"اق جول" پارتياسىنىڭ ءتوراعاسى، ءماجىلىس دەپۋتاتى ازات پەرۋاشيەۆ نۇر-سۇلتان قالاسى اكىمدىگىنىڭ "اق جول" پارتياسىنىڭ ساياسي قۋعىن-سۇرگىن قۇرباندارىن ەسكە الۋ ءۇشىن "الاشقا تاعزىم" اتتى شەرۋىن وتكىزۋگە رۇقسات بەرمەۋىنە قاتىستى مالىمدەمە جاسادى دەپ حابارلايدى Qamshy.kz اقپارات اگەنتتىگى.

ازات پەرۋاشيەۆتىڭ مالىمدەمەسىن وقىرمان نازارىنا ەشبىر الىپ-قوسپاسىز ۇسىنامىز:

قۇرمەتتى قازاقستاندىقتار!

جۋىردا نۇر-سۇلتان قالاسىنىڭ اكىمدىگى، "اق جول" پارتياسىنىڭ ساياسي قۋعىن-سۇرگىن قۇرباندارىن ەسكە الۋ ءۇشىن "الاشقا تاعزىم" اتتى شەرۋىن وتكىزۋگە رۇقسات بەرمەدى.

رۇقسات بەرمەۋگە نەگىز بولعان سەبەپتەرى – قىپ-قىزىل وتىرىك. ءبىزدىڭ وتىنىشىمىزدە بارلىق قاجەتتى اقپارات زاڭعا سايكەس كورسەتىلگەن بولاتىن. مەملەكەتتىك ورگانداردى دا تۇسىنۋگە بولادى: ولار سايلاۋ كەزىندە ءتۇرلى ارانداتۋلار مەن باسسىزدىقتاردان قاۋىپتەنىپ وتىرعان شىعار.

سوندىقتان مىنانى ايتقىم كەلەدى: ەشكىم وتقا ماي قۇيىپ، كوپشىلىكتى اشىندىرۋعا مۇددەلى ەمەس. مەملەكەتتىك ينستيتۋتتاردى السىرەتۋ – ازاماتتاردىڭ وزدەرى ءۇشىن دە، مەملەكەت ءۇشىن دە ءقاۋىپتى. ۇلتتىق تاۋەلسىزدىگىمىز بەن جەرىمىزدىڭ تۇتاستىعىن ساقتاۋ ءۇشىن مىقتى مەملەكەت كەرەك.

سونىمەن قاتار، ول جاي كۇشتى عانا ەمەس، اركىم، ءوزىنىڭ مۇمكىندىكتەرى مەن قۇقىقتارىن جۇزەگە اسىرا الاتىن، ادىلەتتى دە، وزىق مەملەكەت بولۋى قاجەت. ونىڭ ىشىندە ءسوز بوستاندىعىنا دەگەن ازاماتتاردىڭ حاقى دا بار.

مەملەكەتتىك ورگاندار، ادامداردى الاڭعا شىعاراتىن ىزا مەن كەك ەمەس، جاقسىلىققا دەگەن ۇمتىلىسى ەكەنىن تۇسىنگەنى ءجون. نارازىلىقتىڭ الدىن الۋدىڭ ەڭ ءتيىمدى جولى – بەلسەندىلەردى قاماۋ ەمەس، ناقتى رەفورمالاردى تەزدەتۋ.

جوعارىدا ايتىلعاندارعا بايلانىستى، مەن: "الاشقا تاعزىم" شەرۋىنە رۇقسات بەرمەسە دە، "اق جول" پارتياسىنىڭ جەتەكشىلەرى مەن دەپۋتاتتارى 31-مامىر كۇنى "الاش" قايراتكەرلەرى مەن قۋعىن-سۇرگىنگە ۇشىراعان اتا-بابالارىنىڭ پورترەتتەرىمەن ولاردىڭ ەسكەرتكىشىنە بارىپ، گۇل قويىپ، قۇران باعىشتايتىنىن جاريالايمىن.

بۇل شەرۋ دە، ميتينگ تە ەمەس. سوندىقتان ءبىز وسى جولى ەشكىمنەن رۇقسات سۇرامايمىز. ءبىزدىڭ قازاق رەسپۋبليكاسىنىڭ بولاشاعى ءۇشىن قۇربان بولعاندارعا تاعزىم ەتۋگە تولىق كونستيتۋسيالىق حاقىمىز بار.

ازات پەرۋاشيەۆ،

"اق جول" پارتياسىنىڭ ءتوراعاسى

ۇسىنعان: ادىلەت مادەنيەت