رينات زايىتوۆ 2 مامىردا تىكەلەي ەفيرگە شىعىپ، سايلاۋعا بايلانىستى ءوز ويىن ءبىلدىردى دەپ جازادى Qamshy.kz اقپارات اگەنتتىگى. اتالمىش ۆيدەو Youtube ارناسىنا جاريالاندى. 

تىكەلەي ەفير كەزىندە تانىمال ايتىسكەر ءوزىنىڭ ءامىرجان قوسانوۆتى قولدايتىنىن ايتتى. 

"مەن ءامىرجان قوسانوۆپەن جاقىن ارالاسپايمىن. دەگەنمەن سالەمىمىز ءتۇزۋ، قۇدايعا شۇكىر. پارتيانىڭ اتىنان ءامىرجان قوسانوۆتى ۇسىنعان كەزدە بىردەن قولداي كەتتىم. قازىرگى كەزەڭدە بەلگىلى ءبىر قيتۇرقى جايتتار بولادى. سامىسالى 118 مىڭ ادامنىڭ قولى كەرەك دەسە، ولاردىڭ قاتارىندا بىرنەشە بيلىكتىڭ ارنايى ادامدارى بولۋى مۇمكىن. كەيىن ۋاقىت اياقتالعان كەزدە "ءبىز قول قويمادىق"، - دەپ شۋ شىعارۋى ابدەن مۇمكىن. سول سەبەپتى بارىنشا ارتىق قول جيناۋعا تىرىسامىز. قول جيناۋعا مەن ءوزىم دە باراتىن شىعارىمىن. نەگىزىنەن ءتۇرلى الىپقاشپا پىكىرلەر كوپ. ءبىراق مەنىڭ ويىمشا، وسى سايلاۋ سوڭعى 30 جىلدىڭ ىشىندەگى ءبىزدىڭ ەڭ سوڭعى مۇمكىندىگىمىز. بۇل سوڭعى مۇمكىندىك. ەگەر قايتادان بۇرىنعى بيلىك قايتادان اتقا قونىپ، قايتادان ءوزىنىڭ اينالاسىن قورشاپ-قورعاشتاپ، وزدەرىنە ىڭعايلى زاڭدار شىعارىپ الاتىن بولسا، ءبىز كەمىندە تاعى 30 جىل ءدال وسىلاي ءومىر سۇرەتىن بولامىز"، - دەدى رينات زايىتوۆ. 

سونداي-اق رينات زايىتوۆ يمانعالي تاسماعامبەتوۆ تۋرالى ويىن دا اشىق ايتتى. 

"ونىڭ سايلاۋعا نە سەبەپتى قاتىسپاعانىن مەن بىلمەيمىن. الايدا سوڭعى 10 جىلدىڭ ىشىندە يمانعالي اعامىز "ەل بولايىق" دەپ ۇندەۋ تاستايتىن شىعار دەپ ۇمىتتەنگەن قازاقتاردىڭ ءبىرى مەنمىن. ونىڭ سايلاۋعا قاتىسپاعانى تازا ءوز ەركى-اۋ دەيمىن. مۇمكىن بيلىكتىڭ ەركى شىعار. مەن بۇل تۋرالى بىلمەيمىن. ءبىراق ونىڭ سايلاۋعا قاتىسقانىن قالاعان قازاقتاردىڭ ءبىرىمىن"، - دەپ پىكىر ءبىلدىردى ايتىسكەر اقىن. 

تىكەلەي ەفيردىڭ كورەرمەندەرىنىڭ ءبىرى "ءامىرجان قوسانوۆ ناعىز حالىقتىڭ ادامى بولسا بيلىك ونىڭ سايلاۋعا قاتىسۋىنا نەلىكتەن جول بەرىپ وتىر" دەپ سۇراق قويدى. رينات زايىتوۆ بولسا ءامىرجان قوسانوۆتىڭ سايلاۋعا دەيىن قاتتى ءارى مۇقيات دايىندالعانىن ايتتى. 

"ءامىرجان اعا سايلاۋدان بۇرىن مۇقيات دايىندالدى. سەبەبى نەشەتۇرلى كەدەرگىلەر بولاتىن ءبىلدى. سول سەبەپتى ءبىز سىرتتاي تىلەۋىن تىلەپ، تاقىم قىسىپ وتىردىق. دەگەنمەن بۇل سۇراقتى قول جيناۋ اياقتالعان سوڭ قويۋ كەرەك سەكىلدى. سەبەبى ءالى كۇنگە دەيىن ءبىزدىڭ بويىمىزدا قورقىنىش بار. قازىرگى ترانزيتتىك پرەزيدەنت ۋادەسىن بەردى، ءسوزىن بەردى. ءبىزدى سايلاۋدىڭ ادىلەتتى وتەتىنىنە سەندىردى. ەر ازامات قوي. ەكى سويلەمەيتىن شىعار. قاشانعى ەكى سويلەيدى. سايلاۋدان كەيىن قوعامنىڭ ءوزى قوزعالىپ كەتەتىن شىعار. الايدا ءدال ءقازىر ءبىر جەڭنەن قول، ءبىر جاعادان باس شىعارۋ ءبىزدىڭ مىندەتىمىز. ءقازىر "ۇلت تاعدىرىنىڭ" اينالاسىنا جينالعان ازاماتتاردىڭ ەركىن ويلانۋعا شاماسى قالعان ادامدار. اركىمنىڭ تاڭداۋى ءوز ەركىندە. مەن توقايەۆقا داۋىس بەرەتىندەردى دە تۇسىنەمىن. باسقا دا كانديداتتارعا داۋىس بەرەتىن ادامداردى تۇسىنۋگە تىرىسامىن. سەبەبى اركىمنىڭ ءوز شىندىعى بار. ءبىراق مەن قوسانوۆقا داۋىس بەرەمىن. ويتكەنى كانديداتتاردىڭ ىشىندەگى "بۇل جۇيەنى توقتاتۋ كەرەك" دەگەن ءوز ۇستانىمى بار ادامعا مەن سەنەمىن" - دەيدى رينات زايىتوۆ. 

ايتىسكەر اقىن ءوزىنىڭ دە نە سەبەپتى سايلاۋعا تۇسپەگەنىن ءتۇسىندىردى. 

"مەنىڭ بىرىنشىدەن جاسىم كەلگەن جوق. ەكىنشىدەن، ءوزىمدى ەلدى باسقارا كەتەتىن ادام رەتىندە سانامايمىن. ەگەر 10-15 جىلدا حالىقارالىق ماسەلەلەردى شەشە الاتىن جاعدايعا جەتە السام قاتىساتىن شاعارمىن"، - دەيدى رينات زايىتوۆ. 

دايىنداعان: اسەل بولات قىزى