10 ساۋىردە اتىراۋ وبلىسىنىڭ اكىمى نۇرلان نوعايەۆتىڭ توراعالىعىمەن وبلىس اكىمدىگى جانىنداعى قۇقىق بۇزۋشىلىقتىڭ الدىن الۋ جونىندەگى ۆەدومستۆوارالىق كوميسسيانىڭ ءماجىلىسى ءوتتى.
تالقىلانعان ەڭ باستى ماسەلە – ءوڭىر تۇرعىندارىنىڭ قاۋىپسىزدىگىنە قاتىستى احۋال. اتىراۋ وبلىسى قوعامدىق كەڭەسىنىڭ ءتوراعاسى مۇرات وتەشيەۆ حابارلاعانداي، جىل سايىن وبلىستا ادامداردىڭ جوعالۋى جونىندە 50-60 –قا دەيىن جۇگىنۋلەر تىركەلەدى ەكەن.
- ستاتيستيكا بويىنشا، وتكەن جىلى اتىراۋدا جانە جىلىوي، قۇرمانعازى، يندەر اۋداندارىنا ادامداردىڭ جوعالۋى تىركەلگەن. جۇگىنۋشىلەردىڭ باسىم كوپشىلىگى – ۇزاق مەرزىمدى ءىسساپارلارعا شىعاتىنداردىڭ، ماۋسىمدىق جۇمىستارمەن قامتىلعانداردىڭ تۋىسقاندارى،-دەيدى مۇرات وتەشيەۆ. – جاسوسپىرىمدەردىڭ پروبلەماسى تولعاندىرادى. ۇيدەن كەتىپ قالۋدىڭ نەگىزگى سەبەبى – وتباسىلىق پروبلەمالار. بالانىڭ سۇرانىسىن ەسكەرمەۋ - كوبىنەسە ۇيدەن كەتىپ قالۋعا سەبەپ بولادى. بۇل اتا-انامەن ءوزارا تۇسىنىستىك بولماۋىنان تۋىندايدى. جاسوسپىرىمدەردىڭ ۇيدەن كەتىپ قالۋىنا الەۋمەتتىك جەلىلەردىڭ دە اسەرى بار. وسىندا ولار ۆيرتۋالدى دوستارىمەن تانىسىپ، ءبىرى - ءبىرىن ىزدەپ، ۇيدەن كەتىپ قالادى.
كەيبىرەۋلەر ويلاعانداي، جوعالىپ كەتۋدىڭ كوپشىلىگى كريمينالدى جاعدايلارمەن نەمەسە قايعىلى وقيعالارمەن ەمەس، وتباسىنداعى الاۋىزدىقپەن جانە كەلەڭسىز جاعدايلارمەن تۇسىندىرىلەدى. اتىراۋ وبلىسى پوليسيا دەپارتامەنتىنىڭ باستىعى ايان دۇيسەمبايەۆ بۇگىنگى كۇنى 6 ادام جوعالىپ كەتتى دەپ تىركەلىپ، ولارعا ىزدەۋ سالىنىپ جاتقانىن اتاپ ءوتتى.
- بىزگە جوعالىپ كەتۋ ماسەلەسىمەن جىل سايىن 50-گە دەيىن جۇگىنۋشىلەر بولادى. ءبىراق، ءبىز ولاردى تاۋىپ جاتىرمىز. بۇگىندە 6 ادام جوعالىپ كەتتى دەپ ەسەپتەلەدى، - دەگەن تۇسىنىك بەردى وبلىستىق پوليسيانىڭ باستىعى.
كوميسسيا مۇشەلەرى جاس بۋىندى تاربيەلەۋ، قيىن جاعدايعا ۇشىراعان وتباسىلارىنا پسيحولوگيالىق كومەك كورسەتۋ، تۇرمىستاعى زورلىق-زومبىلىق سياقتى پروبلەمالاردى، ايەلدەردى قورعاۋ جانە وتباسى يەلەرىنىڭ بالالارىنىڭ بولاشاعى ءۇشىن جاۋاپكەرشىلىگى ماسەلەلەرىن تالقىلادى.
قاريالار ۇيىندە تۇرىپ جاتقان قارت ادامداردى بەيىمدەۋ پروبلەماسى – ەگجەي-تەگجەيلى زەرتتەۋدى قاجەت ەتەتىن تاقىرىپ. بالالارى وزدەرىنىڭ اتا-انالارىن وسى مەكەمەگە بەرۋىنىڭ سەبەبى نە ؟ بۇگىنگى كۇنى اتىراۋداعى قاريالار ۇيىندە 104 قارت ادام تۇرىپ جاتىر. كوپشىلىگىنىڭ وتباسىلارى بار.
اتىراۋ وبلىسىنىڭ اكىمى نۇرلان نوعايەۆ بۇل الەۋمەتتىك پروبلەمانى بىرلەسىپ شەشۋ قاجەتتىگىن اتاپ ءوتتى. مەملەكەت قارتتاردى قامقورسىز قالدىرمايدى. ءبىراق، اتا-انالارى ءۇشىن بالالارى دا جاۋاپتى بولۋى ءتيىس.
-ەڭ باستىسى، ادامداردىڭ، قوعامنىڭ ساناسىنا وسى پروبلەمالاردى جەتكىزۋ كەرەك. بۇل – ءبىزدىڭ داستۇرىمىزدە جوق، قوعامىمىزدا ەشقاشان بولماعان نارسە. بۇل سىزدەردى ءوسىرىپ، بارىن سىيلاعان اتا-انالارىڭىز. سوندىقتان، ولارعا، الدىمەن سىزدەر جاۋاپتى بولاسىزدار،– دەدى نۇرلان نوعايەۆ.
وبلىس باسشىسى جۇمىسپەن قامتۋدى ۇيلەستىرۋ جانە الەۋمەتتى باعدارلامالار باسقارماسىنىڭ باسشىسى سەرىك حاميدوللاعا اشىق ەسىك كۇندەرىن وتكىزۋدى، وسىنداي ادامداردىڭ بالالارى مەن تۋىسقاندارىن شاقىرىپ، تۇسىنىك جۇمىستارىن جۇرگىزۋدى تاپسىردى. قاريالار ۇيىندە تۇرىپ جاتقانداردىڭ كەيبىرەۋىنىڭ بالالارى تابىستى ءومىر سۇرۋدە، ولاردىڭ اتىنا جىلجىمايىن مۇلىكتەر دە تىركەلگەن. ءبىراق، اينالىپ كەلگەندە، مەملەكەتتەن باسقا قامقورشىسى بولماي وتىر.
- سوڭعى جىلدارى وبلىس اكىمدىگىنىڭ قارجىلىق قولداۋىنىڭ ارقاسىندا پوليسيانىڭ ماتەريالدىق-تەحنيكالىق بازاسى جاقساردى. سونىڭ ىشىندە، بەينەكامەرالاردىڭ ورناتىلۋى ازاماتتاردىڭ قاۋىپسىزدىگى ماسەلەسىن شەشۋگە مۇمكىندىك بەرەدى. بۇگىنگى كۇنگە قۇقىق بۇزۋشىلارعا 1،5 ملرد. تەڭگە ايىپپۇل سالىندى. ونىڭ ىشىندە، 1 ملرد 134 ملن. تەڭگە جەرگىلىكتى بيۋدجەتكە ءتۇستى. قۇقىق قورعاۋ ورگاندارى قىزمەتىن اتقارۋى ءۇشىن 34 پوليسيا بەكەتىنىڭ قۇرىلىسى جوسپارلانعان. ولاردىڭ 22ء-ى سالىندى. تۇتاستاي العاندا، بارلىق پوليسيا ۋچاسكەلەرى قاجەتتى جابدىقپەن جاراقتالعان. 98 اۆتوكولىك الىندى ،– دەدى ا.قايىروۆ.
حالىقتىڭ قاۋىپسىزدىگىن قامتاماسىز ەتۋ ءۇشىن قۇقىق قورعاۋ ورگاندارىن قارجىلاي قولداۋدىڭ ماڭىزدىلىعىن وبلىس اكىمى اتاپ ءوتتى.
جۇزدەگەن ادام قازاعا ۇشىراپ جاتقان جولدارداعى قاۋىپسىزدىك ءبىزدىڭ سانامىزعا دا تاۋەلدى. جۇرگىزۋشىلەردىڭ كولىك ايداۋ مادەنيەتى مەن كاسىبي ماشىقتارى ءماز ەمەس.
- جولاۋشىلار تاسىمالداۋدا 90 جاڭا اۆتوبۋس قىزمەت كورسەتۋدە، بالانسقا الىنعاسىن تاعى 30-ى كوشەلەرگە شىعادى. تاعى 100 اۆتوبۋس ساتىپ الۋ جوسپارىمىزدا بار. بۇنىڭ بارلىعى جولاۋشى تاسىمالىنىڭ ساپاسىن جاقسارتۋ ءۇشىن جاسالىپ جاتىر. بۇل – قالا تۇرعىندارى كوتەرىپ جۇرگەن ماسەلە. بۇل جەردە تۋىندايتىن پروبلەما– كولىكتى جۇرگىزۋ قاۋىپسىزدىگى. جولاۋشىلاردى كوپ جيناپ الامىن دەپ جۇرگىزۋشىلەر جارىسقا ءتۇسىپ جاتادى. بۇنى تاسىمالداۋشى كاسىپورىنداردىڭ باسشىلارى دا، جول پوليسياسى قىزمەتكەرلەرى دە قاداعالاۋى ءتيىس، - دەپ اتاپ ءوتتى وبلىس اكىمى.
جولاۋشىلار كولىگىندە جىلدامدىقتان اسىپ كەتۋ ترەكەرلەرىن ورناتۋ جونىندە ءوڭىر باسشىسى وكىلەتتى ورگاندارعا تاپسىرما بەردى.
- ءبىز ءقازىر تاسىمالداۋشى كومپانيالاردى سۋبسيديالاۋدى جوسپارلاپ وتىرمىز، بۇنى باقىلاۋعا الۋ قاجەت. ەڭ جوعارى جىلدامدىق ساعاتىنا 60 شاقىرىمنان اسپايتىن بولىپ بەلگىلەنسىن. ءبىز تاسىمالداۋشىلاردى ساپالى قىزمەت كورسەتىپ، قاۋىپسىزدىكتى ساقتاۋعا مىندەتتەيمىز، - دەپ باسىپ ايتتى نۇرلان نوعايەۆ.
قوعامدىق قاۋىپسىزدىككە قاتىستى بارلىق ماسەلەلەردى ۆەدومستۆوارالىق كوميسسيانىڭ مۇشەلەرى ۇدايى باقىلاۋدا ۇستايتىن بولادى.