الماتى وبلىسىندا قاراقشىلىقپەن اينالاسقان قىلمىستىق توپ ۇستالدى. قىلمىسكەرلەر تولەم تەرمينالدارىن ۇرلاۋمەن اينالىسقان دەپ جازادى Qamshy.kz اقپارات اگەنتتىگى zakon.kz سايتىنا سىلتەمە جاساپ.

پوليسيا دەپارتامەنتىنىڭ مالىمدەۋىنشە، بۇرىن تۇرمەدە وتىرىپ شىققان 5 ەر ادام تالعار مەن ەڭبەكشىقازاق اۋداندارىندا 2019 جىلدىڭ ناۋرىز-مامىر ايلارىنىڭ ارالىعى 9 ۇرلىق جاسادى.  

“توپ مۇشەلەرى – جاس جىگىتتەر. ۇلكەنى – 28 جاستا، ال ەڭ كىشىسى 21 جاستا. بارلىعى تالعار اۋدانىنىڭ تۇرعىندارى. 9 جاعدايدا دا تولەم تەرمينالدارىن ۇرلاعان. بىرنەشە ۇرلىق بەينەكامەرالارعا ءتۇسىپ قالدى. ولاردىڭ قوقىسقا لاقتىرعان 2 تەرمينالى زاتتاي دالەل رەتىندە ىسكە قوسىلدى. جابىرلەنۋشىلەرگە قانشا شىعىن اكەلگەنى ەسەپتەلۋدە”، - دەيدى الماتى وبلىسى پوليسيا دەپارتامەنتى باسپا ءسوز قىزمەتىنىڭ وكىلى.

5 كۇدىكتى دە ۋاقىتشا يزولياتوردا وتىر. سوتقا دەيىندى تەرگەۋ ءجۇمىستارى تالعار اۋداندىق پوليسياسىنىڭ قولىندا. سونىمەن قاتار، كۇدىكتىلەردىڭ باسقا دا قىلمىسقا قاتىسى بارى تەكسەرىلۋدە.