كۇنى كەشە جاسالعان توقايەۆ ۇندەۋىنەن سوڭ ەل اراسىندا سايلاۋعا كىم تۇسەتىنى تۋرالى ءدۇدامال پىكىرلەر جاۋىننان كەيىنگى ساڭىراۋقۇلاقشا قاپتاپ كەتتى. شىنتۋايتىندا، سايلاۋعا تۇسەتىن ۇمىتكەرلەر اراسىنان ۇتىمدى باعدارلاما جاساپ، تۇتقا ۇستاۋعا ۇمتىلاتىن بىرەۋ تابىلار ما ەكەن؟
ءمۇيىزى قاراعايداي ساياساتكەرلەر دە ءجوندى بولجام جاساۋعا قينالىڭقىراپ وتىر. ءبىراق كەشەگى ايتۋلى كۇندە ءبىرقاتارى پىكىر ءبىلدىردى. سول «ءبىرقاتار» ساياساتكەرلەردىڭ پىكىرىنە نازار سالايىق.
مارات شيبۇتوۆ الداعى كەزەكتەن تىس پرەزيدەنت سايلاۋىنا ءتورت پارتيا ۇمىتكەرلەرى، انىعىن ايتقاندا، سول ءتورت پارتيانىڭ باسشىلارى جانە ءبىرلى-جارىم قوعامدىق قوزعالىستاردىڭ ۇمىتكەرلەرى تۇسەدى دەپ بولجايدى.
ال ەربول ەدىلوۆ بيلىكتەگى پارتيادان قازىرگى پرەزيدەنتتىڭ كانديداتۋراسى ۇسىنىلاتىنىنا جانە داريعا نازاربايەۆانىڭ بۇل بايگەگە ات قوسپايتىنىنا سەنىمدى.
بەلگىلى ساياساتكەر دوسىم ساتپايەۆ سايلاۋ ناۋقانىنىڭ ءادىل ءوتۋى تۋراسىندا اشىق ايتتى. «بۇل سايلاۋدىڭ سەنارييى، كىم سايلانىپ، كىم قاتىساتىنى جانە ناۋقاندا كىمدەردىڭ قانداي قىزمەت اتقاراتىنى الدىن الا بەلگىلەنگەن. وپپوزيسيالىق توپتاردىڭ اۋىزىنا قۇم قۇيىلىپ وتىر. ال ايماقتارداعى اكىمدەر بيلىكتەن تەك قانا پارمەن كۇتۋدە. سايلاۋ تۋرالى جاريالاۋ مەن ونىڭ ءادىل ءوتۋى – ەكى بولەك دۇنيە. بىزدەگى مەملەكەتتىك اپپارات سايلاۋ وتكىزۋدىڭ ءبىر عانا ءتۇرىن بىلەدى. باسقاشا جاساۋعا قاۋقارسىز»، - دەدى ول.
ال بيلىكتەگىدەن وزگە پارتيالار حالىق كوڭىلىنەن شىعاتىن باعدارلاما جاساپ، دوداعا بەل شەشە كىرىسىپ كەتۋگە قۇلىقتى ما؟
ساياساتكەرلەردىڭ بارلىعى ءتىلىن بەزەپ، ۇمىتكەر شىعارادى دەپ وتىرعان ءتورت پارتيا: «اق جول»، «قازاقستان كوممۋنيستىك حالىق پارتياسى»، «اۋىل» پارتياسى جانە «Nur Otan» پارتياسى.
بيلىكتەگى پارتيا قاتارىنان شىعاتىن ۇمىتكەردىڭ سالماقتى بولارى انىق. ول ۇمىتكەر قازىرگى پرەزيدەنتتىڭ ءوزى بولۋى دا ابدەن مۇمكىن.
كەزەكتەن تىس سايلاۋ تۋرالى جاريالاماس بۇرىن مەملەكەت باسشىسى قاسىم-جومارت توقايەۆ «اق جول» پارتياسىنىڭ ءتوراعاسى ازات پەرۋاشيەۆتى، «قكح» پارتياسىنىڭ ورتالىق كوميتەتىنىڭ حاتشىسى ايقىن قوڭىروۆتى، «اۋىل» پارتياسىنىڭ ءتوراعاسى ءالي بەكتايەۆتى قابىلداعانىن بىلەمىز.
بۇل باسقوسۋدا نە شەشىلدى، پرەزيدەنت كىمگە قانداي نۇسقاۋ بەردى؟ بۇل جاعى بەيمالىم.
ەندى كەلەسى دۇنيەگە نازار اۋدارىپ كورەلىك. سوڭعى سايلاۋلاردا ءوزىن-وزى ۇسىنۋشى ازاماتتار قاتارى سيرەپ كەتتى. وزدەرى نان تاپپايتىنىن ءبىلدى مە، الدە حالىقتىڭ ولارعا پىسقىرىپ تا قاراماعانى كوڭىلدەرىنە قاياۋ ءتۇسىردى مە، ايتەۋىر ءبىر بۇلىڭعىر دۇنيە...
سوندىقتان، الداعى سايلاۋدا ۇمىتكەرلەر پارتيا نەمەسە قوعامدىق قوزعالىستار قاتارىنان شىعاتىنى بەلگىلى.
"دودانى قىزدىرادى" دەگەن ازاماتتاردىڭ قارجى ماسەلەسىن العا تارتىپ، سەزد شەشىمىن سىلتاۋراتىپ تارتىنشاقتاۋى كۇدىك تۋعىزادى-اق. ال ەكى ءسوزىنىڭ ءبىرى «حالىق» بولىپ، اتويلاپ تۇرعان ۇلتشىل ازاماتتاردىڭ قارجىلىق الەۋەتى مەن ماڭىزدى باعدارلامالارى بولماي دىڭكەلەپ وتىر. ەل قامىندا سويلەۋ مەن ناقتى جوبالار ارقىلى ونى دالەلدەۋ ەكى بولەك نارسە ەكەنىنە وسى تۇستا كوز جەتكەندەي.
ۇتىمدى باعدارلامالار، ناقتى جوسپارلار، سان ءتۇرلى كوزقاراستاعى حالىق، ناقتى داۋىس سانى، بۇلار – ءادىل سايلاۋدىڭ بەينەسى.
توقايەۆ ۋادە ەتكەندەي، سايلاۋ ناۋقانى دا، سايلاۋ قورىتىندىسى دا ەرەكشە ءادىل بولسا، مەملەكەتتىك باسقارۋ جۇيەسىنىڭ تۇتقاسى وزگە ۋىسقا كوشكەنىنە دالەل.
ال ۇلتشىلدار بيلىكتى تەك تۇسىندە كورىپ ءجۇر. ويانعاندا سول جاققا قاراپ ءبىر ەسىنەيدى دە، قالىپتى سوقپاعىمەن تارتا بەرەدى. ولاردى حالىق قولداعانىمەن، بيلىك ولاردى قالاي ما؟!.
ادىلەت مادەنيەت
پىكىر قالدىرۋ