نۇر-سۇلتان قالاسىندا سۋعا باتىپ بارا جاتقان قىزدى قۇتقارۋ كەزىندە قازا تاپقان اسكەري قىزمەتكەر ەرلان رايىمقۇلوۆ ماراپاتتالماق دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.

"پرەزيدەنت – جوعارعى باس قولباسشى قاسىم-جومارت توقايەۆ كىشى سەرجانت ەرلان رايىمقۇلوۆتى «جاۋىنگەرلىك ەرلىگى ءۇشىن» توسبەلگىسىمەن ماراپاتتاۋ تۋرالى جارلىققا قول قويدى»، - دەپ مالىمدەدى ق ر اۋە قورعانىس كۇشتەرىنىڭ باسپا ءسوز قىزمەتى.

ماراپاتتى 22-مامىردا اۋە قورعانىس كۇشتەرىنىڭ باس قولباسشىسى، گەنەرال-مايور نۇرلان قاربەنوۆ مارقۇمنىڭ ايەلىنە تابىستايدى.

"دوستارى مەن ارىپتەستەرى ونى باۋىرمال جانە اينالاسىنداعىلاردىڭ ماسەلەسىنە بەيجاي قارامايتىن جاقسى جان ەدى دەپ ەسكە الادى. ول ۇلگىلى اكە بولا ءبىلدى. اكەلەرىنىڭ ەرلىك ىستەرىن ماقتانا ايتىپ جۇرەتىن ەكى ۇل تاربيەلەدى"، - دەلىنگەن حابارلامادا.

ەستەرىڭىزگە سالا كەتەيىك، قايعىلى وقيعا 10-مامىر كۇنى ساعات 12.10-دا ەسىل وزەنىنىڭ "گازماشاپپاراتۋرا" ساياجاي اۋماعىندا ورىن العان. سۋعا باتقان ءيتىن قۇتقارۋعا تىرىسقان قىز بالانىڭ ءوزى دە وزەنگە باتادى. وزەن جاعاسىندا بالىق اۋلاپ وتىرعان ەر ادام قىزدى قۇتقارىپ قالدى. الايدا، 1981 جىلى تۋىلعان ەر ادام اعىسقا توتەپ بەرە الماي، سۋعا تۇنشىعىپ كوز جۇمعان ەدى.