1945 جىلى جاپونيانىڭ ەكى قالاسىنا – حيروسيما مەن ناگاساكيگە اتوم بومباسى تاستالعانىن بىلەمىز. قوس شاھاردىڭ كۇلىن كوككە ۇشىرعان زوبالاڭنىڭ جانىندا ءجۇرىپ تە امان قالۋعا بولادى ەكەن. وعان دالەل – سۋتومۋ ياماگۋتيدىڭ تاعدىرى.

ەكىنشى دۇنيەجۇزىلىك سوعىس كەزىندە سۋتومۋ ياماگۋتيدىڭ ەكى اتوم بومباسىنىڭ جارىلىسىن باستان كەشكەنى رەسمي تۇردە انىقتالعان.

1945 جىلدىڭ 6-تامىزىندا سۋتومۋ جۇمىستا بولعان. ءدال وسى كۇنى حيروسيما قالاسىنا يادرولىق بومبا تاستالدى. ال سۋتومۋدىڭ جۇمىسى بومبا تۇسكەن جەردەن ءۇش شاقىرىم جەردە ەدى. ول جارىلىس سالدارىنان كۇيىككە شالىنىپ، اۋرۋحاناعا جەتكىزىلەدى. ءبىراق ول اۋرۋحاناعا ۇزاق تۇراقتاماي، ناگاساكي قالاسىنداعى ۇيىنە پويىزبەن تارتادى.

ۇيىنە اسىققان جىگىتتى الدىنان تاعى دا ءبىر جارىلىس كۇتىپ تۇر ەدى. ول – 1945 جىلدىڭ 9-تامىزىنداعى ناگاساكي قالاسىن بومبالاۋ. جاپون جىگىتتىڭ كورەر جارىعى بولىپ، تاعى دا امان قالادى.

اتوم بومباسىنىڭ زاردابىن تارتقان سۋتومۋ مەن ونىڭ ايەلىنەن 1950 جىلداردىڭ باسىندا ەكى قىز تۋعان. سودان كەيىن ول Mitsubishi كومپانياسىنداعى جۇمىسىنا قايتا ورالىپ، مۇناي تانكەرلەرىنىڭ جوباسىمەن اينالىسادى.

1957 جىلى جاپون بيلىگى ياماگۋچيدىڭ تەك ناگاساكي جارىلىسىندا عانا بولعانىن مالىمدەيدى. بۇل مالىمدەمەلەردىڭ سۋتومۋ ءۇشىن ماڭىزى جوق ەدى. وعان وتباسىنىڭ، ءوزىنىڭ اماندىعى جەتكىلىكتى ەدى.

ياماگۋچي 2010 جىلى 93 جاسىندا باۋىر وبىرىنان قايتىس بولدى.