بۇل تۋرالى پارتيا ءتوراعاسىنىڭ ءبىرىنشى ورىنباسارى ماۋلەن اشىمبايەۆ پارتيانىڭ ورتالىق اپپاراتىندا وتكەن جيىندا ايتتى.

– ەلىمىزدەگى جەتەكشى ساياسي پارتيا رەتىندە «Nur Otan» پرەزيدەنت سايلاۋىنا بەلسەندى تۇردە قاتىسادى. پارتيا ءتوراعاسىنىڭ تاپسىرماسىنا سايكەس پارتيامىز سايلاۋعا قاتىسۋ ءۇشىن ءوز كانديداتىن ۇسىنادى. سوعان بايلانىستى بۇگىن نۇرسۇلتان ءابىش ۇلى نازاربايەۆ 2019 جىلدىڭ 23 ساۋىرىندە پارتيانىڭ كەزەكتەن تىس XIX سەزىن شاقىرۋ تۋرالى قاۋلىعا قول قويدى. سول سەزدە «Nur Otan» اتىنان سايلاۋعا قاتىساتىن كانديداتتىڭ ەسىمى بەلگىلى بولادى، – دەدى ماۋلەن اشىمبايەۆ.

سونداي-اق ول كەزەكتەن تىس پرەزيدەنت سايلاۋىن وتكىزۋ تۋرالى شەشىمنىڭ وتە ورىندى ءارى ۋاقىتىلى قابىلدانعانىن ايتىپ، «Nur Otan» پارتياسىنىڭ اتالعان تاريحي شەشىمدى قولدايتىنىن جەتكىزدى.

– ءبىز قازاقستان پرەزيدەنتى قاسىم-جومارت توقايەۆتىڭ كەزەكتەن تىس پرەزيدەنت سايلاۋىن وتكىزۋ تۋرالى شەشىمىن تولىعىمەن قولدايمىز. بۇل بيلىكتىڭ تۇراقتىلىعى مەن ەلدىڭ بىرلىگىن نىعايتۋ ءۇشىن قابىلدانعان ۋاقىتىلى ءارى وتە ورىندى شەشىم. «Nur Otan» پارتياسى سايلاۋ ناۋقانىنا ءتاس-تۇيىن دايىن. ول ءۇشىن ءبىز ءوزىمىزدىڭ ۇيىمداستىرۋشىلىق، كادرلىق، ساياسي جانە اقپاراتتىق الەۋەتىمىزدى پايدالانىپ، زاڭ اياسىندا جۇمىس ىستەيمىز. سايلاۋ ەلىمىزدەگى تۇراقتىلىق پەن بىرلىكتىڭ ودان ءارى كۇشەيۋىنە وڭ اسەرىن تيگىزىپ، حالىقتى ەلباسىنىڭ ساياساتى اياسىندا جاڭا ماقساتتارعا جەتەلەيدى دەپ سەنەمىز، – دەدى ماۋلەن اشىمبايەۆ.

جيىن سوڭىندا ماۋلەن اشىمبايەۆ پارتيانىڭ ورتالىق اپپاراتى مەن بارلىق دەڭگەيدەگى فيليالدارىنا جانە باستاۋىش پارتيا ۇيىمدارىنا الداعى سايلاۋ ناۋقانىنا قاتىستى ءبىرقاتار ناقتى تاپسىرمالار بەردى.