ءماجىلىس ءتوراعاسى نۇرلان نىعماتۋلين مادەنيەت جانە سپورت مينيسترلىگىنە "تازا" سپورت ءۇشىن كۇرەس ماسەلەسىندە بوس ءسوزدى دوعارىپ، ناقتى ىسكە كوشۋدى تاپسىردى، دەپ حابارلايدى Qamshy.kz اقپارات اگەنتتىگى Sputnik قازاقستاننىڭ دەرەگىنە سۇيەنىپ.

بۇگىن ءماجىلىستىڭ جالپى وتىرىسىندا اكىمشىلىك قۇقىق بۇزۋشىلىق تۋرالى كودەكسكە وزگەرىستەر مەن تولىقتىرۋلار ەنگىزۋ تۋرالى زاڭ جوباسى قارالدى.

سپورتتاعى دوپينگ ماسەلەسى

Cۇراق-جاۋاپ بارىسىندا دەپۋتات زاۋرەش امانجولوۆا مادەنيەت جانە سپورت مينيسترلىگىنىڭ وكىلى مەن زاڭ جوباسى بويىنشا بايانداما جاساعان ادىلەت ءمينيسترى مارات بەكەتايەۆقا سۇراق قويدى. دەپۋتاتتىڭ ايتۋىنشا، بۇگىندە بۇكىل الەم سپورتتاعى دوپينگ، جارىستىڭ تىيىم سالىنعان تۇرلەرى، الدىن الا كەلىسىلگەن ماچتارمەن كۇرەسۋدە.

"جاقىندا پارلامەنت ۇكىمەت ەنگىزگەن دەنە شىنىقتىرۋ جانە سپورت تۋرالى زاڭ جوباسىن قارادى. بۇل قۇجات "تازا" سپورت پەن "تازا" جەڭىسكە جول اشادى. وندا سپورتشىلاردىڭ، باپكەرلەر مەن ۇيىمداستىرۋشىلاردىڭ جاۋاپكەرشىلىگىن كۇشەيتەتىن تۇزەتۋلەر قاراستىرىلعان. الايدا ءبىز بۇگىن قاراپ جاتقان زاڭ جوباسىندا سپورتشىلار جانە جارىس ۇيىمداستىرۋشىلارىن اقشاعا ساتىپ العانى ءۇشىن سالىناتىن ايىپپۇل سوماسىن 200-دەن 100 اەك-كە دەيىن تومەندەتۋ قاراستىرىلىپ وتىر جانە وسى زاڭ بۇزۋشىلىق ءۇشىن اكىمشىلىك قاماۋعا الۋدى الىپ تاستاۋ كوزدەلگەن"، - دەدى امانجولوۆا.

بۇعان قوسا، دەپۋتاتتىڭ ايتۋىنشا، زاڭ جوباسى زاڭسىز سىياقى بەرگەن ادامنىڭ جازاسىن جەڭىلدەتۋدى كوزدەيدى.

"وسىعان بايلانىستى، مەندە مىناداي سۇراق: كودەكستىڭ 174-بابىنىڭ قازىرگى رەداكسياسىن ساقتاۋ قاجەت دەپ ويلامايسىزدار ما؟"، - دەدى ول.

ادىلەت ءمينيسترى مارات بەكەتايەۆ بۇل تۇزەتۋدىڭ اسىعىستىقپەن جاسالعانىن ايتتى. مينيستر دەپۋتاتتىڭ اتالعان رەداكسيانى ساقتاۋ كەرەك دەگەن ۇسىنىسىمەن كەلىستى.

بۇل تۇزەتۋدى مادەنيەت جانە سپورت مينيسترلىگى ەنگىزگەن ەكەن.

سپورت ۆيسە-مينيسترىنىڭ پىكىرى

مادەنيەت جانە سپورت ۆيسە-مينيسترى ەرلان قوجاعاپانوۆ كەزىندە سپورت فەدەراسياسىن باسقارعان ادام رەتىندە سپورتتاعى دوپينگ پروبلەماسىمەن جاقسى تانىس ەكەنىن اتاپ ءوتتى.

"ارينە، ءبىز قولدانىستاعى كودەكستىڭ نورماسىنىڭ ساقتالعانىن قولدايمىز. مەن ءوز تاراپىمنان ايتارىم: ءبىز مينيسترلىكتە بۇل ماسەلەنى تالقىلاپ، بۇل تۇزەتۋدى كىم ەنگىزگەنىن انىقتاپ، جاۋاپقا تارتامىز. وسى ورايدا وسىنداي ولقىلىقتى تاپقان دەپۋتاتتارعا العىس ايتقىم كەلەدى. ءبىز جانكۇيەرلەر الدىندا بەتىمىز قىزارىپ، ۇيالمايتىن بولامىز. بۇل نورمانى، ءتىپتى، قىلمىستىق جاۋاپكەرشىلىككە دەيىن قاتاڭداتۋعا بولادى"، - دەدى ۆيسە-مينيستر.

نىعماتۋلين ۆيسە-مينسترگە نەگە شۇيلىكتى؟

پىكىرىن اياقاستى وزگەرتكەن ۆيسە-مينيستر نىعماتۋلينگە جاقپاي قالدى. ءماجىلىس ءتوراعاسى، ءتىپتى، مادەنيەت جانە سپورت مينيسترلىگىنىڭ جازانى كۇشەيتۋ تۋرالى وزگەرىستى جۇمىس توبىنا قاشان ەنگىزگەنىن دە ايتىپ بەردى.

"مىنا حات، جۇمىس توبىنا كەشە عانا تۇسكەن. وندا ءسىزدىڭ مينيسترلىك جاۋاپكەرشىلىكتى قاماۋعا الۋ تۇرىندەگى جازاعا دەيىن كۇشەيتۋدى كورسەتكەن. وسى زالدا مادەنيەت جانە سپورت مينيسترلىگىنىڭ سپورت تۋرالى زاڭ جوباسىن تالقىلاعانىمىزعا ءبىر اي دا بولعان جوق. مەن سول كەزدە بوس سوزدەن ناقتى ىسكە كوشۋ كەرەكتىگىن ايتقان ەدىم. الايدا، وكىنىشكە قاراي، ەش وزگەرىس جوق. ءبىر اي بۇرىن قاتاڭداتۋ كەرەك دەسەڭىزدەر، ەندى كەلىپ، جازانى جەڭىلدەتۋدى سۇراپ وتىرسىزدار. "تازا" سپورت ءۇشىن كۇرەسكەندەرىڭىزدىڭ ءتۇرى وسى ما؟ بەتىمىز قىزارىپ، ۇيالمايتىن بولامىز دەيسىز. ءدال ءقازىر وسىنداي شالا جۇمىس ءۇشىن ۇيالۋىڭىز كەرەك"، - دەدى سپيكەر.

ۆيسە-مينيستر ءنىعماتۋلينىڭ ايتقاندارىمەن ءسوزسىز كەلىستى.

"بوس ءسوزدى قويىپ، ىسكە كوشىڭدەر"، - دەپ تاپسىردى نىعماتۋلين.

ۇسىنعان: نازەركە لابيحان