تابىس دەگەن نە؟ كوپ ادامدار ونى دۇرىس تۇسىنبەيدى. وسىدان ۇلكەن قيىندىقتار باستالادى. تابىس – ول اقشا مەن جايلى ءومىر ەمەس. كوپ اقشاعا يە بولعان ادامنىڭ شىن باقىتتى بولارى ەكىتالاي. كوپ ەلدەرگە ساياحاتتاپ، ءارتۇرلى تاعامداردىڭ ءدامىن تاتىپ، ەڭ جاقسى كيىمدەردى كيىپ ءجۇرۋ دە تابىسقا جاتپايدى. الايدا ادامدار وسىنداي ومىرگە جەتۋدى ماقسات ەتەدى دەپ جازادى Qamshy.kz اقپارات اگەنتتىگى.
سوندا تابىس دەگەن نە؟ تابىس دەگەن – تۇلعالىق دامۋ. سىزدەن اقشاڭىزدى، كيىمىڭىزدى، تاماعىڭىزدى، ءۇيىڭىزدى، ءبارىن تارتىپ الدى دەپ ەلەستەتىڭىز. سونىمەن، وزىڭىزدە نە قالدى؟ ارينە، ءوزىڭىز، ويىڭىز، ساناڭىز قالدى. ءسىز ۆيكتور فرانكل ەسىمىن ەستىگەن بولارسىز. ول شىن ومىردە بولعان مىقتى ادام. ونىڭ تۇلعالىق مىقتىلىعى سونشا ەشقانداي قيىندىق ونى سىندىرا الماعان. ۋاقىتىڭىز بولسا ۆيكتور فرانكلدىڭ تۇلعالىق قالىپتاسۋ جولىن وقىڭىز.
تابىس - بۇل ءوزىمشىل بولماۋ. ءوزىڭدى جانە وتباسىڭدى قولداۋ ءۇشىن تابىسقا ۇمتىلعان جاقسى. دەگەنمەن، تەك مۇنىمەن شەكتەلسەڭىز شىنايى تابىسقا جەتە المايسىز. ءبىز قوعامدا ءومىر سۇرگەندىكتەن، ونداعى تۇلعالار، ادامدار سىزگە اسەر ەتەتىنى ءسوزسىز. ەگەر ءسىزدىڭ دوستارىڭىز، وتباسىڭىز جانە جاقىن ادامدارىڭىز، باسىڭىزدا شاتىرىڭىز جانە جاقسى تابىسىڭىز بار دەلىك. دەگەنمەن، ءسىز قوعامدا ءومىر ءسۇرىپ، كۇن سايىن ءارتۇرلى ادامداردى كەزدەستىرەسىز. ول ادام جاعىمسىز، اقىلسىز بولۋى مۇمكىن. شىن مانىندە تابىستى ادام قوعامداعى سونداي ادامداردى بايقاپ، ونداي جانداردىڭ بارىنا ءوزىن دە كىنالى سەزىنەدى. ساناسى سولاي دەيدى. ەگەر ءسىز شىن مانىندە تابىستى بولساڭىز قوعامدى وزگەرۋگە تىرىسىڭىز، سەبەبى ول ءسىزدى وزگەرتە الادى.
ادامنىڭ ءوز دارىنى مەن قابىلەتىن اشا الماۋى جانە ءوزىنىڭ قاجەتتىلىگىن وتەي الماۋى جەكە دامۋعا ۇلكەن كەدەرگى كەلتىرەدى. سوندىقتان ەشقانداي قابىلەتتى قاجەت ەتپەيتىن جۇمىستاردى ىستەپ، ءوز ۋاقىتىن بوسقا كەتىرەدى. ونداي ادامداردا جەكە دامۋعا دەگەن قىزىعۋشىلىق، موتيۆاسيا قالمايدى جانە ادامگەرشىلىك، جاعارى قاسيەتتەرىن ءبىرسارىندى، ىڭعايلى ومىرگە ايىرباستايدى. ءتىپتى جۇمىستان كەيىنگى بوس ۋاقىتتى پايداسىز نارسەلەرمەن تولتىرادى. قوعامعا قوساتىن ۇلەسى تومەن ادامعا اينالادى جانە ونى ءوزى دە تۇسىنەدى. وسىنداي ساناتقا تۇسپەۋ ءۇشىن ءوز قابىلەتتەرىڭىزدى اشىپ، دامىتىڭىز. سوندا عانا شىنايى تابىسقا جەتەسىز.
