بيىل وتان قورعاۋشىلار كۇنىنە ارنالعان اسكەري پاراد بولمايدى. قارۋلى كۇشتەردىڭ بولىمشەلەرى دايىندىقتارىن وقۋ-جاتتىعۋ كەزىندە كورسەتتى دەپ حابارلادى ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
"وتان قورعاۋشىلار كۇنىنە وراي اسكەري پاراد وتكىزۋ جوسپارلانىپ وتىرعان جوق"،- دەپ جازىلعان قورعانىس مينيسترلىگىنىڭ جاۋابىندا.
بيىل قارۋلى كۇشتەر بولىمشەلەرى پارادىنىڭ ورنىنا "ايبالتا 2019" ستراتەگيالىق كوماندالىق-شتابتىق وقۋ-جاتتىعۋى ءوتتى. ول الماتى وبلىسىنداعى "قاراتال" پوليگونىندا ۇيىمداستىرىلعان بولاتىن.
"اسكەري شەرۋدەن باس تارتۋدىڭ ايتارلىقتاي سەبەبى جوق. بىزدە شەرۋدى جىل سايىن وتكىزۋ كەرەك دەگەن رەگلامەنت جوق. بيىل قارۋلى كۇشتەر بولىمشەلەرى پارادىنىڭ ورنىنا "ايبالتا 2019" ستراتەگيالىق كوماندالىق-شتابتىق جاتتىعۋى ءوتتى. جاتتىعۋ كەزىندە قازاقستاندىق اسكەر ءوزىنىڭ كۇش-قۋاتىن كورسەتتى"، - دەدى قورعانىس مينيسترلىگىنىڭ باسپا ءسوز حاتشىسى سەرىك بورانبايەۆ.
بيىل "ايبالتا 2019" وقۋ-جاتتىعۋى اۋقىمدى بولدى. وعان سەگىز مىڭ اسكەري قىزمەتكەر، ءبىر جارىم مىڭنان استام جەردەگى تەحنيكا مەن 50-دەن استام اۋە تەحنيكاسى قاتىستى.
ءتۇرلى وڭىرلەردەن جينالعان قازاقستاننىڭ قارۋلى كۇشتەر بولىمشەلەرى ەكى اپتا بويى ەل اۋماعىنا كىرگەن قارۋلى توپتاردى جويۋ بويىنشا جاتتىعىپ، دايىندىقتارىن پىسىقتادى.
وقۋ-جاتتىعۋ اياقتالعان سوڭ، قازاقستان پرەزيدەنتى قاسىم-جومارت توقايەۆ اسكەردىڭ دايىندىعىنا جوعارى باعا بەردى. قارۋلى كۇشتەردىڭ بەدەلىن نىعايتا ءتۇسۋ ءۇشىن مەملەكەت تاراپىنان قولداۋ كورسەتۋدى جالعاستىراتىنىن ايتتى.
ۇسىنعان: ادىلەت مادەنيەت
پىكىر قالدىرۋ