ماڭعىستاۋ وبلىسىنا ارنايى ساپارمەن قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ كەلدى. مەملەكەت باسشىسى الدىمەن اقتاۋ قالاسىنداعى كاسىپكەرلەرگە قىزمەت كورسەتۋ ورتالىعىنا باردى. جۇمىس ساپارى بارىسىندا پرەزيدەنت كاسىپكەرلەرگە «ءبىر تەرەزە» قاعيداسى بويىنشا قىزمەت كورسەتەتىن ورتالىقتىڭ جۇمىسىمەن تانىستى. ورتالىق مەملەكەتتىك ساتىپ الۋ، بۋحگالتەرلىك، سالىق جانە ستاتيستيكالىق ەسەپتەر، كەدەندىك راسىمدەر، اقپاراتتىق تەحنولوگيالار بويىنشا قىزمەت كورسەتەدى. سونداي-اق، بيزنەسكە مەملەكەتتىك قولداۋ كورسەتۋ جانە كاسىپكەرلەرگە قۇقىقتىق كومەك بەرۋ ماسەلەلەرى جونىندە تەگىن كەڭەس بەرىلەدى. سونىمەن قاتار، پرەزيدەنتكە «باستاۋ-بيزنەس» باعدارلاماسىنىڭ جۇزەگە اسىرىلۋ بارىسى باياندالدى. «اتامەكەن» ۇلتتىق كاسىپكەرلەر پالاتاسىنىڭ جوبالارى: تۇيە شارۋاشىلىعى، رەپەتيتورلىك ورتالىق، تيپوگرافيا، سۇلۋلىق سالونى، ستوماتولوگيالىق كابينەت، بالاباقشا جانە باسقا دا باستامالار تانىستىرىلدى.

اقتاۋداعى تەڭىز اكادەمياسى دا قاسىم-جومارت توقايەۆتىڭ نازارىنان تىس قالمادى. مەملەكەت باسشىسى كەمە جۇرگىزۋشىلەردىڭ، كەمە مەحانيكتەرىنىڭ، شتۋرمانداردىڭ كوپ فۋنكسيالىق ترەناجەرلىك سىنىپتارى، سونداي-اق، العاشقى مەديسينالىق كومەك كورسەتۋگە، ورتكە قارسى جانە قۇتقارۋ جۇمىستارىن ۇيىمداستىرۋعا ارنالعان ءدارىسحانالارى بار اكادەميانىڭ كوپبەيىندى ماتەريالدىق-تەحنيكالىق بازاسىن ارالاپ كوردى. ستۋدەنتتەرمەن بەيرەسمي اڭگىمەلەسۋ بارىسىندا قاسىم-جومارت توقايەۆ زاماناۋي ستاندارتقا ساي ساپالى ءارى ارنايى ءبىلىم الۋدىڭ ماڭىزدىلىعىن اتاپ ءوتىپ، ولاردىڭ وقۋدا تابىستى بولۋىنا تىلەكتەستىك ءبىلدىردى. ۋنيۆەرسيتەت ستۋدەنتتەرى وسكەلەڭ ۇرپاق ماسەلەلەرىنە ەرەكشە كوڭىل ءبولىپ، جاستار جىلى اياسىندا مەملەكەت تاراپىنان قولداۋ كورسەتىلىپ جاتقانى ءۇشىن قازاقستان پرەزيدەنتىنە العىس ايتتى.

قازاقستان پرەزيدەنتى قاسىم-جومارت توقايەۆ «اقتاۋ حالىقارالىق تەڭىز ساۋدا پورتى ۇلتتىق كومپانياسى» اكسيونەرلىك قوعامىنا دا باردى. ساپار بارىسىندا مەملەكەت باسشىسىنا اقتاۋ تەڭىز پورتىنىڭ قازىرگى جۇمىستارى، كاسپيي تەڭىزى ارقىلى وتەتىن جۇك تاسىمالىن ارتتىرۋدىڭ پەرسپەكتيۆالارى، سونداي-اق اقتاۋ قالاسىنداعى شيپاجاي ايماعىنىڭ ينفراقۇرىلىمىن دامىتۋ جونىندە مالىمەت بەرىلدى. قاسىم-جومارت توقايەۆ وندىرىستىك مىندەتتەردى تولىققاندى ورىنداۋعا، سونىڭ ىشىندە جۇك تاسىمالى وپەراسيالارىن جۇرگىزۋگە، كەمەلەردى ايلاققا قويۋعا جانە قىزمەت كورسەتۋگە سەپتىگىن تيگىزەتىن پورتتىڭ تەحنيكالىق مۇمكىندىكتەرىمەن تانىستى. پرەمەر-مينيستردىڭ ورىنباسارى جەڭىس قاسىمبەك اقتاۋ حالىقارالىق تەڭىز ساۋدا پورتىنىڭ جاھاندىق كولىك ءدالىزىنىڭ قيىلىسىندا ورنالاسۋى، جىلىنا 17،7 ميلليون توننا قۇرعاق جۇكتەردى، شيكى مۇناي مەن مۇناي ونىمدەرىن تاسىمالداۋعا مۇمكىندىك بەرەتىنىن باياندادى.

قازاقستان پرەزيدەنتى قاسىم-جومارت توقايەۆ ماڭعىستاۋ وبلىسىنىڭ جۇرتشىلىعىمەن دە كەزدەستى. باسقوسۋعا وبلىستىق ءماسليحات دەپۋتاتتارى، ارداگەرلەر كەڭەسىنىڭ مۇشەلەرى، ۇكىمەتتىك ەمەس سەكتورلار مەن بيزنەس قوعامداستىعىنىڭ، سونداي-اق عىلىمي-پەداگوگيكالىق زيالى قاۋىم وكىلدەرى جانە وبلىس جاستارى قاتىستى. قاسىم-جومارت توقايەۆ وڭىرگە جاساعان ساپارىنىڭ ماڭىزدىلىعىن ايتىپ، تاريحتىڭ اسا جاۋاپتى ساتتەرىندە ماڭعىستاۋلىقتاردىڭ ەل باسشىلىعىنا ءاردايىم قولداۋ كورسەتكەنىن ەرەكشە اتاپ ءوتتى. مەملەكەت باسشىسى قازاقستاننىڭ تۇڭعىش پرەزيدەنتى – ەلباسى ن.ءا.نازاربايەۆتىڭ باسشىلىعىمەن ەلىمىزدىڭ تاۋەلسىزدىك جىلدارىنداعى قول جەتكىزگەن جەتىستىكتەرىنە ارنايى توقتالدى.

– بارشاڭىز بىلەسىزدەر، ەلباسى تاريحي شەشىم قابىلداپ، قازاقستان وركەندەۋدىڭ جاڭا ساتىسىنا قادام باستى. ءبىز تۇڭعىش پرەزيدەنت ايقىنداپ بەرگەن ستراتەگيالىق ماقسات-مىندەتتەردى جۇزەگە اسىرۋدى ودان ءارى جالعاستىرا بەرەمىز. وسى جىلدار ىشىندە ەگەمەن ەلىمىزدىڭ ساياسي باسقارۋ جۇيەسىندە ساباقتاستىق ءداستۇردى قالىپتاستىردىق. ەلىمىزدى ودان ءارى ىلگەرىلەتىپ، دامىتۋ – ءبىزدىڭ الدىمىزدا تۇرعان ماڭىزدى مىندەت، – دەدى مەملەكەت باسشىسى.

قازاقستان پرەزيدەنتى ەكونوميكا ءوسىمىن قامتاماسىز ەتۋدىڭ، جاڭا جۇمىس ورىندارىن اشۋدىڭ، حالىقتىڭ تابىسىن ارتتىرىپ، تۇرمىس ساپاسىن جاقسارتۋدىڭ ماڭىزدىلىعىن ايتتى.

– تەك مۇناي سالاسىنا عانا سەنىپ، ءومىر سۇرۋگە بولمايدى. قازىرگى زاماندا بۇل ءتيىمسىز. ينۆەستيسيا – ەكونوميكالىق ءوسىم مەن ءوڭىردىڭ ءال-اۋقاتىن ارتتىرۋدىڭ نەگىزى. ەركىن ەكونوميكالىق ايماعىمىز، سونىڭ ىشىندە «اقتاۋ تەڭىز پورتى» ەركىن ەكونوميكالىق ايماعى ينۆەستيسيا تارتۋ الەۋەتىنە يە. سونداي-اق، ءتۋريزمدى دامىتۋ ءىسى ەلىمىزدىڭ پەرسپەكتيۆاسى زور ەكەنىن كورسەتەدى. بۇل سالادا ماڭعىستاۋ وبلىسىنىڭ ءبىرقاتار ناقتى باسىمدىقتارى بار، – دەدى قاسىم-جومارت توقايەۆ.

كەزدەسۋ بارىسىندا قازاقستان پرەزيدەنتى ۇكىمەتكە، مينيسترلىكتەرگە، اكىمدىكتەرگە، دامۋ ينستيتۋتتارىنا ۇلتتىق ەكونوميكا ءوسىمىن قامتاماسىز ەتۋگە، تۇرعىنداردىڭ تۇرمىس ساپاسىن ارتتىرۋعا، سىبايلاس جەمقورلىققا قارسى كۇرەستى كۇشەيتۋگە، كادرلار ىرىكتەۋ جۇيەسىن جەتىلدىرۋگە، سونداي-اق قوعاممەن ءتيىمدى قاتىناس ورناتۋعا باعىتتالعان ءبىرقاتار ناقتى شارالار قابىلداۋدى تاپسىردى.

سوڭىندا قاسىم-جومارت توقايەۆ قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىن وتكىزۋ جونىندەگى شەشىمىن قولداعانى ءۇشىن كەزدەسۋگە قاتىسۋشىلارعا العىس ءبىلدىرىپ، بارشاسىنا تابىس جانە اماندىق تىلەدى.