تالعات ەرعالييەۆ «اق جول» پارتياسىنىڭ ءبىراۋىزدان سايلانعان كانديداتى دانيا ەسپايەۆاعا قولداۋ ءبىلدىرىپ، ءوزىنىڭ پرەزيدەنتتىك سايلاۋعا قاتىسۋ تۋرالى ءوتىنىشىن قايتارىپ الدى دەپ جازادى Qamshy.kz اقپارات اگەنتتىگى "اق جول" قدپ باسپا ءسوز قىزمەتىنىڭ دەرەگىن نەگىزگە الىپ. 

"اق جول" دەموكراتيالىق پارتياسىنىڭ ءتوراعاسى ازات پەرۋاشيەۆ قازاقستاننىڭ قۇرىلىسشىلار وداعىنىڭ اتىنان پرەزيدەنتتىككە كانديدات رەتىندە ءوزىن ۇسىنۋ تۋرالى ءوتىنىش بەرۋ مالىمدەمەسىنە بايلانىستى پارتيانىڭ مۇشەسى تالعات ەرعالييەۆپەن كەزدەستى. بەلگىلى بولعانداي، جۋىردا عانا وتكەن پارتيانىڭ سەزىندە التى ۇمىتكەر بويىنشا قۇپيا سايلاۋ وتكەن بولاتىن. وندا قۇرىلىسشىلار وداعىنىڭ جەتەكشىسى 31،6% داۋىسقا يە بولىپ، ەكىنشى ورىن العان.

ازات پەرۋاشيەۆ ءوز كانديداتۋراسىن ۇسىنعان كەز-كەلگەن ازامات سەكىلدى تالعات ەرعالييەۆتىڭ قۇقىعىنا دا قۇرمەتپەن قارايتىنىن ءتۇسىندىردى. ونىڭ ۇستىنە، مۇنداي قادام جاساۋىنا تۇرتكى بولعانى ونىڭ پارتيالىق داۋىس بەرۋ كەزىندە جوعارى ناتيجەگە قول جەتكىزگەنى ەكەنى ونسىز دا تۇسىنىكتى. الايدا، ول "پرايمەريزدىڭ" التى قاتىسۋشىلارىنا پارتيانىڭ ءبىراۋىزدان سايلانعان ۇمىتكەرى دانيا ەسپايەۆانىڭ كومانداسىنا قوسىلۋ تۋرالى قۇرىلتايدىڭ شەشىمى جونىندە ەسكە سالىپ ءوتتى.

ءوز كەزەگىندە، ت. ەرعالييەۆ سەزدىڭ سايلاۋ قورىتىندىسىنا قاتىستى ەشبىر ءمىنى جوق ەكەنىن حابارلادى. ول ق ر قۇرىلىسشىلار وداعىنىڭ اتىنان ۇمىتكەرلىككە ءوزىن ۇسىنۋىن دۇرىس دەپ سانايدى. ويتكەنى، بۇل ۇيىمدى بۇرىننان باسقارىپ كەلە جاتقاندىقتان، اتالمىش سالاداعى وتكىر ماسەلەلەردى جانە تۇرعىنداردىڭ قولجەتىمدى باسپاناعا دەگەن مۇقتاجدىعىن ەگجەي-تەگجەيلى بىلەدى. بۇل تۇيتكىلدى ماسەلەلەرگە مەملەكەتتىك دەڭگەيدە ءتيىستى نازار اۋدارىلىپ جاتقان جوق دەپ پايىمدايدى.

سونداي-اق، ول ءبىر عانا پارتيانىڭ اتىنان بىردەن ءۇش پارتيا مۇشەسىنىڭ ءار ءتۇرلى قوعامدىق بىرلەستىكتەردىڭ اتىنان  سايلاۋعا كانديداتتىققا ۇسىنىلعانى جونىندە مىسالدار كەلتىرىپ ءوتتى.

سوعان قاراماستان، «اق جول» پارتياسىنا دەگەن ءوزىنىڭ سىي-قۇرمەتىن ءبىلدىرىپ، پارتيا توراعاسىمەن اڭگىمەلەسكەننەن كەيىن تالعات ەرعالييەۆ ورتالىق سايلاۋ كوميسسياسىنان ءوزىنىڭ ءوتىنىشىن قايتارىپ الۋعا نيەتتى ەكەنىن جانە دانيا ەسپايەۆانىڭ سايلاۋالدى ناۋقانىنا قاتىسۋعا ءازىر ەكەنىن مالىمدەدى.

ازات پەرۋاشيەۆ ق ر قۇرىلىسشىلار وداعىنىڭ ءتوراعاسىنا تىلەكتەستىگى مەن ەر-ازاماتقا ءتان ارەكەتى ءۇشىن ءوز العىسىن ءبىلدىردى.

ۇسىنعان: اسەل بولات قىزى