كۇنى بويى الماتىدا «قاڭعىرعان» اياقتارىڭدى ارەڭ سۇيرەپ، بالەنباي ساعات اۆتوبۋستا قوس اياقتان تىك تۇرىپ، كەشكۇرىم ۇيگە جەتەسىڭ، ايتەۋىر. كەلگەن بەتتە كيىم شەشپەستەن، شارتتى رەفلەكس سەكىلدى بىردەن تەلەديدار قوساسىڭ. مەنىڭ ۇيگە كەلەتىن ۋاقىتىم ءدال 31 تەلەارناسىنىڭ ينفورمبيۋروسىنا ساي كەلەدى.
بۇگىن دە كەشەگى جاڭالىقتار سەكىلدى. قازاقستاننىڭ مىنا قالاسىندا كوپ بالالى وتباسى قۋىقتاي پاتەردە كۇن كورۋدە، مىنا قالادا اتىس بولدى، مىنا اۋىلدا سۋ جوق، جارىق جوق، مىنا قالادا ادام ولىگى تابىلدى، اۋە مىنانشا ادامدى اجال قۇشتىردى، بالەنباي جەردە بالەنباي كولىك سوقتىعىستى، ناتيجەسىندە مىنانشا ادام مەرت بولدى.... قۇداي-اۋ، مىنا الەمدە، ەلىمىزدە نە بولىپ كەتتى ءوزى؟
وسىدان بىرنەشە جىل بۇرىن، مەن وقۋشى بولعاندا، وسىنداي وقيعالار تەك امەريكادا، قىتايدا تاعىسىن باسقا وزگە ەلدەردە بولاتىن سياقتى كورىنۋشى ەدى. ءقازىر ءدال ءبىزدىڭ جانىمىزدا بولىپ جاتىر. ءتىپتى قورقاسىڭ. جاڭالىقتاردا كورگەندە، وسىدان ءبىر ساعات بۇرىن عانا ءجۇرىپ وتكەن جولىڭدا ادامدى قاعىپ كەتىپتى دەپ كورسەتكەندە، دەنەڭ تۇرشىگەدى. سول ادامنىڭ ورنىندا مەن دە بولۋىم مۇمكىن ەدى. كەشكى جاڭالىقتاردى كورەيىن دەپ قاي تەلەارنانى قوسساق دا، سول ءبىر بىتپەيتىن جاعىمسىز جاڭالىقتار... كورمەيىن دەسەم، كوزىم، ەستىمەيىن دەسەم قۇلاعىم بار، اتتەڭ. ىشتەي دۇعا تىلەپ قانا وتىرامىز.
كەيدە اۆتوبۋستا كەتىپ بارا جاتىپ كورەتىنىمىز مىناۋ. ۇلكەن جولدا دابىلقاققىشىن «ويبايلاتىپ» بارا جاتقان جاردەم كولىگىنە جول بەرۋدى دە بىلمەيدى كەيبىر جەكە اۆتوكولىك يەلەرى. دارىگەرلەر ويناپ بارا جاتقانداي. اۆتوبۋستا تۇرعان ءبىز، بەينە ءبىر تاسا جەردە تۇرعاندايمىز. اۆتوبۋس سىرتىنداعى باسقا الەم سەكىلدى. ءدال سول جەدەل جاردەم ءبىر كۇنى بىزگە دە، سىزگە دە كومەكتەسۋگە وسىلاي اسىعاتىنىن بىلمەيمىز بە الدە؟
بىلەسىز بە، «تەمىر تۇلپار» يەلەرى، ءسىزدىڭ ءبىر رەتتىك جول بەرمەي، اينالاداعى جاعدايلارعا سەلقوس قاراعانىڭىز ءبىر ادامنىڭ ءومىرىن جالماۋى مۇمكىن. ەگەر... ەگەر ءسىز سول جەدەل جاردەمگە جول بەرسەڭىز، كوشەنىڭ اناۋ باسىندا سوقتىعىسقان كولىكتەردەگى ادامدى نەمەسە ورتتەن دەنەسىنىڭ جارتىسىن كۇيىپ شالعان جاندى، ومىرگە رەنجىپ، بالەنباي قاباتتان ءوزىن-وزى لاقتىرىپ جىبەرگەن ءجاسوسپىرىمدى نەمەسە قۇندى قاعازدىڭ كەسىرىنەن «جاۋلارىنان» دەنەسىنە اۋىر جاراقات العان اداسقان بىرەۋدى، جۇرەك تالماسىنان قۇلاعان اناڭىزداي، اكەڭىزدەي جاندى امان الىپ قالۋ مۇمكىن بولار ەدى... تەك ەگەر دە ءسىز جول بەرگەندە...
قازاعىمنىڭ قاي تەلەارنا بولماسىن، كۇندەردىڭ ءبىر كۇنى جاڭالىقتاردى تەك جاقسىلىقتان باستاپ، تەك جاقسىلىقتان اياقتار.. ولمەيتىن ءۇمىت قانا...
P.S. ادامدار، نەگە قاتىگەز بولىپ بارامىز؟ مەيىرىمدى بولايىقشى؟ قامقور بولايىقشى؟ بىر-بىرىمىزگە جاقسىلىق جاساماق تا جاماندىق جاساماي، كۇن سىيلاي الماساق تا، كۇننىڭ ساۋلەسىن سىيلاۋعا تىرىسايىقشى؟
ماقپال سەمباي
