ق ر كەزەكتەن تىس پرەزيدەنت سايلاۋى باستالعالى بەرى الەۋمەتتىك جەلىلەردە سۇحبات الاڭدارى مەن ءتۇرلى جانرداعى جازبالار قاتارى كوبەيدى. سونداي سۇحبات الاڭدارىنىڭ ءبىرى بەلگىلى جۋرناليست جانبولات مامايدىڭ ەنشىسىندە. يۋتۋبتاعى "ازات ارنا" اتاۋىمەن بەلگىلى بولعان سۇحبات الاڭىنا كەلگەن كەزەكتى قوناقتاردىڭ ءبىرى، بەلگىلى رەجيسسەر ەركىن راقىشيەۆ سايلاۋ تۋرالى ءوز ويىن ءبىلدىردى دەپ جازادى Qamshy.kz اقپارات اگەنتتىگى.

جانبولات ماماي ارناسىنداعى كەزەكتى شىعارىلىمىنا قوناق رەتىندە رەجيسسەر راقىشيەۆ پەن جۋرناليست رىسبەك سارسەنبايدى شاقىرعان.

"سايلاۋ الدىندا ازاماتتىق قوعام ەكىگە جارىلىپ تۇر: ءبىرى قوسانوۆتى قولداسا، ەندىگى ءبىر شوعىرى سايلاۋعا بويكوت جاريالاۋدى ءجون ساناۋدا. كوپشىلىك ازاماتتار ءامىرجان قوسانوۆتى حالىق اراسىنان شىققان "بارلىق ۇمىتكەرلەرگە ءھام بيلىككە قارسى ۇمىتكەر" دەپ توبەلەرىنە كوتەرىپ جاتسا، كەلەسى توپ ءابليازوۆتىڭ ناسيحاتى ارقىلى جانە باسقا توپتاردىڭ ۇگىتى ارقىلى بۇل ناۋقانعا بەلسەندى بويكوت جاريالاپ وتىر"، - دەپ باستادى ءسوزىن جۋرناليست ماماي.

قىزىقتى قاراڭىز! "ازات ارناعا" قوناق بولىپ كەلگەن ەكى ازامات تا جوعارىدا ايتىلعان قوس مۇددەنى قولداپ جۇرگەندەر قاتارىنان. رەجيسسەر راقىشيەۆ قوسانوۆتى قوس قولداپ قولداسا، رىسبەك سارسەنباي بەلسەندى بويكوت جاريالاعانداردىڭ جاعىنا شىعىپتى.

"مەيلى، ول ساياساتتا 20 جىل، مەيلى 30 جىل ءجۇرسىن، بۇل "ويىننىڭ" شارتى ۋاقىت ءوتىلىن سانامايدى. ماسەلە مىنا سۇراقتا: قوسانوۆ سايلاۋدا جەڭىپ شىققان كۇننىڭ وزىندە بيلىكتى ۇستاپ تۇرا الادى ما؟ ۇستاپ تۇرۋعا ونىڭ الەۋەتى جەتەدى مە؟ قازىرگى بيلىككە قارسىلىق كورسەتۋگە قاۋقارلى ما؟ بۇل جەردە كوپ ماسەلە بار. ءبىز بويكوتتى نەلىكتەن جاريالاپ وتىرمىز؟"، - دەپ ءسوزىن ريتوريكالىق سۇراقتان باستاعان رىسبەك Cارسەنباي ءوز ساۋالىنا ءوزى جاۋاپ بەرۋگە تىرىستى.

ونىڭ ايتۋىنشا، قوسانوۆتىڭ بارلىق يدەياسى دۇرىس-اق. دەگەنمەن، ول جەردەگى بيلىكتى باعىندىرۋ ءۇشىن كۇش كەرەك. ول كۇش قوسانوۆتىڭ ۋىسىندا بار ەكەندىگىنە بەلگىلى جۋرناليست كۇمان تانىتتى.

"قوسانوۆتىڭ سايلاۋالدى باعدارلاماسىنىڭ ءوزى كوپتەگەن سۇراقتارعا جاۋاپ بەرەدى. ونىڭ بيلىككە قارسى شىعىپ، ەگەر پرەزيدەنت بولعان كۇندە كۇللى پارلامەنتتى تاراتىپ، جەمقورلىقتى جويامىن، شەتەلدىكتەرگە جەردى ساتپايمىن، حالىق مۇددەسىنە جۇمىس جاسايتىن زاڭ قابىلدايمىن دەگەن سوزدەرىنىڭ ءوزى حالىققا دەم بەرەدى، ونىڭ ۋادەسىنىڭ نىق، پيعىلىنىڭ تازا ەكەنىنە كەپىلدىك بەرەدى. قوسانوۆ – باسقا ۇمىتكەرلەردىڭ بارلىعىنان ەرەك تۇرعان كانديدات"، - دەدى بەلگىلى رەجيسسەر ەركىن راقىشيەۆ.

ال بۇل سوزدەر رىسبەك سارسەنبايدىڭ مىقتاپ بەكىگەن ساياسي پوزيسياسىن، كوزقاراسىن وزگەرتۋگە قاۋقارلى بولمادى. ول بويكوتتى كىمگە جاريالاپ وتىرعانىن ءتۇسىندىرىپ بەردى.

"ءبىز بويكوتتى قوسانوۆقا ەمەس، سايلاۋعا جاريالاپ وتىرمىز. قوسانوۆ قاتىسسىن، ءوزىن دالەلدەسىن، ءتىپتى، جەڭىسكە جەتسىن. وعان ەشقانداي قارسىلىق جوق. ءبىراق بىزگە مۇنداي مەملەكەتتىڭ، قازىرگى بيلىكتىڭ سەنارييىمەن جاسالىپ وتىرعان سايلاۋدىڭ تۇككە قاجەتى جوق"، - دەپ تۋراسىنان قايىردى رىسبەك سارسەنباي.

سونداي-اق، ول بۇل سايلاۋدىڭ ناۋقانىندا بىرەۋدى جاقتاپ، بىرەۋدى داتتاۋدىڭ قاجەتى شامالى ەكەندىگىن ايتتى.

"قىزىلكەڭىردەك بولىپ قايتەمىز؟ ودان دا وسى سايلاۋعا، قاراۋ سايلاۋعا حالىق بولىپ قارسى تۇرايىق"، - دەدى رىسبەك سارسەنباي.

رىسبەك سارسەنبايدىڭ ايتقان پىكىرلەرىنە قارسى ءسوز ايتامىن دەپ ەموسياسىنا ەرىك بەرگەن ەركىن راقىشيەۆ كەلەسى ءۋاجىن العا تارتتى.

"سىزدەر نەگە سايلاۋعا عانا بويكوت جاريالايسىزدار؟! ەگەر قارسىلىقتارىڭىز راس بولسا، وسى ۋاقىتقا دەيىن "مىنا زاڭدارىڭىز دۇرىس ەمەس، ءبىز بۇعان بويكوت جاريالايمىز" دەپ نەگە ايتپايسىزدار؟ سايلاۋ كەزىندە عانا بوي كورسەتەمىز. ەندى ءبارى كەش. پويىز ءجۇرىپ كەتتى. ءبىز حالىقتى ءتۇرلى باعىتتارعا تارتىپ شاتاستىرۋدامىز. بۇل – بارىپ تۇرعان ارانداتۋشىلىق".

قىرعىن دەباتتىڭ اقىرى رىسبەك سارسەنبايدىڭ قوسانوۆقا ۇسىنىسىمەن اياقتالدى.

"ەڭ قايىرلىسى – قوسانوۆ سايلاۋ بولاتىن كۇنى وزىنە دە، باسقا ۇمىتكەرلەرگە دە داۋىس بەرۋدەن باس تارتسىن. بۇل ونىڭ ەڭ ۇلكەن جەڭىسى بولماق. ەشقاشان ەلدىك، حالىقتىق مۇددەنى جەكە مۇددەگە ايىرباستاۋعا بولمايدى"، - دەدى ول.

ءجۋرناليستىڭ ايتۋىنشا، ەگەر ءامىرجان قوسانوۆ وسىنداي مالىمدەمە جاساسا، ءوزى دە قاتەلەسپەيدى، حالىقتى دا تۋرا جولعا باستايدى-مىس.

ۋشىعىپ كەلە جاتقان "ۇلى" داۋدىڭ بەتىن باعدارلاما جۇرگىزۋشىسى جانبولات ماماي ءاپ ساتتە بۇرىپ ۇلگەردى. قوس قوناعىنان وزگە كانديداتتار تۋرالى پىكىرلەرىن سۇراعان ول اۋىزبىرشىلىكتى جاۋاپ الدى.

راقىشيەۆ پەن رىسبەك سارسەنبايدىڭ ايتۋىنشا، باسقا كانديداتتاردىڭ اشىق پىكىر ءبىلدىرىپ، بەلسەندىلىك تانىتپاعانىنا قاراعاندا، ولار – ادام سانىن كوبەيتۋ ءۇشىن دوداعا قوسىلعاندار.

رەجيسسەر سادىبەك تۇگەلدىڭ ۇلتجاندىلىعىن، ەل ءۇشىن قىزمەت جاساپ جۇرگەنىن ەسكەرگەنىمەن، ونىڭ قورجىنىندا ەشقانداي "شانس" جوق ەكەنىن كەسىپ ايتتى.

بىزگە كەرەگى – داۋ-داماي مەن جاعا جىرتىس ەمەس. ءبىزدىڭ قالاۋىمىز، حالىق قالاۋى – ءادىل سايلاۋ مەن بۇقارا احۋالىن كوتەرە الاتىن كانديداتتىڭ جەڭىسى.

دايىنداعان: ادىلەت مادەنيەت