2019 جىلعى 23 ساۋىردە قازاقستان رەسپۋبليكاسى ورتالىق سايلاۋ كوميسسياسىندا قاسىم-جومارت كەمەل ۇلى توقايەۆتىڭ مەملەكەتتىك ءتىلدى ەركىن مەڭگەرگەندىگىن انىقتاۋ جونىندەگى لينگۆيستيكالىق كوميسسيانىڭ وتىرىسى ءوتتى دەپ جازادى Qamshy.kz اقپارات اگەنتتىگى ورتالىق سايلاۋ كوميسسياسىنىڭ رەسمي سايتىنىڭ دەرەگىن نەگىزگە الىپ. 

لينگۆيستيكالىق ەمتيحان بارلىق ءۇش كەزەڭدە بويىنشا ءوتتى: تاقىرىپ بويىنشا جازباشا تاپسىرما جازۋ، ءماتىن وقۋ جانە لينگۆيستيكالىق كوميسسيا بەرگەن تاقىرىپقا كوپشىلىك الدىندا كەمىندە ون بەس مينۋت ءسوز سويلەۋ. ەمتيحان تاپسىرىلعاننان كەيىن لينگۆيستيكالىق كوميسسيا تالقىلاۋ وتكىزىپ، قورىتىندىلادى.

كوميسسيا جۇمىسى اشىق جانە جاريالى تۇردە جۇزەگە اسىرىلدى، ال بۇقارالىق اقپارات قۇرالدارى شەشىم قابىلداۋ پروسەسىن بايقاۋعا مۇمكىندىك الدى. وتىرىسقا ورتالىق سايلاۋ كوميسسياسىنىڭ مۇشەسى سۇلەيمەن ءلاززات جاڭىلىس قىزى قاتىستى.

جازباشا جۇمىستىڭ تاقىرىبى "اباي قۇنانباي ۇلىنىڭ پوەزياسى مەن قارا سوزدەرى" بولدى. جازباشا جۇمىسىنىڭ مازمۇنىندا اباي شىعارمالارى مەن ەڭبەكتەرىن تەرەڭ بىلەتىنى بايقالدى. جازباشا جۇمىس مازمۇنى، ءستيلى، ەملەسى، تىنىس بەلگىلەرى بويىنشا باعالاندى. جازباشا جۇمىستىڭ تاقىرىبى تولىعىمەن اشىلعان.

ەكىنشى تاپسىرما بويىنشا ۇمىتكەر جازۋشى شەرحان مۇرتازانىڭ "مىڭبۇلاق" كىتابىنان ءۇزىندىنى ەموسيونالدى تۇردە، مانەرلەپ، داۋىستاپ وقىپ شىقتى.

ءۇشىنشى تاپسىرما بويىنشا پرەزيدەنتكە ۇمىتكەر "قازىرگى قازاقستاننىڭ گەوساياساتى" تاقىرىبى بويىنشا ءوز ويىن 15 مينۋتتا اۋىزشا ايتىپ بەردى. ويىن قازاقشا ەركىن جەتكىزدى، سويلەم قۇراۋى دۇرىس.

ەمتيحان قورىتىندىسى بويىنشا لينگۆيستيكالىق كوميسسيا قازاقستان رەسپۋبليكاسىنىڭ پرەزيدەنتتىگىنە ۇمىتكەر قاسىم-جومارت كەمەل ۇلى توقايەۆتىڭ مەملەكەتتىك ءتىلدى ەركىن مەڭگەرگەندىگى تۋرالى اشىق داۋىسپەن شەشىم قابىلدادى.

ۇسىنعان: اسەل بولات قىزى