ديماش ساياساتتان اۋلاق بول! ديماش ۇلىم! ساعان ءبىر ايتارىم، سەن ءقازىر الەم بىلگەن ءانشىسىڭ. سەن ساياساتكەر ەمەسسىڭ. سەن ەلىڭە ونەرىڭ مەن انىڭمەن قىزمەت ەت! ساياساتتان اۋلاق بول! ەش قانداي پارتياعا، ساياسي قوزعالىستارعا مۇشە بولما! سەنىڭ پارتياڭ قازاق حالقى! سەنىڭ يدەياڭ قازاقتىڭ ونەرى، ونىڭ قۇندىلىقتارى!
پرەزيدەنت سايلاۋىنا ءتۇسىپ جاتقان ەشبىر كانديتاتتى قولداپ، كونسەرتىنە قاتىسپا! ەلدەگى كورەرمەندەرىڭنىڭ كوبىنەن ايرىلاسىڭ!
مەن سەنىڭ ەسىڭە ساياساتتىڭ قۇربانى بولعان الەم بىلەتىن انشىلەردى سالايىن. ۇلى ءانشى ماريو لانس يتاليانىڭ مافيوزىنا قارسى كەلگەنى ءۇشىن، امەريكالىق ءانشى دين ريد — اتومعا جانە ۆەتنامداعى سوعىسقا قارسى بولعانى ءۇشىن، ۆيكتور حارا چيليدەگى پينوچەتتىڭ اسكەري توڭكەرىسىنە قارسى بولعانى ءۇشىن، روك - ءانشى تالكوۆ رەسەيدەگى ساياساتقا قارسى ساياسي اندەر مەن ولەڭدەر جازعانى ءۇشىن قۇربان بولعان. بۇل ءتىزىمدى جالعاستىرا بەرۋگە بولادى.
مەن قازاقتىڭ ەكى ۇلى ءانشىسىنىڭ ساياساتتىڭ قۇربانى بولعانىن ەسىڭە سالايىن. ۇلى ءانشى امىرە پاريجگە بارعاندا الاشتىڭ ارىسى مۇستافا شوقايمەن كەزدەسىپ، ونىڭ سالەمىن ەلگە جەتكىزگەنى ءۇشىن، ءومىر بويى اڭدۋدا بولىپ، تالاي تەرگەۋ مەن قيناۋدى باسىنان وتكىزىپ، ازاپتى قىسقا عۇمىر كەشىپ، قۇپيا جاعدايدا قايتىس بولعان. ۇلى ءانشى سوۆەت وكىمەتىنەن اتاق پەن وردەن ءتۇرماق، ءبىر مەدال الماعان.
ۇلى ءانشى كۇلاش جوعارى سوۆەتتىڭ دەپۋتاتى بولىپ ءجۇرىپ ءوزىنىڭ شىندىقتى ايتاتىن تۋرا مىنەزى بيلىكتىڭ "كوزىنە" ءتۇسىپ، قىسىمعا الىنىپ، سونىڭ كەسىرىنەن شەت ەلگە شىعۋعا جولى جابىلىپ، ماسكەۋدە قوناق ۇيدە قۇپيا جاعدايدا قايتىس بولعان.
بىزدە وسى كەزدىڭ وزىندە ساياسي كوزقاراسى ءۇشىن قۋدالاۋعا ءتۇسىپ جۇرگەن قانشاما ونەردىڭ، ادەبيەتتىڭ تۇلعالارى بار. زامان ءبىر ورنىندا تۇرمايدى، ءبارى وزگەرەدى.
ءبىز ءقازىر بالا كەزىمىزدە: - كۇن سونەدى، لەنين سونبەدى! اي سونەدى، لەنين سونبەيدى! - دەپ، ءان سالىپ، وكتيابر توڭكەرىسىنە، كوممۋنيستىك پارتياعا ارناپ ولەڭ جازعانىمىزعا ۇيالامىز. ءقازىر ۇلى اقىندارىمىز بەن ۇلى جازۋشىلاردىڭ، ۇلى كومپوزيتورلاردىڭ لەنينگە، ماركسكە، ستالينگە ارناپ جازعان شىعارمالارىن جاس ۇرپاقتان جاسىرىپ، ولاردىڭ كىتاپتارىنىڭ "كوزىن قۇرتىپ" جاتىرمىز. قوعام وزگەرەدى، بۇگىنگى كۇننىڭ كوسەمىنە، استاناعا ارناپ جازعان ولەڭدەرىمىزبەن، اندەرىمىزدەن ۇرپاق الدىندا ۇيالاتىن كۇن تۋادى. سول ۇشىندە مەن ساعان ساياساتتان الىس بول! - دەيمىن! جاعىمپازدىق بىزبەن كەتسىن.
ايمۇحانبەت بەيسەمبەكوۆتىڭ فەيسبۋك پاراقشاسىنان الىنعان
ۇسىنعان: اسەل بولات قىزى
