ءبىلىم بەرۋ سالاسى قىزمەتكەرلەرىمەن وتكەن جينالىس بارىسىندا اتىراۋ وبلىسىنىڭ اكىمى نۇرلان نوعايەۆ قازىرگى جاعداي تۇبەگەيلى شارالاردى تالاپ ەتىپ تۇرعانىن اتاپ ءوتتى، - دەپ حابارلايدى Qamshy.kz اقپارات اگەنتتىگى اتىراۋ وبلىستىق وڭىرلىك كوممۋنيكاسيالار قىزمەتىنىڭ دەرەگىن نەگىزگە الىپ.

نۇرلان نوعايەۆ ايماقتاعى ءبىلىم بەرۋ ساپاسىنىڭ كوڭىل كونشىتپەيتىنىن ايتتى.

— بۇل اڭگىمە ليسەيلەر مەن گيمنازيالارعا دا قاتىستى. ول جەرلەردە ناعىز لايىقتى شاكىرتتەر وقۋلارى ءتيىس. «ەكىگە»، «ۇشكە» وقيتىنداردى شىعارۋ كەرەك. گيمنازيالار مەن ليسەيلەردىڭ ەرەكشەلىكتەرى دە سول. الايدا، Telegram چاتتا ماعان كەلگەن حاتتاردىڭ اراسىندا ليسەيلەر مەن گيمنازيالاردا ديرەكتورلارعا، مۇعالىمدەرگە قىسىم كورسەتىپ، جاقسى باعا قويۋدى سۇرايتىن «پىسىق» اتا-انالاردىڭ ۇشكە وقيتىن بالالارى بار ەكەنى تۋرالى جازعان، - دەدى نۇرلان نوعايەۆ.

اتىراۋ وبلىسىنىڭ اكىمى ءبىلىم بەرۋ باسقارماسىنىڭ باسشىلىعىنا ءار وقۋ ورنىنداعى جاعدايعا جەتە ءمان بەرىپ، جان-جاقتى تەكسەرۋ جۇرگىزۋدى تاپسىردى.

— وقۋ ورىندارىندا ءبىلىم ساپاسىنىڭ تومەندەپ كەتكەنى تۋرالى شاعىمدار كوپ. مۇنى توقتاتۋ كەرەك. ءبىلىم بەرۋ سالاسىنداعى جاعدايدى تۇبەگەيلى وزگەرتۋ قاجەت. ءار ليسەي مەن گيمنازياعا تەكسەرۋ جۇرگىزۋ كەرەك، - دەپ اتاپ ءوتتى نۇرلان نوعايەۆ.

ايماق باسشىسى ءبىلىم بەرۋ باسقارماسىنىڭ باسشىسىنا ليسەيلەر مەن گيمنازيالارداعى جاعدايعا مونيتورينگ جۇرگىزۋدى تاپسىردى. ەگەر ليسەي نەمەسە گيمنازيا ساپالى جانە قاجەت ءبىلىم بەرمەسە، جالپى ءبىلىم بەرەتىن مەكتەپ مارتەبەسىن قايتارىپ بەرۋ كەرەك.
ءبىلىم بەرۋ باسقارماسى باسشىسىنىڭ مىندەتىن اتقارۋشى جانسۇلۋ تورەمۇراتوۆا قازىرگى ۋاقىتتا جاسالىپ جاتقان جۇمىستار جايلى باياندادى.

— ءار مەكتەپ ديرەكتورىنا وقۋشىلاردىڭ اتا-انالارىمەن تىعىز بايلانىستا بولۋ تاپسىرىلدى، مەكتەپتەر اشىق جانە قولجەتىمدى بولۋى ءتيىس. اتا-انالارمەن ءوزارا بايلانىستا بولۋ ارقىلى ءبىلىم ساپاسىن جوعارىلاتۋعا قول جەتكىزە الامىز، - دەدى ج.تورەمۇراتوۆا.

نۇرلان نوعايەۆ بۇل باستامانى قولداپ، تۇجىرىمداما دايىنداپ، ءبىلىم بەرۋ سالاسى قىزمەتكەرلەرىن، پەداگوگتار مەن ديرەكتورلاردى اتتەستاسيادان وتكىزۋدى تاپسىردى.

— سوڭعى ۋاقىتتا ءبىلىم بەرۋ ساپاسىنا قاتىستى شاعىمدار كوبەيىپ كەتتى. ءبىزدىڭ وبلىسىمىز رەسپۋبليكا بويىنشا تومەن كورسەتكىش كورسەتتى. Telegram چاتتا تۇرعىندار ءجيى ارىزدانادى. پەداگوگتارعا، بارلىق ءبىلىم بەرۋ سالاسىنىڭ قىزمەتكەرلەرىنە اتتەستاسيا وتكىزۋدى جانە «كەزدەيسوق» ادامداردان ارىلتۋدى تاپسىرامىن، - دەدى نۇرلان نوعايەۆ.

جينالىس بارىسىندا وبلىس اكىمى Telegram قوسىمشاسىنداعى «اتىراۋ وبلىسىنىڭ اكىمدىگى» چات-كانالىنا اتا-انالاردان كەلىپ تۇسكەن شاعىمداردى وقىدى.

— سونىڭ ءبىرى – اقىلى قاشىقتىق وليمپياداسى. مۇعالىمدەر ۇگىت جۇمىستارىن جۇرگىزبەۋلەرى كەرەك، ەگەر اتا-انا ءوزى قالاسا، اقشاسىن تولەپ، بالاسىن قاتىستىرا الادى. مەكتەپتە ەشقانداي الىم-سالىق بولماۋى ءتيىس. جىل سايىن ءبىلىم بەرۋ سالاسىنا كوپ كولەمدە قاراجات بولەمىز، مەكتەپتەردە اقشا جينالماۋى كەرەك. بارىنە وسىنى تاپسىرامىن،-دەدى ايماق باسشىسى.

اتىراۋ وبلىسىنىڭ ءبىلىم سالاسىنداعى باقىلاۋ دەپارتامەنتىنىڭ جۇمىسىنا قاتىستى دا كوپ ساۋالدار قويىلدى. دەپارتامەنتتىڭ باسشىسىمەن قوسا بارلىق قىزمەتكەرلەرى بالالارعا ءبىلىم بەرۋ پروسەسىنە بەلسەندى قاتىسىپ، ۇسىنىستارىن ايتىپ، مەكتەپتەردە وقۋ پروسەسىنىڭ دۇرىس بولۋىن قاداعالاۋلارى قاجەت ەكەنى جايلى ايتىلدى.

وبلىس اكىمىنىڭ ءبىرىنشى ورىنباسارى سەرىك شاپكەنوۆ جەكەمەنشىك بالاباقشالار جايىن قوزعادى. بۇگىندە ايماقتا ناقتى قانشا جەكەمەنشىك بالاباقشا بارى بەلگىسىز.

— وكىنىشكە قاراي، بىزدە ناقتى قانشا بالاباقشا بارىن، قانشاسى تىركەۋسىز جۇمىس ىستەپ جاتقانىن بىلمەيمىز. تەك مەملەكەتتىك ورگاندارعا كەلىپ تىركەلىپ، مەملەكەتتىك تاپسىرىس العاندارى عانا بەلگىلى. پروبلەما بار. مەملەكەتتىك تاپسىرىس العان بالاباقشالار اي سايىنعى اقىسىن كوتەرىپ جىبەرەدى، بۇلاي بولماۋى ءتيىس. زاڭ بويىنشا تەكسەرۋ جۇرگىزىپ، جاعدايدى باقىلاي المايمىز. بۇل جۇمىسپەن ءبىلىم بەرۋ سالاسىنداعى باقىلاۋ دەپارتامەنتى اينالىسۋى ءتيىس، ءبىراق ماسەلە سول وزەكتى كۇيىندە قالىپ تۇر. مەن وسى ىسكە پروكۋراتۋرانىڭ ارالاسىپ، ناقتى قۇقىقتىق باعاسىن بەرۋىن سۇرايمىن، -دەدى سەرىك شاپكەنوۆ.