بۇل تۋرالى تەكسەرۋ كوميتەتىنىڭ ءتوراعاسى رۋسلان بەكتەمىر ايتتى، دەپ حابارلايدى وڭىرلىك كوممۋنيكاسيالار قىزمەتى.

2018 جىلى اتىراۋ وبلىسىنىڭ اكىمدىگى جەرگىلىكتى مەكتەپ تۇلەكتەرىنە ءبىلىم بەرۋ، دەنساۋلىق ساقتاۋ، اۋىل شارۋاشىلىعى، جەڭىل ونەركاسىپ سالالارىندا مامان دايىنداۋعا جەرگىلىكتى بيۋدجەت ەسەبىنەن جوو-نا 231 گرانت بولگەن بولاتىن.

2019 جىلى اتىراۋ وبلىسىنىڭ اكىمدىگى العاش رەت وسى ماماندىقتارمەن قاتار "مەملەكەتتىك اۋديتور" ماماندىعىنا جەرگىلىكتى بيۋدجەتتەن 10 ءبىلىم گرانتىن بولەدى.

اتىراۋ وبلىستىق تەكسەرۋ كوميسسياسىنىڭ ءتوراعاسى رۋسلان بەكتەمىردىڭ ايتۋىنشا، ايماقتا مەملەكەتتىك اۋديت پەن قارجىلىق باقىلاۋ ورگاندارىندا مامان تاپشىلىعى بار.

-وسىعان بايلانىستى ءبىلىم بەرۋ باسقارماسىمەن بىرلەسىپ، كاسىپتىك-تەحنيكالىق، ورتا جانە ورتا-ارنايى ءبىلىم بەرۋ مەكەمەلەرىنىڭ تۇلەكتەرى اراسىندا ءاقپاراتتىق-تۇسىندىرۋ جۇمىستارىن جۇرگىزىپ جاتىرمىز. ماقسات- وبلىس اكىمىنىڭ "مەملەكەتتىك اۋديتور" ماماندىعى بويىنشا مەملەكەتتىك گرانتىنا ۇمىتكەرلەردى دايىنداۋ جانە ىرىكتەۋ،- دەيدى ر.بەكتەمىر.-بۇل شارا وڭىردەگى مەملەكەتتىك اۋديت پەن قارجىلىق باقىلاۋ سالاسىندا بىلىكتى مامانداردىڭ تاپشىلىعىن ازايتۋعا باعىتتالعان، جەرگىلىكتى مامانداردى وقىتۋدىڭ ەكونوميكالىق تيىمدىلىگى دە بار.