اتىراۋ وبلىسىنىڭ اكىمى نۇرلان نوعايەۆ جايىق- كاسپيي باسسەيىنىندەگى ءتۇبتازالاۋ جۇمىستارىنىڭ بارىسىمەن، «اق جايىق» تابيعي رەزەرۆاتىنداعى بالىق ءوتۋ ارناسىنىڭ جاي- كۇيىمەن تانىسىپ، بۇرىڭعى «اتىراۋبالىق» زاۋىتىنىڭ دا اۋماعىنا بارىپ قايتقان بولاتىن دەپ جازادى Qamshy.kz اقپارات اگەنتتىگى. 

ءتۇبتازالاۋ جۇمىستارىنىڭ مەردىگەرى «پاۆلودار وزەن پورتى» اق ءوز جۇمىستارىن جايىق وزەنى ساعاسىنداعى يايسكيي كانالى مەن قيعاشتىڭ گانيۋشكين جانە جارقوسىن كانالدارىندا جۇرگىزىپ كەلەدى.

بۇل، كوكتەمدە ۋىلدىرىق شاشۋ ءۇشىن بالىقتاردىڭ وزەنگە وتەتىن نەگىزگى ارنالارى. ولار ون شاقتى جىلدار توڭىرەگىندە تازالانباعان، سونىڭ سالدارىنان تايىزدانىپ كەتىپتى.
«مىناۋ ۋاقتىلى قولعا الىنعان جۇمىستار جانە ولاردىڭ ماڭىزدىلىعى دا وتە جوعارى»،- دەپ اتاپ ءوتتى ايماق باسشىسى.

​تۇبتەرەڭدەتۋ جۇمىستارىنىڭ جالپى ۇزىندىعى بۇل جەردە شامامەن 45،5 كم. قۇرايدى. ونىڭ ۇستىنە، تەڭىز باعىتىنا قاراي تەرەڭدىگى 2،5 مەتر، ەنى 25 مەتردى قۇرايتىن جاڭا كانالدىڭ قۇرىلىسى قاراستىرىلعان.

وسى ساپار قورىتىندىسىمەن وبلىس اكىمى نۇرلان نوعايەۆ «اق جايىق» تابيعي رەزەرۆاتى اۋماعىندا ءتۋريزمدى دامىتۋ جانە قوسىمشا باقىلاۋ قوسىندارىن ورناتۋ جونىندە تاپىرمالار بەردى. قوسىنداردى ورناتۋ سوڭعى ازىردە جيىلەپ كەتكەن دالا ورتتەرىنىڭ جانە بالىق ساۋداسىنىڭ زاڭسىز اينالىمىنىڭ الدىن الۋعا سەپتىگىن تيگىزەدى.

— شىعىندى از تالاپ ەتەتىن بۇل قۇرىلىم رەزەرۆات قىزمەتكەرلەرىنىڭ جۇمىسىن ءارى جەڭىلدەتىپ، ءارى تيىمدىلىگىن ارتتىرادى. ونىڭ ۇستىنە، الىس قاشىقتىقتى دا قاداعالاۋعا مۇمكىندىك بەرەتىن ارنايى درونداردى ساتىپ الۋدى دا قاراستىرىڭىزدار. ءبىراق، بۇنىڭ بارلىعى دا جەرگىلىكتى اڭ مەن قۇستارعا كەسەلى مەن كەدەرگىسىن تيگىزبەۋى كەرەك. سەرىك جامبىل ۇلى، وسى جىلدىڭ سوڭىنا دەيىن قوسىمشا قاداعالاۋ قوسىندارىن سالۋ مەن درونداردى ساتىپ الىپ بەرۋ جاعدايىن ويلاستىرىڭىز،- دەپ اكىم تاپسىرما بەردى.
«اق جايىق» تابيعي رەزەرۆاتىنىڭ باسشىسى نۇربولات كارىموۆتىڭ سوزىنە قاراعاندا، وبلىس اكىمىنىڭ ءتۋريزمدى دامىتۋ باعىتىنداعى تاپسىرمالارىن ورىنداۋ بارىسىندا، رەزەرۆات اۋماعىندا بىرنەشە تۋريستىك باعىتتار جاساقتالىپ جاتقان كورىنەدى. سونىمەن قاتار، بالىق قورعاۋ بويىنشا دا كوپتەگەن شارالار جۇزەگە اسىرىلىپ، «بەكىرە- 2019» الدىن الۋ- جەدەل ارەكەتتەرى بويىنشا دا بەكىتىلگەن ىستەر اتقارىلىپ كەلەدى ەكەن.

— «بەكىرە-2019» شاراسى باستالعاننان بەرى بالىق ساۋداسىنىڭ زاڭسىز اينالىمىنا قاتىستى اكىمشىلىك قۇقىقبۇزۋشىلىق باعىتىندا 49 فاكتى تىركەلگەن. مىسالى، وتكەن جىلدىڭ وسى كەزەڭىمەن سالىستىرعاندا 26 فاكتى انىقتالدى. ونىڭ ىشىندە، ۋىلدىرىق شاشۋ كەزىندە بالىق اۋلاۋ مەن رەزەرۆات اۋماعىندا بولۋ سەكىلدى جاعدايلار دا تىركەلگەن. تۋريستك باعىتتارعا كەلەر بولساق، قورىقتىق ايماقتا بىزدەر ارنايى سۇرلەۋ جولدار جۇرگىزگەنبىز. قىزمەتكەرلەرىمىزدىڭ كومەگىمەن تۋريستەر رەزەرۆات اۋماعىندا سەرۋەندەپ، ارنايى موتورلى قايىقتارمەن كاسپيي تەڭىزىنە دە شىعۋعا مۇمكىندىك قاراستىرىلعان. سونىمەن قاتار، ارنايى بەلگىلەنگەن جەرلەردە سالماعى بەس كەلىدەن اسپايتىن بالىقتاردى دا قارماققا اۋلاۋ رۇقسات ەتىلگەن. رەزەرۆاتقا زور قىزىعۋشىلىقتى شەت ەلدىك تۋريستەر تانىتىپ وتىر. ءقازىر ينفراقۇرىلىمدى دامىتۋ جاعىن قاراستىرۋدامىز، - دەيدى نۇربولات كارىموۆ. 

بۇرىڭعى «اتىراۋبالىق» زاۋىتىنا بارعان كەزدە انىقتالعانىنداي، ءقازىر كاسىپورىننىڭ بالانستىق قۇنىن انىقتاۋ شارالارى جۇرگىزىلىپ جاتقان كورىنەدى. سىرتتاي قاراعاننىڭ وزىندە دە، زاۋىت نىساندارى مەن عيماراتتارى تۇرعىندارعا ءقاۋىپ ءتوندىرىپ تۇرعانى بايقالدى. اپاتتى عيماراتتار قۇلاۋدىڭ از – اق الدىندا تۇر. 
بوس قالعان كاسىپورىن اۋماعىندا ايماق باسشىسى سيستەرنالاردان مازۋتتىڭ توگىلىپ جاتقانىنا نازار اۋدارتتى.

— بۇل جايىق وزەنى جاعاسىنا تاياۋ جەر، اعىلىپ جاتقان ماي تابيعاتقا زيانىن تيگىزۋدە. ءسىزدىڭ قىزمەتتىك ماقساتىڭىزدىڭ قۇزىرىنا ورىن العان كەمشىلىكتەردى انىقتاۋ عانا ەمەس، سولاردى جويۋ دە كىرەدى. تابيعاتقا كەلتىرىلگەن ەلەۋلى نەمەسە ەلەۋسىز زالالدىڭ بولمايتىنى تۋرالى جاۋاپكەرشىلىكتى ءجىتى تۇسىنگەن ابزال. تابيعاتقا كەلتىرىلگەن زالال- ورنى تولمايتىن نەمەسە زالاسىزداندىرىلۋى وتە كۇردەلى اپاتتار. تاياۋ ارادا جەردى مازۋتتان تازالاۋعا دايىنداۋ قويۋ كەرەك،- دەدى نوعايەۆ.

اتىراۋ قالاسىنىڭ اكىمى اليمۇحاممەد قۇتتىمۇرات ۇلى ناقتىلاعانىنداي، بۇرىڭعى بالىق وڭدەۋ زاۋىتىنىڭ اۋماعى قالالىق اكىمدىككە قارايدى ەكەن، بالانستىق قۇنى انىقتالعان سوڭ، مۇندا جاڭا ىقشام اۋدان سالىنۋ جوسپارلانۋدا ەكەن.

ۇسىنعان: اسەل بولات قىزى