الەۋمەتتىك جەلىلەردە كوپقاباتتى ءۇيدىڭ دالىزىندە كىشكەنتاي بالانىڭ سومكەسىن تارتىپ الۋعا ۇمتىلىس جاساعان ايەل ادامنىڭ باقىلاۋ كامەراسىنا تۇسكەن ۆيدەوسى كەڭىنەن تارالۋدا دەپ حابارلايدى Qamshy.kz اقپارات اگەنتتىگى Zakon.kz سايتىنا سىلتەمە جاساپ.

جەلى قولدانۋشىلارى العاشىندا بۇل وقيعانى نۇر-سۇلتان نەمەسە الماتى قالاسىندا بولدى دەپ بولجاعان. شىن مانىسىندە، اتالمىش كەلەڭسىزدىك قىزىلوردا قالاسىندا ورىن الىپتى.

ۆيدەودا 9-10 جاسار بالانىڭ ارتىنان دالىزگە كىرگەن ايەل ادامنىڭ ونىمەن تىلدەسىپ، ارتىنشا سومكەسىن تارتقىلاعانى انىق كورىنەدى. ءبىرشاما ۋاقىتتان كەيىن جوعارى قاباتتان بالانىڭ اناسى (بولجام بويىنشا) ءتۇسىپ، سومكەنى قايتارۋعا ۇمتىلادى. ءبىراق الگى ايەلدىڭ ونى وڭايلىقپەن بەرەر ءتۇرى بايقالمادى. تەك سىرتتان كىرگەن ەر ادامنىڭ ىسكە ارالاسۋىمەن عانا بالانىڭ سومكەسى يەسىنە قايتارىلعان.

جەلى قولدانۋشىلارى بۇل وقيعانى ءساتسىز شىعىپ قالعان "بالا ۇرلاۋ وپەراسياسى" دەپ اتاۋدا.

"2019 جىلدىڭ 16-جۇلدىزىندا، كەشكى ساعات 20:40 شاماسىندا وبلىس ورتالىعىنداعى كوپقاباتتى ۇيلەردىڭ بىرىندە ىشىمدىك ىشكەن ايەل كامەلەت جاسقا تولماعان بالانىڭ سومكەسىن تارتىپ الۋعا ۇمتىلدى. سونداي-اق، زاڭعا قايشى ارەكەتكە ۇمتىلعان ايەل تۇرعىنداردىڭ كومەگىمەن قولعا ءتۇستى. ءقازىر ق ر قك 191 باپتىڭ 1-تارماعى جانە 24-باپتىڭ 3-تارماعى بويىنشا سوتقا دەيىنگى تەرگەۋ-تەۋسەرۋ جۇمىستارى ءجۇرىپ جاتىر"، - دەپ مالىمدەمە جاسادى قىزىلوردا وبلىستىق پوليسيا دەپارتامەنتىنىڭ باسپا ءسوز قىزمەتى.

ۇسىنعان: ادىلەت مادەنيەت