قازاقستان استاناسى نۇر-سۇلتان قالاسىنداعى «Hilton» ءقوناقۇيىنىڭ جانىندا كوپ بالالى انالاردىڭ نارازىلىق اكسياسىنى وتۋدە، دەپ جازادى Qamshy.kz اقپارات اگەنتتىگى. 

حالىقارالىق ەكونوميكالىق فورۋم ءوتىپ جاتقان اتالمىش عيماراتتىڭ الدىنا 30-عا جۋىق انالار (كوپ بالالى، جالعىزباستى) جينالىپ، قازاقستاننىڭ بۇرىنعى پرەزيدەنتى ن.نازاربايەۆتىڭ بيلىككە  كەلىپ، ءوزى ۋادە ەتكەن اتاۋلى الەۋمەتتىك كومەكتى بەرۋىن تالاپ ەتتى.

"ەلباسى بيلىككە قايتا كەلسىن. بىزگە ءوزى ايتقان اتاۋلى الەۋمەتتىك كومەگىن بەرسىن. ءبىز ەلباسىن كورگىمىز كەلەدى. ەلباسىمەن كەزدەسكىمىز كەلەدى" دەپ ۇرانداعان انالاردى استانا قالالىق پولسيا دەپارتامەنتىنىڭ وكىلدەرى فورۋم ءوتىپ جاتقان عيماراتقا جىبەرمەي قويدى.

نارازىلىق بىلدىرگەن انالار قازاقستان حالقىنىڭ، ونىڭ ىشىندە كوپ بالالى انالاردىڭ جاعدايى ناشار ەكەنىن ايتىپ، بۇل ماسەلەنىڭ وڭدى شەشىلۋىن تالاپ ەتتى. 

"بالالارعا ءۇي بەرىلسىن!"، "باسپانا" دەپ ايقايلاعان انالارمەن سويلەسۋگە فورۋم ءوتىپ جاتقان عيماراتتىڭ ىشىنەن نۇر-سۇلتان قالاسىنىڭ اكىمى باقىت سۇلتانوۆ پەن ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ كەلىپ، ولاردى اۆتوبۋسپەن قالا اكىمدىگىنىڭ عيماراتىنا الىپ كەتتى.

نارازىلىق بىلدىرگەن انالار "اۆتوبۋسقا ب ا ق وكىلدەرى مىنسە عانا، قالا اكىمدىگىنە بارامىز" دەپ تالاپ قويدى. كوپ بالالى انالاردىڭ تالابىن ورىنداعان قالا اكىمى مەن مينيستر جۋرناليستەردى دە اۆتوبۋسقا مىنگىزىپ، قالا اكىمدىگىنە قاراي جول تارتتى.

Qamshy.kz اقپارات اگەنتتىگى الداعى ۋاقىتتا وقىرماندارعا نۇر-سۇلتاندا وتكەن انالاردىڭ نارازىلىعى تۋرالى تولىقتاي مالىمەت بەرەدى.

 ♦وقي وتىرىڭىز: https://www.qamshy.kz/article/maseleninh-sheshilwi-ushin-analar-mindetti-turde-mytyngke-shighwi-kerek-pe.html