الماتى قالاسىندا "Adil sailay ushin" اتتى پىكىر سايىس ءوتتى دەپ جازادى Qamshy.kz اقپارات اگەنتتىگى. اتالمىش شاراعا قوعام بەلسەندىلەرى مەن زاڭگەرلەر قاتىستى. تالقىلاۋدىڭ باسىم بولىگى الداعى وتەتىن سايلاۋعا قاتىستى زاڭ تۋرالى بولدى. 

العاشقىلاردىڭ ءبىرى بولىپ ءسوز سويلەگەن ديماش ءالجانوۆ 1991 جىلدان بەرى سايلاۋ زاڭناماسى تاۋەلسىز كانديداتتارعا ورىن قالدىرماي، ۇنەمى كۇشەيىپ كەلە جاتقانىن تولىق سيپاتتادى. پىكىرسايىس وتە قىزۋ ءوتتى. قاتىسۋشىلار بەلسەندى تۇردە سۇراق قويدى. الايدا ۋاقىت شەكتەۋلى بولعاندىقتان بارلىق سۇراقتارعا جاۋاپ بەرىلمەدى. 

پىكىر سايىس بارىسىندا "پرەزيدەنتتىككە ۇمىتكەر قانداي بولۋى ءتيىس، قازاقستاندىقتار سايلاۋ كەزىندە ءوز قۇقىعىن قالاي قورعاۋى كەرەك، قانداي زاڭداردى باسشىلىققا الىپ ءوز ويىڭدى اشىق ايتۋعا بولادى" دەگەن سۇراقتارعا جاۋاپ بەرىلدى. 

دوسىم ساتپايەۆ پىكىر سايىس اياقتالعاننان كەيىن جۋرناليستەردىڭ سۇراقتارىنا جاۋاپ بەردى. ول "قازىرگى قازاقستانداعى جاعداي رەسەيدەگى سەنارييگە ۇقسايدى دەگەن پىكىرمەن كەلىسەسىز بە؟" دەگەن سۇراققا بىلاي دەپ جاۋاپ بەردى: 

— ءيا، ەسكە تۇسىرەتىن، ۇقسايتىن كەي تۇستارى بار. ءبىراق قازىرگى بولىپ جاتقان جايت بيلىكتەگىلەردىڭ  قورقىنىشىنىڭ كورىنىسى. ءتىپتى ەلباسى ءوزىنىڭ مۇراگەرلەرىنە سەنبەيدى. ال داريعا نازاربايەۆانى سەنات سپيكەرى ەتىپ تاعايىنداۋىن ءوز باسىم قىرعىزستانداعى جايتتارعا ۇقساتامىن. اتامبايەۆتىڭ سوورونباي جيەنبەكوۆتى پرەزيدەنتتىككە ءوزى ۇسىنعانى ەستەرىڭىزدە بولار. وعان بەلسەندى تۇردە كومەك كورسەتتى، قولداۋ ءبىلدىردى. ال ءقازىر قىرعىزستاندا بەلگىلى ءبىر دەڭگەيدە الاۋىزدىق تۋىنداعانىن بايقايمىز. اتامبايەۆ پەن جيەنبەكوۆ بىر-بىرىنە قارسى شىعا باستادى. ال ءبىزدىڭ ەلگە كەلەتىن بولساق، نازاربايەۆ توقايەۆقا قانشا جەردەن قولداۋ بىلدىرگەنىمەن، داريعا نازاربايەۆانى سەنات سپيكەرى ەتىپ تاعايىنداۋ ارقىلى بەلگىلى ءبىر ءقاۋىپتىڭ الدىن الىپ وتىر. ەلباسىنىڭ بۇل شەشىمى ارقىلى ءبىز ونىڭ توقايەۆقا تولىقتاي سەنىم ارتا الماعانىن بايقاي الامىز. ال رەسەيدەگى جايت پەن ءبىزدىڭ ەلدەگى جاعدايدىڭ كەيبىر ايىرماشىلىقتارى بار. بىرىنشىدەن، پۋتين حالىقتىڭ ليدەرى ەمەس. ءتىپتى ونىڭ نازاربايەۆ سەكىلدى مۇمكىندىگى مەن وكىلەتتىلىگى دە جوق. رەسەيدە رەسمي تۇردە مەدۆەديەۆ جەڭىسكە جەتكەن سايلاۋ ءوتتى. دەگەنمەن رەسەي ءبىزدىڭ ەلدەگى وزگەرىستەردى باقىلاپ وتىر دەپ ويلايمىن. كەرىسىنشە رەسەي ءبىزدىڭ ساياسي جاعدايدى قايتالاۋى مۇمكىن. سەبەبى نازاربايەۆ كەتكەننەن كەيىن رەسەيلىك باسىلىمدار مەن ەكسپەرتتەر "پۋتين نازاربايەۆتىڭ ارەكەتىن قايتالاي ما؟" دەگەن سۇراقتى قىزۋ تالقىلاعان بولاتىن. 

سونداي-اق تانىمال ساياساتتانۋشى دوسىم ساتپايەۆ بيلىكتىڭ حالىققا تاڭداۋ جاساۋعا مۇمكىندىك بەرمەگەنىن ايتتى. 

— حالىق كانديداتتاردىڭ ءتىزىمىن كورىپ-اق سايلاۋعا قاتىسقىسى كەلمەي قالادى. قازىرگى كانديداتتاردىڭ ءتىزىمىن كورىپ سوۆەتتىك كەزەڭدەگى اسحانا ەسىمە تۇسەدى. بۇرىن سوۆەتتىك كەزەڭدەگى اسحانادا تاڭداۋ مۇلدەم جوق بولاتىن. قازىرگى سايلاۋ دا سول سەكىلدى. سونىمەن بىرگە سايلاۋعا جۇمسالعان قاراجاتتار بىزدىكى ەكەنىن دە ۇمىتپاعان ءجون. سەبەبى سايلاۋ سالىق تولەۋشىلەردىڭ قاراجاتىنان وتكىزىلەتىن بولادى. بيلىك سايلاۋعا وسىنداي قاراجات ءبولىپ جاتىرمىز دەپ ايتادى. ءبىراق بۇل ءبىزدىڭ اقشامىز عوي، - دەيدى دوسىم ساتپايەۆ. 

دوسىم ساتپايەۆتىڭ ايتۋىنشا، بيىلعى سايلاۋدا ەشقانداي ينتريگا جوق. 

— ەشقانداي ينتريگا جوق. نە سەبەپتى زەلەنسكيي 70 پايىزبەن جەڭىسكە جەتتى؟ سەبەبى ينتريگا بولدى. ستاديوندا دەبات ۇيىمداستىرىلدى. كەزىندە پوروشەنكوعا داۋىس بەرىپ، كوڭىلى قالعاندار زەلەنسكييگە داۋىس بەردى. سونداي-اق دونالد ترامپتىڭ جەڭىسكە جەتۋىنىڭ سەبەبى دە سول ينتريگا ەدى. سوڭعى جىلدارداعى قىرعىزستاننىڭ سايلاۋىندا دا بەلگىلى ءبىر دەڭگەيە ينتريگا بولدى. حالىق ناقتى كىمنىڭ جەڭىسكە جەتەتىنىن بىلمەدى. ال بىزدە سايلاۋدا كىم جەڭەتىنى بەلگىلى. بارلىق پروبلەما وسىندا بولىپ تۇر، - دەپ پىكىر ءبىلدىردى ساياساتتانۋشى.  

سونداي-اق ول توقايەۆتىڭ باسقا كانديداتتاردان ايىرماشىلىعى جوق دەپ ەسەپتەيدى. 

— بارلىعى بىردەي. ەشقانداي ايىرماشىلىعى جوق. سەبەبى ولار ءبىر جۇيەنىڭ كانديداتتارى. ولار ءبىر جۇيەدە جۇمىس ىستەگەن. ال حالىق ەڭ بولماسا ءبىر نارسەنىڭ وزگەرگەنىن قالايدى. سول سەبەپتى دە ءوز ويىن، ءوز پوزيسياسىن اشىق ايتۋعا تىرىسادى. مەنىڭشە جاقىن ارادا بيلىكتە وزگەرىس ورىن الادى. بۇل باسقا ساياساتكەرلەر ايتقانداي 10-15 جىل ۋاقىت المايدى. ءبىراق قازىرگى بيلىك ەشتەڭەنى وزگەرتپەيدى. بارلىعى بيلىك ءترانزيتى دەپ ايتىپ ءجۇر عوي. ءبىراق مەن ءۇشىن ەلباسى ساياساتتان تۇبەگەيلى كەتكەندە عانا بيلىك ءترانزيتى باستالادى. ولار حالىقپەن بەتپە-بەت قالعان كەزدە عانا بۇرىنعى جۇيە ىستەن شىعادى، - دەيدى دوسىم ساتپايەۆ.