ايدىڭ تولىق تۇتىلعان ۋاقىتىندا يسپانيالىق عالىمدار ەرەكشە قۇبىلىستى بايقاپ قالعان. وسىدان كەيىن ۋەلۆا ۋنيۆەرسيتەتىنىڭ پروفەسسورى حوسە ماريا مادەدو مەن اندالۋسيا ينستيتۋتىنىڭ استروفيزيگى حوسە ورتيس بۇل قۇبىلىسقا وزدەرى عىلىمي جۇمىس جازعان.

2019 جىلدىڭ 21-قاڭتارىندا تۇتىلۋ ۇدەرىسىن قاداعالاپ وتىرعان عالىمدار ايدىڭ بەتىنەن ەرەكشە ءبىر جارىقتى بايقاپ قالادى. ولاردىڭ پىكىرىنشە، جەر سەرىگىنە سول ۋاقىتتا جىلدامدىعى ساعاتىنا 61 مىڭ شاقىرىمدى قۇرايتىن مەتەوريت ءتۇستى دەپ بولجام جاسايدى. ويتكەنى، اتالمىش قۇبىلىستىڭ جارىعىن ەشقانداي تەلەسكوپسىز دا كورۋگە بولاتىن ەدى.

مادەدو مەن ورتيس يسپانيانىڭ وڭتۇستىگىندە ورنالاسقان سەگىز تەلەسكوپتىڭ كومەگىمەن جۇمىس جاسايتىن ايداعى ىس-ارەكەتتەردى باقىلاۋ مەن ساراپتاۋ جۇيەسىن (MIDAS) قولدانعان. وسى جۇيەنىڭ ارقاسىندا الگى ۇدەرىستىڭ ۆيدەوسى دا جاريا بولدى.

قولدا بار ماتەريالدارعا سۇيەنە وتىرىپ، عالىمدار مەتەوريتتىڭ سالماعى 45 كگ، كولەمى 30-60 سم دەپ باعالادى. ال ونىڭ ەكۆيۆالەنتتى كۇشى 1،5 توننانى قۇراعان. قۇلاعان مەتەوريتتىڭ اسەرىنەن ايدىڭ بەتىندە تەرەڭدىگى 15 مەتر بولاتىن شۇڭقىر پايدا بولعان. ال مەتەوريتتىڭ ماكسيمالدى تەمپەراتۋراسى سەلسيي شكالاسى بويىنشا 5400 گرادۋستى كورسەتىپتى. بۇل – كۇننىڭ بەىندەگى وت جالىنمەن بىردەي گرادۋس. سوققى لاگرانج كراتەرىنىڭ ماڭىندا ورىن العان.

ارنايى ماماندار 0،28 سەكۋندقا سوزىلعان جارىقتى ءتۇسىرىپ الدى. بۇعان دەيىن اي بەتىنە قانشا مەتەوريت قۇلاسا دا، ونى تاسپاعا تارتۋ مۇمكىن بولماي كەلگەن-دى.

"جەردەگى زەرتحانالاردان مۇنداي قۇبىلىستاردى ءتۇسىرىپ الۋ نەگىزىندە مۇمكىن ەمەس"، - دەيدى مادەدو.

ونىڭ ايتۋىنشا، اي بەتىندەگى جاعدايلاردى ۇزدىكسىز باقىلاپ وتىرۋ عالىمدار كوكەيىندەگى تۇيتكىلدەردى شەشۋگە كومەكتەسەدى ەكەن.

قاڭتار ايىندا اي بەتىنە مەتەوريت تۇسكەنىن امەريكالىق عالىمدار دا جارىسا جەتكىزگەن. لوس-اندجەلەستەگى گريففيت وبسەرۆاتورياسىنداعى زەرتتەۋشىلەر دە بۇل قۇبىلىستى ۆيدەوعا ءتۇسىرىپ ۇلگەرىپتى.

اۋدارعان: ادىلەت مادەنيەت