ۋكراينانىڭ جاڭا پرەزيدەنتى ۆلاديمير زەلەنسكييدىڭ رەسەي كوشباسشىسى ۆلاديمير پۋتينمەن مۇمكىن كەلىسسوزدەرىن اقش بيلىگى قوس قولىن كوتەرە قولدايدى.
بۇل تۋرالى اقش-تىڭ ۋكراينا ءىسى جونىندەگى مەملەكەتتىك دەپارتامەنتىنىڭ وكىلى كۋرت ۆولكەر امەريكالىق تەلەارنالاردىڭ بىرىندەگى تىكەلەي ەفيردە مالىمدەدى.
ۆولكەر زەلەنسكييدىڭ ساياسي پوزيسياسىن قولدايتىنىن، ونىڭ ۋكراينانىڭ ترريتوريالىق تۇتاستىعىن ساقتاۋ، قىرىمدى، دونباسستىڭ ءبىرقاتار جەرلەرىن قايتارۋ تۋراسىنداعى قۇلشىنىستارىنىڭ دۇرىس ەكەندىگىن جەتكىزدى.
"ونىڭ مالىمدەمەلەرىندە ايتىلعان، كوتەرىلگەن ماسەلەلەر وتە ورىندى جانە وتە دۇرىس. ول ۋكراينانىڭ تەرريتوريالىق تۇتاستىعىن قايتارۋدى قالايدى. ول جەردى ءوز قاراماعىنا قايتا ورالتپاق. زەلەنسكيي العان بەتىنەن قايتۋدى ويلامايتىن دا سەكىلدى. رەسەي مەن ۋكراينا تىكەلەي كەلىسسوزدەر جاساۋى ءتيىس. زەلەنسكييدىڭ پۋتينمەن تىكەلەي سويلەسۋى – جامان شەشىم ەمەس"، - دەدى ول.
امەريكالىق وكىل ورىن الۋى مۇمكىن تاماشا پەرسپەكتيۆالار تۋرالى ايتتى. سونىمەن قاتار، ۆولكەردىڭ ويىنشا، رەسەيدىڭ كەلىسسوزدەردەگى تارتىپ الىنعان ۋكراينالىق تەرريتوريالار تۇرعىسىنداعى پوزيسياسىنىڭ ماڭىزدى ەكەنىن اتادى.
"ول جاڭا پرەزيدەنت بولعاننان كەيىن وزگەشە ساياسات ۇستانۋى ءتيىس. ەڭ ءبىرىنشى قادام رەتىندە رەسەيدىڭ وككۋپاسيالانعان ايماقتار جونىندەگى كوزقاراسىن، پوزيسياسىن وزگەرتۋگە تالپىنىس جاساۋ بولۋى كەرەك"، - دەدى امەريكالىق وكىل.
ەسكە سالا كەتەيىك، ءبىرشاما ۋاقىت بۇرىن ءپۋتيننىڭ كەڭەسشىلەرىنىڭ ءبىرى ۋكرايناداعى سايلاۋعا قاتىستى رەسەي پرەزيدەنتىنىڭ پوزيسياسى تۋرالى ايتقان بولاتىن.
پۋتين مەدۆەدچۋكتىڭ اۋزىمەن ايتىلعان مالىمدەمەسىندە ۋكراينا حالقى كىمدى مەملەكەت باسشىسى رەتىندە تاڭداسا دا، سول اداممەن جۇمىس جاساۋعا تالپىناتىنىن ايتقان-دى.
