شقو-دا تاعى ءبىر قۇس فابريكاسى سالىنۋى مۇمكىن دەپ حابارلايدى Qamshy.kz اقپارات اگەنتتىگى التاينيۋس تىلشىسىنە سىلتەمە جاساپ.
بۇل تۋرالى وبلىسقا رەسمي ساپارمەن كەلگەن شىڭجان ۇيعىر اۆتونومياسى، حالىق ۇكىمەتى ءتوراعاسىنىڭ ورىنباسارى چجاو چۋنسزيۋمەن كەزدەسۋدە ايماق باسشىسى دانيال احمەتوۆ ءمالىم ەتتى.
ايتا كەتەيىك، شىعىس قازاقستانعا ساپارى بارىسىندا چۋنسزيۋ مىرزا باستاعان قىتايلىق دەلەگاسيا د.سەرىكبايەۆ اتىنداعى شقمتۋ-دا، سونىمەن قاتار ءۇلبى مەتاللۋرگيالىق زاۋىتىندا بولىپ، ونداعى جۇمىسپەن تانىسىپ قايتقان. شەتەلدىك قوناقتار وبلىسقا ساپارىنىڭ باستى ماقساتى ءبىرقاتار سالاداعى بىرلەسكەن جوبالاردى جۇزەگە اسىرۋ جاعىن تالقىلاۋ بولعانىن ايتتى. اسىرەسە اۋىل شارۋاشىلىعى سالاسى قىزىقتىراتىنىن جاسىرمادى. ايماق باسشىسى دانيال احمەتوۆ تە شىعىس قازاقستان وبلىسى ءۇشىن بۇل اگروسەكتوردەگى ارىپتەستىك اسا ماڭىزدى ەكەنىن جەتكىزىپ، قوناقتار نازارىنا بىرنەشە جوبانى ۇسىندى.
–وبلىسىمىزدا جاڭا قۇس فابريكاسىن سالۋدى جوسپارلاۋدامىز. بۇل – اۋقىمدى جوبا. اتالمىش ماقساتقا 40 مىڭ گەكتار جەر بولەمىز. تاعى 300 گەكتارعا جۋىق تەلىمدە فابريكانىڭ نەگىزگى بازاسى ورنالاساتىن بولادى. جوسپار بويىنشا كاسىپورىن جىلىنا 30 مىڭ توننا قۇس ەتىن ءوندىرۋى ءتيىس. مىنە، وسى ءبىر جوبانى جۇزەگە اسىرۋعا سىزدەر دە اتسالىسساڭىزدار دەگەن تىلەگىمىز بار. جالپى، ءبىزدىڭ وبلىستا اۋىل شارۋاشىلىعى سالاسىندا جەمىستى ەڭبەك ەتىپ جاتقان بىرنەشە بىرلەسكەن قازاق-قىتاي كاسىپورىنى بار. ماسەلەن، كوكپەكتى اۋدانىندا قۇرىلعان ءدال وسىنداي كومپانيانىڭ ءبىرى بۇگىندە جۇڭگو ەلىنە بالىق ونىمدەرىن ەكسپورتتاۋمەن اينالىسۋدا. سول سياقتى بەسقاراعاي، ءۇرجار اۋداندارىندا دا بىرلەسكەن كاسىپورىندارىمىز ناتيجەلى جۇمىس جۇرگىزۋدە. ءبىز، سونىمەن قاتار قىتايعا ەت ونىمدەرىن ەكسپورتتاۋعا مۇددەلىمىز. بۇعان الەۋەتىمىز دە، مۇمكىندىگىمىز دە جەتەدى، – دەگەن وبلىس اكىمى ءۇرىمجى مەن شاۋەشەك قالالارى ارالىعىندا سالىنعان جاڭا تەمىرجول ەكى ەل ايماق اراسىنداعى بايلانىستى بۇدان سايىن بەكىتە تۇسەتىنىنە سەنىم بىلدىرگەن.
ءوز كەزەگىندە شەتەلدىك دەلەگاسيانى باستاپ كەلگەن چجاو چۋنسزيۋ مىرزا ايماق باسشىسىنا شاقىرتۋى ءۇشىن العىس ايتىپ، شىڭجان ۇيعىر اۆتونومياسى ءۇشىن شىعىس قازاقستان وبلىسى نەگىزگى ستراتەگيالىق ارىپتەستەردىڭ ءبىرى ەكەنىن جەتكىزگەن.
–ءبىز دە ارىپتەستىگىمىز باياندى بولعانىن قالايمىز. جانە وسى باعىتتا جۇمىس جۇرگىزۋگە ءازىرمىز. بۇگىندە شىعىس قازاقستاندا ەكى ءوڭىردىڭ كاسىپكەرلەرى قۇرعان 12 بىرلەسكەن كومپانيا بار ەكەن. سىزدەردىڭ وبلىستارىڭىزدا وندىرىلەتىن اۋىلشارۋاشىلىق ونىمدەرى جوعارى ساپاعا يە ەكەنىن دە بىلەمىن. اسىرەسە، بيداي، ۇن مەن مايلى داقىلدارىڭىزدى ماقتايدى. ءبىز شىعىس قازاقستان وبلىسىنان وسى سياقتى ونىمدەردى كوبىرەك العىمىز كەلەدى. تۋريزم سالاسىن دا دامىتۋعا نيەتتىمىز. وتكەن جىلدىڭ قاراشا ايىندا ءۇرىمجى قالاسىندا كەزدەسىپ، ەكىجاقتى كەلىسسوزدەر جۇرگىزگەن بولاتىنبىز. ەندى سول باسقوسۋدا قول جەتكىزگەن ۋاعدالاستىقتارىمىزدى ءىس جۇزىندە ورىنداۋعا دايارمىز، – دەدى چجاو چۋنسزيۋ مىرزا.
كەزدەسۋ باراسىندا ەكى ءوڭىردىڭ ءبىلىم، عىلىم، دەنساۋلىق ساقتاۋ جانە مادەنيەت سالالارىنداعى ارىپتەستىگى دە ءسوز بولدى. كەلىسسوزدەر قورىتىندىسى بويىنشا تاراپتار ءبىرقاتار ەكىجاقتى حاتتاماعا قول قويدى.
