اقتاۋ تەڭىز پورتىندا ترانسكاسپيي حالىقارالىق كولىك باعىتى بويىنشا فيدەرلىك جەلىنى اشۋ بويىنشا سالتاناتتى ءىس-شارا ءوتتى. باكۋ پورتىنا كونتەينەرلەرىمەن قوسا قازاقستاندىق تۇڭعىش «تۇركىستان» فيدەرلىك كەمەسى جىبەرىلدى. وسى جوبانىڭ تەڭىز وپەراتورى «قازاقتەڭىزكولىكفلوتى» ۇتقك بولىپ تابىلادى.

ىسكە قوسۋ راسىمىنە «سامۇرىق-قازىنا» ۇلتتىق ءال-اۋقات قورى» اق باسقارما ءتوراعاسى احمەتجان ەسىموۆ، ماڭعىستاۋ وبلىسىنىڭ اكىمى ەرالى توعجانوۆ، «قازمۇنايگاز» ۇك» اق باسقارما ءتوراعاسى اليك ايداربايەۆ، «قازاقستان تەمىر جولى» ۇك» اق باسقارما ءتوراعاسى ساۋات مىڭبايەۆ جانە ترانسكاسپيي باعىتىنداعى سەرۆيستى پايدالاناتىن كولىك-لوگيستيكالىق كومپانيالاردىڭ باسشىلارى مەن جۇك جونەلتۋشىلەر قاتىستى.

فيدەرلىك كەمەلەر اپتا سايىن قاتىناپ تۇراتىن بولادى. ترانسكاسپيي باعىتى (تمتم) وڭىردەگى ەۋرازيالىق كولىك ارتەريالارىنىڭ نەگىزگى بۋىنى بولىپ تابىلادى جانە قازاقستاننىڭ ترانزيتتىك دالىزدەرى جۇيەسىن تولىقتىرادى. بۇل جۇڭگو مەن قازاقستاننان كاۆكاز، تۇركيا ەلدەرىنە تىكەلەي شىعۋ. 

تۇراقتى فيدەرلىك قاتىناس ترانسكاسپيي حالىقارالىق كولىك باعىتى بويىنشا جۇك اعىنىن ارتتىرۋعا جانە كاسپيي وڭىرىندە جۇكتەردى كونتەينەرلەۋدىڭ ودان ءارى دامۋىنا ىقپال ەتەدى.

جيىندا ماڭعىستاۋ وبلىسىنىڭ اكىمى ەرالى توعجانوۆ ءسوز الىپ، فيدەرلىك جەلىنىڭ ماڭىزىن ءتۇسىندىردى.

-"بۇگىن ءبىز وبلىسىمىزدىڭ ەكونوميكاسى مەن كولىك ينفراقۇرىلىمىن دامىتۋعا جول اشاتىن تاعى ءبىر ماڭىزدى تاريحي ءساتتىڭ كۋاسى بولىپ وتىرمىز. جالپى قازاقستاننىڭ، سونىڭ ىشىندە ماڭعىستاۋدىڭ ينفراقۇرىلىمىن دامىتۋدىڭ نەگىزىن قالاۋشى – ءبىزدىڭ تۇڭعىش پرەزيدەنت - ەلباسى نۇرسۇلتان ءابىش ۇلى نازاربايەۆتىڭ باستاماسى بويىنشا 2،5 مىڭ كم جاڭا تەمىر جول جانە 12،5 مىڭ كم اۆتو جول سالىندى، بۇل قىتايدان پارسى شىعاناعى مەن ەۋروپا ەلدەرىنە ءبىزدىڭ پورتتار ارقىلى جۇكتەردى تاسىمالداۋ سالدارىنان رەسپۋبليكانىڭ ترانزيتتىك الەۋەتىن ءتيىمدى پايدالانۋعا مۇمكىندىك بەرىپ وتىرعانى ءسوزسىز. وسىنىڭ ارقاسىندا، ءبىز تاۋەلسىزدىك جىلدارى لوگيستيكا سالاسىنداعى حالىقارالىق قاۋىمداستىقتاردىڭ تولىققاندى مۇشەسى بولدىق. ترانسكاسپيي باعىتى - بۇل قازاقستاننىڭ ترانزيتتىك دالىزدەرىنىڭ جۇيەسىن تولىقتىراتىن ايماقتاعى ەۋرازيالىق كولىك ارتەريالارىنىڭ ماڭىزدى بۋىنى"، دەدى.

«قازمۇنايگاز» ۇك باسقارماسىنىڭ ءتوراعاسى اليك ايداربايەۆ اتاپ وتكەندەي، بۇل باعىت «نۇرلى جول» باعدارلاماسىنا سايكەس اشىلىپ وتىر. نەگىزگى مىندەتى قازاقستاننىڭ كولىك-لوگيستيكالىق الەۋەتىن دامىتۋ جانە ەلدىڭ ەكونوميكالىق ءوسۋىن قامتاماسىز ەتۋ ءۇشىن ءتيىمدى ينفراقۇرىلىم قۇرۋ بولىپ تابىلادى. «قازمۇنايگاز» كومپانيالار توبى حالىقارالىق مۋلتيمودالدى تەڭىز تاسىمالدارىن جەتىلدىرۋ ارقىلى وسى پروسەسكە بەلسەندى تۇردە تارتىلعان.

«قازاقتەڭىزكولىكفلوتى» ۇتقك فيدەرلىك قاتىناس وپەراتورى بولىپ تابىلادى، ونىڭ ءبىرىنشى سىنىپتى مەملەكەتتىك ليسەنزياسى بار، قازىرگى زامانعى ساۋدا فلوتى بار جانە تاجىريبەلى جانە بىلىكتى پەرسونالمەن قاجەتتى قۇزىرەتتىلىككە يە.

فيدەر باعىتى ءۇشىن «نۇرلى جول» باعدارلاماسىنا سايكەس ساتىپ الىنعان جاڭا فلوت پايدالانىلاتىن بولادى.

وسى تاسىمالداردى ورىنداۋ تەڭىزدە ءجۇزۋ قاۋىپسىزدىگى جونىندەگى حالىقارالىق جانە ۇلتتىق تالاپتارعا قاتاڭ سايكەستىكتە جۇزەگە اسىرىلاتىن بولادى.