بەلگىلى ونەرتانۋشى، قازاقستان جۋرناليستەر وداعىنىڭ مۇشەسى، ب.مايلين اتىنداعى قوعامدىق قوردىڭ اتقارۋشى ديرەكتورى جۇمابەك تابىن دۇنيەدەن وزدى. الەۋمەتتىك جەلىدەگى ۇزەڭگىلەستەرى حالىق ۇلىنىڭ ومىردەن وتكەنىنە قايعىرىپ، كوڭىل ايتۋدا.
"جارقىن اعانىڭ ارتىنان جۇمابەك تابىن اعام دا انا دۇنيەگە اتتانىپ كەتىپتى . بەيىمبەتتىڭ ءسوزى، احاڭنىڭ كوزىندەي اڭقىلداپ جۇرگەن اعامىز ەدى. اللا پاناسىنا العاي!" - دەپ كوڭىل ءبىلدىردى سەرىكبول حاسان.
ولەڭىنە ارقاۋ بولىپ، توبەسىن بۇلت شالعاندا جانىنان تابىلعان ازاماتتىڭ ەرلىگىن ايتىسىپ جاتقان قولدانۋشىلار قانشاما.
"مارقۇم اقىن تەمىرشە سارىبايەۆ كوكەمىزدىڭ قازاسىنا كوڭىل ايتا بارعاندا جۇمابەك تابىن اعامىزبەن ءتۇننىڭ ءبىر ۋاعىنا دەيىن ءتۇرلى تاقىرىپتاردا سىرلاسىپ، سويلەسىپ ەدىك. ادامدى جاتسىنباي بىردەن وزىنە باۋراپ الاتىن قاسيەتى ەرەكشە ەسىمدە قالىپتى. "مۇحتارجان، بيىل ساكەن يماناسوۆ اعام مەن تەمىرشە اعام قاتار كەتىپ قالىپ، كوكىرەگىم قارس ايرىلىپ وتىر. قارا جەرگە قيمايتىن اسىلدارىم ەدى، قايتەيىن، " -دەپ تومەن قاراعاندا، ول كىسىنىڭ ەكى يىعىنىڭ دارمەنسىز سەلكىلدەپ وتىرعانىن بايقادىم. ادامدى جىلاتاتىن ادامنىڭ ءقادىرى ەكەن عوي، ايتپەسە كىم وتپەي جاتىر بۇل بەيوپا جالعاننان؟! سول جۇماعامىزدىڭ ءوزى دە بۇگىن باقي ساپارىنا اتتانىپ كەتىپتى. اللا الدىنان جارىلقاسىن! "جامان ادام وتسە، دۇنيە كەڭىپ قالعانداي، جاقسى ادام وتسە، دۇنيە كەمىپ قالعانداي بولادى" دەۋشى ەدى ۇلكەندەر، قازاق رۋحانياتىنىڭ ءبىر ءبۇيىرىن سولق ەتكىزگەن قازا بولدى، اقىرى حايىرلى بولعاي!" - دەپ پىكىر جازدى بەلگىلى ايتىسكەر مۇحتار نيازوۆ ءوز پاراقشاسىندا.
ۇلتتىڭ ۇلى ۇمىتىلمايدى. ەل ءۇشىن جاساعان ءاربىر ءىسى ازاماتتىڭ ابىرويىن اسقاقتاتىپ تۇرا بەرمەك.
