جازۋشى، ايگىلى «تاقتار ويىنىنا» ارقاۋ بولعان «مۇز بەن جالىننىڭ ءانى» رومانىنىڭ اۆتورى دجوردج مارتين، ايگىلى شوۋدىڭ ءالى دە جالعاسى بولاتىنىن (ءۇش سپين-وفف) مالىمدەدى دەپ حابارلايدى Qamshy.kz اقپارات اگەنتتىگى vm.ru سايتىنا سىلتەمە جاساپ.

اۆتور، قازىرگى تاڭدا كينوتۋىندىنىڭ جالعاسىنا نەگىزدەلگەن بەس جوبا قاراستىرىلىپ جاتقانىن اتاپ ءوتتى. الايدا مارتين ىشىندەگى ۇشەۋىنە ەرەكشە ءمان بەرىپ وتىر. ويتكەنى ول نۇسقالاردىڭ جۇمىسى جاقسى ءجۇرىپ جاتقان كورىنەدى.

جازۋشى ءوزىنىڭ رەسمي سايتىندا كينوتۋىندىنىڭ جالعاسى تۋرالى تولىعىراق جازعىسى كەلمەگەن. مارتين ايگىلى رومان مەن سەريالدىڭ جانكۇيەرلەرىنە «وت پەن قان» تۋىندىسىن الىپ، وزدەرىنىڭ جەكە بولجامدارىن جاساۋدى ۇسىنعان.

جوبانىڭ ءبىرى قىزۋ دايىندىق ۇستىندە. وعان «ۇزاق ءتۇن» دەگەن اتاۋ بەرىلگەن. سپين-وففتىڭ وقيعا جەلىسى ايگىلى سەريالدا كورسەتىلگەن وقيعالاردان بۇرىنعى تاريحتى باياندايتىن بولادى.

سونىمەن قاتار، دجوردج مارتين جوبانىڭ العاشقى جالعاسى 2019 جىلدىڭ سوڭىندا باستالۋى مۇمكىن ەكەنىن اتاپ ءوتتى. كينوتۋىندىنىڭ رەجيسسەرى س.دج.كلاركسون بولماق. ول «دەكستەر» جانە «دوكتور حاۋس» سەريالدارىمەن تانىمال رەجيسسەر. جالعاسى بولاتىن باسقا جوبالار تۋرالى تولىق مالىمەت ازىرگە ايتىلمايدى.

ەستەرىڭىزگە سالا كەتسەك، قازىرگى تاڭدا «تاقتار ويىنى» سەريالىنىڭ سوڭعى ماۋسىمى كورسەتىلىپ جاتىر. ايگىلى سەريالدىڭ العاشقى ماۋسىمى 2011 جىلى قالىڭ كورەرمەنگە جول تارتقان بولاتىن.

ۇسىنعان: مارجان سابەت