جەڭىس كۇنىندە ءۇش مىڭعا جۋىق اتىراۋلىق ۇلى وتان سوعىسىندا قازا تاپقانداردى ەسكە الىپ، ماڭگىلىك الاۋ مونۋمەنتىنە گۇل شوقتارىن قويۋ راسىمىنە قاتىستى.
- بارشاڭىزدى وسى ۇلى كۇنمەن - جەڭىس كۇنىمەن قۇتتىقتايمىن. باتىرلاردىڭ سوعىستاعى ەرلىگى ادامزات جادىندا ماڭگى ساقتالادى. ميلليونداعان ادامدار مايدان دالاسىندا باستارىن قاتەرگە تىكتى، ءبىزدىڭ بەيبىت بولاشاعىمىز ءۇشىن قازا تاپتى،-دەدى اتىراۋ وبلىسىنىڭ اكىمى نۇرلان نوعايەۆ.
-جەڭىستى جاقىنداتۋعا اتىراۋ وبلىسىنىڭ تۇرعىندارى دا ۇلەس قوستى. ءبىزدىڭ وڭىردەن 73 مىڭنان استام ادام مايدانعا اتتانىپ، 25 مىڭى قايتا ورالمادى. ءبىز ولاردىڭ ەرلىكتەرىنە باس يەمىز.
ايماق باسشىسى قازاقستاندا سوعىس ءورتى شارپىماعان ءبىر دە ءبىر وتباسى جوق ەكەنىن اتاپ ءوتتى. مىڭداعان ساربازدار سوعىسقا اتتاندى، مىڭداعان جەرلەستەرىمىز تىلدا ەڭبەك ەتىپ، اسكەردى وق-دارىمەن، ازىق-تۇلىكپەن، كيىممەن، باسقا دا قاجەتتىلىكتەرمەن قامتاماسىز ەتتى. جەرىمىزدى قورعاۋعا بۇكىل حالىق ۇلەس قوستى، بەيبىت ءومىر ءۇشىن كۇرەستى.
-سىزدەردىڭ الدارىڭىزدا ماڭگى قارىزدارمىز. سوعىس جانە ەڭبەك ارداگەرلەرى، تىل ەڭبەككەرلەرى، قازا تاپقان ەرجۇرەك باتىرلارىمىزدى، بۇگىندە ورتامىزدا بار بارشاڭىزدى ماڭگى ەستە ساقتايمىز. وسكەلەڭ ۇرپاقتى اسكەري-پاتريوتتىق تۇرعىدا تاربيەلەۋدە سىزدەردىڭ ءومىر جولدارىڭىز ۇلگى. ەرلىكتەرىڭىز بەن ەڭبەكتەرىڭىزگە مىڭ تاعزىم،-دەپ اتاپ ءوتتى نۇرلان نوعايەۆ.
ماڭگىلىك الاۋعا گۇل شوقتارىن قويۋعا 3000-عا جۋىق اتىراۋلىق قاتىستى.
جينالعاندار ارداگەرلەردى قۇتتىقتاپ، العىستارىن ايتتى. جەڭىس ساياباعىندا جورىق اس ءۇيى جاسالىپ، سارباز بوتقاسى بەرىلدى. اسكەري-تەاترلاندىرىلعان قويىلىم ۇيىمداستىرىلدى، سوعىس جىلدارىنداعى اندەر شىرقالدى.
