولىپ تاعايىندالعان.

ايتا كەتەيىك، 8-9 ءساۋىر كۇندەرى پرەزيدەنت اتىراۋداعى ءبىرقاتار نىسانداردى ارالاۋى ءتيىس ەدى. الايدا ساپارى كەيىنگە، ياعني 11-12 ساۋىرگە شەگەرىلگەن. ال كەشە "كوك-جايلاۋ" جوباسىن ۋاقىتشا جابۋ تۋرالى ۇسىنىس ايتىپ، ناتيجەسىندە الماتى قالاسىنىڭ اكىمى باۋىرجان بايبەك جوبانىڭ كەيىنگە قالدىرىلاتىنىن مالىمدەدى. 

ەندى مىنە پرەزيدەنتتىك تاققا وتىرعانىنا ءبىر اي تولماي جاتىپ، توقايەۆ ۇندەۋ جاريالاماق. وسىعان بايلانىستى بىرنەشە ساراپشىعا قوڭىراۋ شالىپ كوردىك، الايدا ماردىمدى جاۋاپ الا المادىق. بىزدىڭشە، بۇل تىكەلەي سايلاۋعا قاتىستى بولۋى مۇمكىن...