قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ بۇگىن حالىققا ۇندەۋ جاريالاپ، ۇستىمىزدەگى جىلدىڭ 9-ماۋسىمىندا كەزەكتەن تىس پرەزيدەنت سايلاۋى وتەتىنىن مالىمدەدى.

ول مۇنداي شەشىمگە ەلىمىزدىڭ دەموكراتيالىق باعىتتا ەكەنىن، حالىق ءوز باسشىسىن ءوزى تاڭداۋ قاجەتتىگىن ەسكەرىپ كەلگەن. سونداي-اق، پرەزيدەنت شەشىم قابىلداماس بۇرىن ءبىرقاتار پارتيا باسشىلارىمەن جانە كونستيتۋسيالىق كەڭەستىڭ ءتوراعاسى، ەلباسى نۇرسۇلتان نازاربايەۆپەن اقىلداسقان.

ۇندەۋدەن كەيىنگى كەز-كەلگەن ادامنىڭ ساناسىندا كەلەسى سۇراقتار تۋىنداعانى انىق: «سايلاۋعا كىم تۇسەدى؟»، «توقايەۆ ورىنىن ساقتاپ قالۋعا تىرىسا ما؟»، «سايلاۋ قانشالىقتى ءادىل وتەدى؟».

بۇل سۇراقتاردىڭ بارلىعىنىڭ جاۋابى بۇلىڭعىر. دەسەك تە، قاسىم-جومارت كەمەل ۇلىنىڭ بەرگەن ۋادەسىنە سۇيەنسەك، سايلاۋ بارىنشا ادال وتپەك. قۇپ!

سايلاۋعا قاتىساتىن ۇمىتكەرلەردىڭ قاتارىندا توقايەۆقا باسەكەلەس بولا الاتىن كىم بار ەكەنى كۇللى قازاقتى قىزىقتىرىپ وتىرعانى راس. سوڭعى ۋاقىتتاردا الەۋمەتتىك جەلىلەردە ارنايى پاراقشالار اشىلىپ، بەلگىسىز ادام داۋىسى دوسمۇحاممەد كوشىموۆتىڭ كانديداتۋراسىن ۇگىتتەپ جاتقانىن بايقادىق. «شابان ۇيرەك بۇرىن ۇشادىنىڭ» كەرى. سوعان قاراعاندا، كەزەكتەن تىس سايلاۋعا دوس كوشىمنىڭ ات قوسىپ قالۋى عاجاپ ەمەس.

وزگە ۇمىتكەرلەر تۋرالى بولجام جاساۋدىڭ ءوزى قيىن. دەگەنمەن، بۇگىنگى ۇندەۋ وڭ جامباسىنا كەلىپ، قولىن ىسقىلاپ وتىرعان ۇمىتكەرلەردىڭ بار ەكەنى انىق.

ساياساتكەر، «جاڭا قازاقستان» فورۋمىنىڭ وكىلى ءامىرجان قوسانوۆ تا ەلباسى وكىلەتتىلىگىن توقتاتقاننان كەيىنگى جۋرناليستەر سۇراعىنا «ەل قولداپ جاتسا نەگە تۇسپەسكە؟ مەن دايىنمىن» دەپ جاۋاپ بەرگەن. تاعى ءبىر ساۋساعىڭىزدى بۇگە بەرىڭىز.

ال «اۋىل» پارتياسى پرەزيدەنت سايلاۋىنا ۇمىتكەر ۇسىنۋ جوسپارلارىندا جوق ەكەنىن كەسىپ ايتتى. ال «اق جول» پارتياسىنىڭ جەتەكشىسى ازات پەرۋاشيەۆ بوسقا اقشا شاشۋ ءۇشىن ەمەس، تەك ناتيجە بولسا عانا ۇمىتكەر ۇسىنۋ قاجەت ەكەنىن ايتىپ، جالپىلاما جاۋاپ بەرگەن. «وگىزدى ولتىرمەيدى، اربانى سىندىرمايدى».

جالپىۇلتتىق سوسيال-دەموكراتيالىق پارتياسىنىڭ وكىلدەرى بايگەگە ۇمىتكەر قوسۋ ماسەلەسىن الداعى ۋاقىتتا تەرەڭىرەك تالقىلاپ بارىپ، شەشىم قابىلدايتىندارىن جەتكىزگەن.

دەمەك، ايعا جۋىق ۋاقىت بيلىكتى ۋىستاعان قاسىم-جومارت كەمەل ۇلىنىڭ بۇل سايلاۋداعى مۇمكىندىگى جوعارى. ونىڭ ۇستىنە حالىقارالىق ساياسي ارەنادا تاجىريبەسى بار ساياساتكەردىڭ بيلىك باسىندا بولۋىن حالىق تا قۇپ كورەتىن سەكىلدى.
2020 جىلدىڭ ساۋىرىنە دەيىن سوزىلاتىن وكىلەتتىلىگىن ءبىر اي وتەر-وتپەستە كەزەكتەن تىس سايلاۋعا سالۋ شەشىمىنە كەلۋى دە پرەزيدەنت توقايەۆتىڭ سەنىمدىلىگىن كورسەتىپ بەرەدى.

ادىلەت مادەنيەت