قازاقستان كوممۋنيستىك حالىق پارتياسىنان پرەزيدەنتتىككە كانديدات جامبىل احمەتبەكوۆ 16 وڭىردەن 135 506 قول جيناعان، دەپ حابارلايدى Qamshy.kz اقپارات اگەنتتىگى Sputnik قازاقستان سايتىنىڭ دەرەگىن نەگىزگە الىپ. 

ورتالىق سايلاۋ كوميسسياسىنىڭ مۇشەسى باقىت مەلدەشوۆ كوممۋنيستەردىڭ اتىنان سايلاۋعا تۇسەتىن ۇمىتكەردىڭ كانديداتقا قويىلاتىن تالاپتارعا ساي ەكەنىن اتاپ ءوتتى.

"اۋماقتىق سايلاۋ كوميسسياسىلارىنىڭ حاتتامالارىندا سايكەس، جامبىل احمەتبەكوۆ 16 وڭىردەن 138 294 قول جينادى. ونىڭ 135 506-سى ەسەپكە الىندى"، - دەدى مەلدەشوۆ وكس وتىرىسىندا.

جامبىل احمەتبەكوۆكە قازاقستان پرەزيدەنتتىگىنە ۇمىتكەردىڭ كۋالىگى تابىستالدى.

بريفينگ بارىسىندا قازاقستان كوممۋنيستىك حالىق پارتياسىنىڭ كانديداتى قول جيناۋعا از ۋاقىت بەرىلگەنىن، ءبىراق وعان قاراماستان بۇل مىندەتتى ورىنداعانىن جەتكىزدى.

سونداي-اق، جامبىل احمەتبەكوۆ ءوزىنىڭ ومىرلىك جولىن بايانداپ بەردى.

"مەن اۋىلدان قالاعا كەلگەن كەزدە ءۇي جالداپ تۇردىم. ول قالاداعى لەسوزاۆود اۋدانىندا بولاتىن. باتپاقتىڭ اراسىمەن جۇردىك. پارتيامىز پارلامەنتكە ءوتىپ، دەپۋتات بولىپ سايلاندىم. ءقازىر قىزمەتتىك ۇيدە تۇرىپ جاتىرمىن. انام مەنىڭ قولىمدا. وتباسىمدا 7 ادام بار"، - دەدى ول.

پرەزيدەنتتىككە ۇمىتكەر جەكە باسىندا ءۇي جوق ەكەنىن، ال قىمبات كولىكتى نەسيەگە ساتىپ العانىن ايتتى.

"ءقازىر ءوزىمنىڭ جەكە ءۇيىم جوق. جۇبايىم - ءمۇعالىم. سوندىقتان مەملەكەتتىك باعدارلاما ارقىلى الدىمەن جالعا بەرىلەتىن، كەيىن ساتىپ الۋ مۇمكىندىگى قاراستىرىلعان باسپانا الدىق. ونىڭ اقشاسىن تولەپ تۇرامىز. ءبىراق ول ءبىزدىڭ اتىمىزعا تۇسكەن جوق. ءالى ءبىراز اقشا تولەۋ كەرەك. الدىندا يتەرىپ جۇرگىزەتىن Toyota Camry كولىگىم بولدى. ونى ساتىپ، نەسيەگە 2013 جىلعى Toyota Highlander كولىگىن الدىم. 3 جىل نەسيەسىن تولەدىم. ودان باسقا بيزنەسىم، جەكە مۇلكىم جوق"، - دەدى كانديدات.

ۇسىنعان: اسەل بولات قىزى