2012  جىلدان باستاپ ەلىمىزدە ەرىكتىلەردەن قۇرالعان «28 ىلمەك» كلۋبى جۇمىس ىستەيدى. كلۋبتىڭ ماقساتى – شالا تۋعان سابيلەردى ومىرگە بەيىمدەۋ ءۇشىن توقىما بۇيىمدارمەن قامتاماسىز ەتۋ.

نەگىزىندە 500-2000 گر، ياعني، 2 كگ دەيىنگى بالالار شالا تۋعان دەپ ەسەپتەلىنەدى .رەسمي دەرەكتەرگە سۇيەنسەك، ەلىمىزدە جىل سايىن جارىققا كەلەتىن سابيلەردىڭ 4-12 پايىزى مەرزىمىنەن بۇرىن دۇنيەگە كەلەدى ەكەن.

شالا تۋعان سابيلەر ءۇشىن جۇننەن دايىندالعان توقىما بۇيىمدار قولدانىلادى. مۇنداي سابيلەردىڭ تىنىس الۋ ورتالىعى دۇرىس جۇمىس جاسامايدى، سوندىقتان، ولار ۇزاق ۇيىقتاپ كەتەدى. سول كەزدە اتالمىش بۇيىمدار نارەستەنىڭ دەنەسىنە اسەر ەتىپ، قوزعالىسقا بەيىمدەپ تۇرادى.كوبىنەسە باس كيىم، شۇلىق جانە كەۋدەشە پايدالانىلادى ەكەن. سەبەبى، جاڭا تۋعان ءسابيدىڭ باسىنداعى جىلۋ تەز جوعالادى جانە اياعى مەن قولدارىنىڭ ۇشىنا كەلگەندە قان اينالىمى سالقىنداپ، جۇرمەي قالادى.

17 قاراشادا الەم بويىنشا حالىقارالىق شالا تۋعان بالالار كۇنى اتاپ وتىلەدى.

جۋرناليست، بلوگەر، PR مامانى، الماتى قالاسىنداعى "28 ىلمەك" كلۋبىنىڭ جەتەكشىسى – عازيزا ۇزاقتان سۇحبات العان ەدىك. ەندەشە، مارحابات.

– عازيزا، اتالمىش كلۋبقا قاشاننان بەرى مۇشەسىز؟ كلۋب اۆتورى كىم، نەگە «28 ىلمەك»؟ بۇل كلۋبقا قالاي كەلدىڭىز؟

–  كلۋب اۆتورى جۋرناليست، فوتوگراف – كارلا نۋر. اتاۋىنا كەلسەك، ءبىز شالا تۋعان سابيگە ارنالعان شۇلىق توقۋ ءۇشىن الدىمەن 28 ىلمەك تەرىپ الامىز. بارلىعى 28 ىلمەكتەن باستالادى. كلۋب العاشقىدا ءوز جۇمىسىن باستاعان كەزدە تەك شۇلىق توقىعان ەدىك. سول سەبەپتەن اتاۋى 28 ىلمەك بولىپ كەتتى.

«28 ىلمەك» كلۋبى جايلى العاش رەت 2012 جىلى، ياعني كلۋب ءوز ءىسىن باستاعان كەزدە ەستىدىم. ءبىراق، بۇل كلۋب جايلى اسا كوپ بىلە بەرمەيتىن ەدىم. سەبەبى، كلۋب قىزمەتى، ماقساتى، جالپى اقپاراتى جايلى كوپ ايتىلا بەرمەيتىن. ول كەزدە كلۋب قىزمەتى دە باسقاشا ەدى. كلۋب مۇشەلەرى از ەدى، اندا-ساندا عانا جينالاتىن. اراعا 1،5 جىل سالىپ، كلۋبقا قوسىلدىم. بالا كەزدەن ناعاشى اپامنىڭ ۇرشىق ءيىرىپ، ءجۇن ءتۇتىپ، انامنىڭ نەشە ءتۇرلى كيىمدەردى توقيتىنىن كورىپ وسكەندىكتەن بولار، مەن دە كىشكەنتاي كۇنىمنەن باستاپ توقيمىن. توقۋ – وتە جاقسى ەرمەك. سۇيىكتى ىسىڭمەن اينالىسىپ قانا قويماي، قوعامعا پايداڭدى تيگىزىپ جاتساڭ، جاقسى ەمەس پە؟! ءقازىر كلۋب مۇشەلەرىنىڭ سانى ارتتى، اۋماعى دا كەڭەيدى. قازاقستاننىڭ 15 قالاسىنان وزگە كلۋب قىرعىزستان، وزبەكىستان، ازەربايجان، ۋكراينا، لاتۆيا، رەسەي سەكىلدى مەملەكەتتەرىندە ءوز قىزمەتىن اتقارىپ كەلەدى. 100 پايىز تازا ءجۇن جىبىنەن توقىلعان بۇيىمدار شالا تۋعان سابيلەرگە جىلۋلىق سىيلايدى، تەزىرەك شيراپ، سالماق قوسۋىنا، قان اينالىمىنىڭ دۇرىس بولۋىنا ىقپال ەتەدى.

–سىزدەر توقيتىن كيىمدەردىڭ «سيقىرى» قانداي؟

– بۇرىندارى اتام قازاق شالا تۋعان بالالاردى تىماققا سالىپ وسىرگەن. ءبىز بولساق، تازا ءجۇن توقىما جىپتەرىن توقيمىز. ەففەكت بىردەي. جىلۋلىق سىيلايدى، قان اينالىم جاقسارتادى، بالانىڭ تىنىس الۋى مەن تەزىرەك سالماق قوسۋىنا ىقپال ەتەدى

ءبىز توقىعان بۇيىمدار شالا تۋىلعان ءسابيدىڭ العاشقى كيىمدەرى دەسەك ارتىق ايتقانىمىز ەمەس. سەبەبى، مەرزىمىنەن بۇرىن دۇنيە ەسىگىن اشقان سابيلەرگە كيىم جوقتىڭ قاسى. جاڭا تۋعان سابيلەرگە ارنالعان كيىمنىڭ ءوزى ولارعا ۇلكەن. مىسالى، شالا تۋعان بالانىڭ باسى ۇلكەن ادامنىڭ جۇدىرىعىمەن، ال اياعى بارماعىمەن بىردەي. بويى نە ءبارى 35-40 سم بولادى.

– كلۋب مۇشەلەرى اي سايىن جينالىپ تۇرا ما الدە ناقتى كەستە، جوسپار بار ما؟ كلۋبتا ەر ادامدار بار ما؟

– ءار قالادا كلۋب قىزمەت ءارقالاي جۇرگىزىلەدى. كەيبىر قالالاردا كلۋب مۇشەلەرى ءار اپتا سايىن جينالسا، كەيبىرەۋلەرى ءار اي سايىن نەمەسە ءار 2-3 سايىن كەزدەسەدى. مىسالى، مەن ءوز توبىمداعى قىزدارمەن 1-2 اي سايىن كەزدەسەمىز. سەبەبى، اركىمنىڭ ءوز جۇمىسى، قىزمەتى، شارۋاسى بار دەگەندەي. ءبىز كوبىنە بوس ۋاقىتىمىزدا توقيمىز. توقىلعان بۇيىمداردى جيناپ، پەريناتالدى ورتالىقتارعا جەتكىزەمىز. جالپى، كلۋب مۇشەلەرىنىڭ قاتارىندا ەر ادامدار بار. ولاردىڭ سانى كوپ ەمەس. استانا، تاشكەنت، ورال قالالارىندا بار.

– تۇراقتى دەمەۋشىلەرىڭىز بار ما؟ الدە دەمەۋشى دە، توقىماشى دا وزدەرىڭىز بە؟

– توقىما جىپتەرىن ءار ەرىكتى ءوز قارجىسىنا ساتىپ الادى. ءبىراق، بىزگە تۇراقتى تۇردە قارجىلىق كومەك كورسەتەتىن جانە توقىما جىپتەرىن سىيعا تارتاتىن جاندار بار. كەيدە ءبىزدىڭ يگى قىزمەتىمىزگە ريزاشىلىعىن بىلدىرەتىن اتا-انالار دا بار. بالالارىنىڭ فوتوسۋرەتتەرىن جىبەرىپ، بىزگە توقىما جىپتەردى سىيلاپ جاتادى.

– تانىمال تۇلعالاردىڭ كلۋب تۋرالى كوزقاراسى قانداي ەكەن؟ سىزدەردەن كيىم العاندارى بولدى ما؟

– ءبىزدىڭ كلۋب جايلى كوپتەگەن ادامدار بىلەدى. قوعامنىڭ كوزقاراسى ءتۇزۋ. ىزگىلىككە تولى ىسىمىزگە جاقسى باعا بەرىپ، ريزالىعىن ءبىلدىرىپ جاتادى. سىن پىكىرلەر ايتىپ، ءمىن تاعاتىندار دا كەزدەسەدى. ب ا ق وكىلدەرى ءاردايىم كلۋب قىزمەتى جايلى قالىڭ كوپشىلىكتى اقپاراتتاندىرىپ وتىرادى. ال تانىمال جاندارعا كەلسەك، ولار دا كلۋب جايلى ەستىگەن بويدا جاقسى پىكىرلەرىمەن ءبولىستى. مىسالى، ءبىز توقىعان بۇيىمداردى ءوز بالالارىنا ولەگ بورەسكيي، تورەعالي تورەالى، توقتار سەرىك سەكىلدى جاندار العان. ال دەمەۋشىلىككە كەلسەك، بىزبەن بىرگە بەلگىلى سپورت جۇلدىزى، ۆانكۋۆەر قالاسىندا وتكەن وليمپيادادا جەڭىس تۇعىرىنان كورىنگەن بياتلونشى ەلەنا حرۋستاليەۆا شالاباي بالالارعا بۇيىمداردى توقىدى. توقىما جىپتەرىن سىيعا تارتتى.

ءاردايىم بىزگە اقش-تا تۇراتىن ءوزىمىزدىڭ جەرلەسىمىز بەلگىلى مۋزىكانت،  Steinway Artist اتاعىن يەلەنگەن جالعىز قازاقستاندىق پيانيست قاديشا وڭالبايەۆا كومەك كورسەتىپ تۇرادى. ءوزى مۇحيتتىڭ ارعى جاعىندا بولسا دا توقىما جىپتەردى جولداپ، ءار كەز كلۋبتىڭ جاڭالىقتارىن وقىپ، بالالاردىڭ ءحالىن سۇراپ، ءبىزدىڭ قىزدارعا ادەمى تىلەكتەرىن ايتىپ وتىرادى.

تومەندەگى ەگىزدەر ءانشى كوركەم سەيسەمبەك پەن جۋرناليست گۇلدانا يمانبايدىڭ قىزدارى: ءامينا مەن فاتيما

– كلۋبقا مۇشە بولعىسى كەلەتىن ەرىكتىلەرگە ناقتى ەرەجەلەر، تالاپتار بار ما؟

– ءبىزدىڭ كلۋبقا كەز كەلگەن جان مۇشە بولا الادى. توقي الماسا، ۇيرەتەمىز. ەڭ باستىسى، مەرزىمىنەن ەرتە تۋعان سابيلەرگە كومەكتەسەمىن دەگەن نيەتى بولسا بولعانى.

جۇرەگى كەڭ جانداردىڭ بارلىعىن قاتارىمىزدان كورگىمىز كەلەدى. جاس ەرەكشەلىگىنە دە ءمان بەرمەيمىز. ءبىزدىڭ قاتارىمىزدا ۇلكەن-كىشى جاندار بار. بارلىعىنىڭ ءوز ءىسى، ءوز قىزمەتى بار. ءبىرى ستۋدەنت، ءبىرى پسيحولوگ، ءبىرى جەكە كاسىپكەر، ءبىرى زەينەتكەر تسس. مىسالى، ارامىزدا ۇلكەن اپالارىمىز بار. 81 جاستاعى تامارا مەن 76 جاستاعى اقىل دەگەن بىزگە جول كورسەتەتىن، تاجىريبەسى مول توقىماشى اپايلارىمىز بار. كىشكەنتاي سابيلەرگە ادەمى بۇيىمداردى توقىپ قانا قويماي، ولار وزگە دە قىزىقتى ىستەرمەن اينالىسادى. ءبىزدىڭ اپالارىمىز بوس ۋاقىتىندا باقشادا گۇل وسىرۋمەن اينالىسسا، جازدا تاۋدا شىعىپ سەرۋەندەيدى. سوندىقتان دا كەز كەلگەن جانداردى ءوز قاتارىمىزدان كورۋگە اسىعامىز.

– ەڭبەكتەرىڭىزدى ەلەپ، وسى جىلدار ىشىندە كلۋب قانداي دا ءبىر ماراپاتقا يە بولدى ما؟

– 2017 جىلى "28 ىلمەك" كلۋبىن "دەنساۋلىق ساقتاۋ سالاسىنا قولداۋ كورسەتكەنى ءۇشىن "التىن جۇرەك" جۇلدەسىمەن ماراپاتتادى. بۇل دا ءبىزدىڭ جەتىستىگىمىز، رياسىز ەڭبەگىمىزدىڭ باعالانعانى دەپ بىلەمىن.

–اڭگىمەڭىزگە كوپ راحمەت!