مۇحتار جاكىشيەۆتىڭ تار قاپاستا وتىرعانىنا 10 جىل بولدى. 

ول 2009 جىلى مامىردا ۇستالعان سوڭ سىبايلاس جەمقورلىق قىلمىسىن جاسادى دەپ ايىپتالىپ، 14 جىلعا سوتتالعان. ول جازاسىن وتەۋگە الدىمەن الماتى وبلىسىنداعى زارەچنىي كەنتىندەگى تۇرمەگە جىبەرىلگەن، كەيىن قاراعاندى وبلىسىنىڭ دولينكا كەنتىندەگى قاتاڭ رەجيمدەگى اك-159/6 كولونياسىندا بولدى. 2015 جىلى تۋىستارى، ادۆوكاتى مەن قۇقىق قورعاۋشىلاردىڭ ءوتىنىشىنىڭ ارقاسىندا ول دولينكادان قايتا زارەچنىيعا جىبەرىلگەن. ءبىراق 2017 جىلى ۇقك-نىڭ بۇرىنعى ءتوراعاسى نارتاي دۇتبايەۆتىڭ ىسىنە قاتىستى تەرگەۋ ىسىنە قاتىسۋ ءۇشىن استانا قالاسىنىڭ يزولياتورىنا ەتاپپەن جىبەرىلگەن. تەرگەۋ ءىسى اياقتالعان سوڭ مامىر ايىندا دولينكاعا، ال شىلدە ايىنان بەرى سەمەي قالاسىنداعى قاتاڭ رەجيمدەگى كولونيادا جازاسىن وتەپ جاتىر.

ەسكە سالا كەتسەك، «قازاتومپروم» ەكس-باسشىسىنىڭ ادۆوكاتى نۇرلان بەيسەكەيەۆ سوڭعى مەديسينالىق تەكسەرىلۋدەن سوڭ ونىڭ باس مي جۇيەسىندە اقاۋ بار ەكەنى انىقتالعانىن ايتقان بولاتىن.  كەيىن بىلتىرعى جىلدىڭ 17 شىلدەسىندە جاكىشوۆتى قاراعاندى وبلىسىنداعى كولونيادان شقو-وبلىسى سەمەي قالاسىنداعى قاتاڭ رەجيمدى كولونياعا اۋىستىردى. وسىنىڭ سەبەبىنەن مۇحتار جاكىشيەۆتىڭ دەنساۋلىعى تاعى دا ناشارلاي ءتۇستى.

ال جازدا ونىڭ جاعدايى مۇلدەم اسقىنا باستادى. جاكىشيەۆ ءۇشىنشى توپتاعى مۇگەدەك قاتارىنا قوسىلىپ، جۇمىس جاساۋ قابىلەتىنىڭ 50 پايىزىنان ايىرىلدى. سونىمەن بىرگە مۇحتار جاكىشيەۆتىڭ جوعارى قان قىسىمنىڭ كەسىرىنەن كوزدىڭ ىشكى تور قابىعى جارىلىپ كەتكەن. كۇز  مەزگىلىندە قاراعاندى قالاسىندا جاكىشيەۆتىڭ كوزىنە وپەراسيا جاسالدى. 

بۇل از بولعانداي، قىركۇيەك ايىندا مۇحتار جاكىشيەۆتىڭ اناسى قاتتى سىرقاتتانىپ قالدى. جاكىشيەۆ ءحال ۇستىندە جاتقان ناۋقاس اناسىمەن كەزدەسۋىنە رۇقسات بەرۋىن سۇراپ، ءوتىنىش جازدى. الايدا 18 قىركۇيەكتە مۇحتار جاكىشيەۆتىڭ اناسى قايتىس بولدى. كەيىن قارالى حاباردى ەستىگەن مۇحتار جاكىشيەۆ اناسىن سوڭعى ساپارعا شىعارىپ سالۋدى سۇراپ، ءوتىنىش جازدى. ءبىراق وعان مۇنداي مۇمكىندىك بەرىلمەدى. 

بيىل 21 مامىردا جاكىشوۆتىڭ تۇرمەدە وتىرعانىنا 10 جىل بولدى. وسىعان قاتىستى الەۋمەتتىك جەلى قولدانۋشىلارىنىڭ پىكىرىن Qamshy.kz اقپارات اگەنتتىگى وقىرمان نازارىنا ۇسىنادى. 

دوسىم ساتپايەۆ: "مۇحتار جاكىشيەۆتىڭ تار قاپاستا وتىرعانىنا 10 جىل. وسى جىلدار ارالىعىندا ونىڭ دەنساۋلىعى كۇرت ناشارلادى. الايدا ونى سوت مەرزىمىنەن بۇرىن بوساتۋدان باس تارتتى. دەگەنمەن بۇل قۇقىقتى ەكسترەميستىك ارەكەتى ءۇشىن سوتتالعان ازاماتتاردىڭ ءوزى قولدانا الادى. ال بيلىك ولاردان (ەكسترەميستەردەن رەد.) اۋرۋى اسقىنعان ادامدى ءقاۋىپتى دەپ سانايدى. پرەزيدەنتتىككە كانديداتتاردىڭ كوپشىلىگى ساياسي تۇتقىندار تۋرالى ءسوز قوزعاماۋىنىڭ ءوزى تۇسىنىكتى جايت. كانديداتتار بۇل تۋرالى ءسوز قوزعاماۋعا تىرىسسا دا، بۇل تاقىرىپ ءوز ماڭىزىن جوعالتقان جوق". 

روزا تۇردىمۇراتوۆا: جۇرەگىندە ار-وجدانى بار ءار ازامات ونىڭ بوستاندىققا شىققانىن قالايدى. ول ءوز بالالارىنا قاجەت. ول قازاقستانعا قاجەت. ءبىزدىڭ ماقساتىمىز – بۇل ماسەلەنىڭ وزەكتىلىگى مەن ماڭىزدىلىعىن كورسەتۋ، سۇمىرايلاردىڭ كۇندەلىكتى "باس اۋرۋىنا" اينالدىرۋ. مۇنىڭ وڭاي ەمەس ەكەنىن بىلەمىن. الايدا مۇمكىن ەمەس دۇنيە جوق! 

گۇلميرا تىكيبايەۆا: پاتريوت بولعانى ءۇشىن 10 جىل اباقتىدا وتىر. ونىڭ قازىرگى جاعدايى وتە اۋىر. وعان مەديسينالىق كومەك قاجەت. مۇحتار جاكىشوۆ بوستاندىققا شىقسىن!

كوپشىلىك پرەزيدەنت سايلاۋىنان كەيىن ەل جاكىشيەۆتىڭ بوستاندىققا شىعاتىنىنان ءۇمىتتى. 

وقي وتىرىڭىزدار: 

♦جاكىشيەۆ اناسىن جوقتاسا، حالىق جاكىشيەۆتى "جوقتاۋدا"