ەڭبەك جانە حالىقتى الەۋمەتتىك قورعاۋ ءمينيسترى بەردىبەك ماشبەك ۇلى The ەفير باعدارلاماسىنا سۇحبات بەردى دەپ حابارلايدى Qamshy.kz اقپارات اگەنتتىگى. 

بەردىبەك ساپاربايەۆ سۇحباتتىڭ باسىندا ءوزىنىڭ الەۋمەتتىك جەلىگە تىركەلمەگەنىن ايتتى. سەبەبى ونىڭ الەۋمەتتىك پاراقشانى جۇرگىزۋگە ۋاقىتى جوق. 

"ەگەر مەن الەۋمەتتىك جەلىدە جۇمىس ىستەيتىن بولسام قازىرگى جۇمىسىمنىڭ جارتىسىن تاستاۋىم كەرەك بولادى. شىنىندا ۋاقىتىم جوق. ءوزىم كەشكى 21:00-گە دەيىن جۇمىستا بولىپ، ۇيگە تۇنگى 22:00-دە كەلەمىن. كەيىدە تۇنگى 00:00-گە دەيىن جۇمىس ىستەيمىن. سەبەبى ءوزىمنىڭ اياقتالماي قالعان جۇمىستارىم بولادى. سودان سوڭ مەن تۇنگى 02:00-گە دەيىن الەۋمەتتىك جەلىلەردە وتىراتىن بولسام، قاي كەزدە مەن دەمالامىن؟!"، - دەپ ءتۇسىندىردى مينيستر. 

كەيىن مينيستر ءوزىنىڭ ءبىر كۇندىك ءومىرى تۋرال ايتىپ بەردى.

"تاڭەرتەڭ الەۋمەتتىك جەلىلەر مەن سايتتاردى قاراپ شىعامىن. كەيىن بىزگە بايلانىستى سىني ماسەلەلەردى ءوزىمنىڭ ورىنباسارلارىم مەن باسپا ءسوز حاتشىلارىما تاپسىرما بەرەمىن"، - دەيدى بەردىبەك ساپاربايەۆ. 

سونداي-اق بەردىبەك ساپاربايەۆ مينيستر بولعاننان باستاپ ورىن العان وزگەرىستەر تۋرالى دا ءسوز قوزعادى. 

"وزگەرىستىڭ بىرەۋى اسەرەسە كوپ بالالى جانە از قامتىلعان وتباسىلاردى از دا بولسا تىنىشتاندىردىق. ءوزىڭىز قارايتىن بولساڭىز، ءقازىر الەۋمەتتىك جەلىلەردە وسىدان 2 اي بۇرىنعى ماسەلەلەر مەن قازىرگى ماسەلەلەردى سالىستىرۋعا كەلمەيدى. ياعني، كۇردەلى ماسەلەلەر تولىقتاي دەۋگە بولماس، ءبىراق ازايدى. كوبىسى ءۇشىن جاڭا اتاۋلى الەۋمەتتىك كومەكتى الۋ ماڭىزدى بولدى. كوپشىلىك اتاۋلى الەۋمەتتىك كومەكتى ۋاقىتىلى بەرمەيدى، ۇكىمەت تاپسىرمانى ورىندامايدى دەپ ويلادى. ءبىز مەرزىمىندە ورىندادىق. 1 ساۋىردەن باستاپ جاڭا اتاۋلى الەۋمەتتىك كومەكتى بەرە باستادىق. 15 مامىرعا دەيىن 178 مىڭ وتباسىعا 30 ملرد تەڭگە اتاۋلى الەۋمەتتىك كومەك بەرىلدى. ارينە باستاپقى كەزدە قيىنشىلىقتار مەن كەمشىلىكتەر بولدى. سونداي-اق ەلباسى مەن مەملەكەت باسشىنىڭ تاپسىرماسىمەن بارلىق وڭىرلەردى ارالاپ شىقتىق. سول كەزدە ءبىز ەگجەي-تەگجەيلى تۇسىندىرگەن بولاتىنبىز. وتباسىلارعا بارىپ، ولاردىڭ تۇرمىستىق جاعدايلارىن كوردىك"، - دەيدى بەردىبەك ساپاربايەۆ. 

"جاردەماقىنى ءبىز وتباسىنىڭ ايلىق تابىسىنا قاراي جارتى نەمەسە ءبىر جىلعا ەسەپتەيمىز. ەگەر جارتى جىلدىڭ ىشىندە وتباسىنىڭ تابىسى وزگەرەتىن، ياعني كوبەيەتىن بولسا ءبىز جاردەماقىنى توقتاتىن بولامىز. ال زەينەتاقىعا كەلەتىن بولساق، ءبىز ءاردايىم ايتىپ ءجۇرمىز. زەينەتاقى زەينەتكەر ءۇشىن بەرىلەدى. بۇل سولاردىڭ ءوز شىعىندارىن جابۋ ءۇشىن بىرلەدى. قازىرگى تاڭدا زەينەتاقىنىڭ ورتاشا مولشەرى 60 مىڭ تەڭگەدەن اسادى. ەڭ كوبى 100 مىڭ تەڭگە. ياعني بۇل زەينەتكەردىڭ وزىنە جەتكىلىكتى دەۋگە بولادى. باسقا مەملەكەتتەرمەن سالىستىرعاندا ءبىزدىڭ زەينەتاقىنىڭ ورتاشا مولشەرى جامان ەمەس. ءبىراق  ساۋىردەن باستاپ از قامتىلعان وتباسىلارعا، التىن، كۇمىس القا العان انالارعا، مۇگەدەكتەرگە بەرىلەتىن جاردەماقى مەن شاكىرتاقى تابىس كوزى رەتىندە ەسەپتەلىندى. الايدا ءبىز مۇنى الىپ تاستادىق. تەك جەكە قوسالقى شارۋاشىلىقتى ەسەپتەۋ كەزىندە ۇلكەن وزگەرىس ەنەتىن بولادى. الەۋمەتتىك جەلىلەردە "ءبىزدىڭ تاۋىعىمىزدى، جۇمىرتقامىزدى ەسەپتەيدى. ۇيگە كەلىپ توڭازىتقىشىمىزداعى تاماعىمىزدى قارايدى"، - دەپ ايتقاندار بولدى. مۇنىڭ ءبارى دۇرىس ەمەس. ەشكىمنىڭ توڭازىتقىشىڭىزدى نەمەسە ءۇيىڭىزدى تەكسەرۋگە حاقى جوق! مالدى ەسەپتەگەن كەزدە دە مۇقيات بولۋى كەرەك. مىسالى ءبىر ۇيدەگى سيىردان ناقتى پايدا بار ما، جوق پا؟ سيىردان ءسۇت شىقپايتىن بولسا ودان پايدا جوق. سوسىن ءبىر ۇيدە جالعىز سيىر بولسا، ونى بارىپ ولار سويىپ تاستامايتىنى انىق. بۇدان دا پايدا جوق. ياعني شىعىنى دا، پايداسى دا ەسەپتەلۋ كەرەك"، - دەيدى بەردىبەك ساپاربايەۆ. 

مينيستر سۇحبات بارىسىندا ءوزىنىڭ وتكەن كۇندەرىن دە ەسكە الدى. 

"كوپتەگەن جاستار اۋىلعا بارىپ، جۇمىس ىستەگىسى كەلمەيدى. جالاقىسى از دەيدى. ازدان باستاۋ كەرەك. ەگەر سەن جاقسى جۇمىس ىستەپ بۇگىن 50 مىڭ تەڭگە الساڭ، ەرتەڭ 60 مىڭ تەڭگە الاتىن بولاسىڭ. ەندى ءبارىمىز دە جاس بولدىق، ءبارىمىز دە سولاي باستادىق قوي. ەشكىم بىردەن باستىق بولىپ 200-300 مىڭ تەڭگە العان جوق. بارلىعى بىردەن كەلمەيدى عوي. مەن دە "گرۋزچيك" بولدىم. ويتكەنى ماعان جانۇيامدى اسىراۋ كەرەك بولدى"، - دەدى مينيستر. 

دايىنداعان: اسەل بولات قىزى