اقوردادا قازاقستان رەسپۋبليكاسى پرەزيدەنتىنىڭ جانىنداعى «رۋحاني جاڭعىرۋ» باعدارلاماسىن ىسكە اسىرۋ جونىندەگى ۇلتتىق كوميسسيا وتىرىسى ءوتتى، دەپ حابارلايدى Qamshy.kz اقپارات اگەنتتىگى

مەملەكەت باسشىسى قاسىم-جومارت توقايەۆتىڭ جارلىعىمەن جاڭارتىلعان ۇلتتىق كوميسسيا قۇرامىنا قازاقستان رەسپۋبليكاسىنىڭ مەملەكەتتىك حاتشىسى مارات ءتاجين جەتەكشىلىك ەتەدى.

كوميسسيا وتىرىسىندا «رۋحاني جاڭعىرۋ» باعدارلاماسى مەن ەلباسىنىڭ «ۇلى دالانىڭ جەتى قىرى» اتتى ماقالاسىنىڭ ىسكە اسىرىلۋ قورىتىندىلارى، سونىمەن قاتار جاڭا جوبالاردى جۇزەگە اسىرۋ جوسپارلارى قارالدى. جيىندى اشقان مەملەكەتتىك حاتشى مارات ءتاجين ەكى جىل ىشىندە قوعامدىق جانە تاريحي سانانى جاڭعىرتۋدى ماقسات ەتكەن اۋقىمدى جۇمىس اتقارىلعانىن اتاپ ءوتتى.

لاتىن گرافيكاسى نەگىزىندەگى قازاق ءالىپبيى بەكىتىلدى. «تۋعان جەر» جوباسى اياسىندا مەسەناتتار قاراجاتىنا 27 مەكتەپ، 115 بالاباقشا، 479 الەۋمەتتىك ينفراقۇرىلىم نىسانى سالىندى.

سونىمەن قاتار، ەل تاريحىندا العاش رەت شەت تىلدەردەن ەكونوميكا، الەۋمەتتانۋ، ساياساتتانۋ، پسيحولوگيا جانە وزگە دە عىلىم سالالارى بويىنشا الەمدەگى 48 ۇزدىك وقۋلىق قازاق تىلىنە اۋدارىلىپ، باسىپ شىعارىلدى. ەلدىڭ گۋمانيتارلىق ءبىلىم قورى 2019 جىلى تاعى 30 كىتاپپەن تولىقپاق.

سونداي-اق بۇۇ-نىڭ نەگىزگى 6 (اعىلشىن، فرانسۋز، يسپان، اراب، جۇڭگو، ورىس) تىلىندە قازاقستان جازۋشىلارى مەن اقىندارىنىڭ پروزا جانە پوەزيا انتولوگيالارى باسپاعا ازىرلەنىپ، وسى جىلى جارىق كورەتىن بولادى.

ۇسىنعان: اسەل بولات قىزى