23 مامىردا نۇر-سۇلتان قالاسىندا توتەنشە جاعداي ورىن الىپ، "استانا سۋ ارناسى" كوممۋنالدىق كاسىپورنىنىڭ 4 قىزمەتكەرى قازا تاپتى دەپ جازادى Qamshy.kz اقپارات اگەنتتىگى. 

بۇل تۋرالى قالا اكىمى باقىت سۇلتانوۆ Facebook پاراقشاسىندا جازدى.

"بۇگىن نۇر-سۇلتاندا قايعىلى وقيعا بولدى. وقيعا سالدارىنان «استانا سۋ ارناسى» كوممۋنالدىق كاسىپورنىنىڭ 4 قىزمەتكەرى قازا بولدى. ءوزىمنىڭ جانە اكىمدىكتىڭ اتىنان قازا تاپقانداردىڭ وتباسىلارى مەن دوستارىنا كوڭىل ايتامىن. قالا اكىمدىگى  بارلىق مارقۇمداردىڭ وتباسىلارىنا  قاجەتتى قولداۋ كورسەتەتىن بولادى. مەن ءتيىستى ورگاندارعا مۇقيات تەرگەۋ جۇرگىزۋدى جانە وسى قايعىلى وقيعالاردىڭ سەبەپتەرىن انىقتاۋدى تاپسىردىم"، – دەدى قالا اكىمى. 

ىشكى ىستەر مينيسترلىگىنىڭ توتەنشە جاعدايلار جونىندەگى كوميتەتىنىڭ ءتوراعاسى ۆلاديمير بەككەردىڭ  tengrinews.kz سايتىنىڭ تىلشىسىنە ايتۋى بويىنشا، اپاتتى جاعداي مومىش ۇلى داڭعىلىنىڭ بويىندا ورىن العان. ءتورت جۇمىسشىسى مەتان گازىنا ۋلانىپ قايتىس بولعان.

"بۇگىن 16.24-تە توتەنشە جاعدايلار قىزمەتىنىڭ 112 نومەرىنە مومىش ۇلى داڭعىلىنداعى قۇدىققا ادام قۇلاپ تۇسكەنى تۋرالى حابار ءتۇستى. ال 16.46-دا توتەنشە جاعدايلار قىزمەتكەرلەرى كەلگەندە قۇدىق ىشىندە ءبىر ەمەس، ءتورت ادامنىڭ قايتىس بولعانى انىقتادى"، - دەدى ۆلاديمير بەككەر.

وقيعا ورىنىندا بولعان ءورت سوندىرۋشىلەردىڭ تۇسىندىرۋىنشە، قۇدىق ىشىندە ديمەترى 3،5 مەتر، تەرەڭدىگى 10 مەترلىك باك بولعان. ول باك ءۇش مەترگە دەيىن مەتان سۇيىقتىعىمەن تولتىرىلعان. قازاق تاپقانداردىڭ دەنەسى سول سۇيىقتىقتىڭ ىشىنەن تابىلىپتى.

"بۇگىن "استانا سۋ ارناسى" بريگاداسى كارىز سورعالاۋ ستانسيالارىنا بولشەكتەۋ جۇمىستارىن جۇرگىزگەنى انىقتالدى. جۇمىسشىلاردىڭ ءبىرى اۋىرىپ، ەسىنەن تانىپ، قۇدىققا قۇلاپ تۇسكەن. ەكىنشى ارىپتەسى وعان كومەكتەسۋگە تىرىسىپ، تەحنيكالىق ساتىعا ءتۇسىپ ول دا ەسىنەن تانىپ قالعان. ولاردان كەيىن تاعى ەكى جۇمىسشى قۇتقارۋعا ءتۇسىپ، شىقپاي قالعان. جالپى جۇمىس بريگاداسىندا 6 ادام بولعان. ولاردىڭ تورتەۋى قايتىس بولدى. قۇدىقتىڭ سىرتىندا قالعان ەكەۋى (ءبىرى- سانتەحنيك، ەكىنشىسى - جۇرگىزۋشى) 103-كە حابارلاسقان"، - دەدى بەككەر.

امان قالعان ەكى جۇمىسشىنىڭ ءبىرى زارداپ شەككەن. نۇر-سۇلتان قالاسى اكىمنىڭ باسپا ءسوز حاتشىسى ەلۆيرا جۇرگەنبايەۆانىڭ ايتۋىنشا، زارداپ شەككەن جۇمىسشى  اۋرۋحانادا جاتىر. 

"قازا تاپقاندار 1988، 1993، 1995 جانە 1967 جىلى تۋعان. كۇنى بويى جۇمىس ىستەگەن. بارلىعىندا رەسپيراتور بولعان. ءبىراق قۇدىقتان دەنەلەردى شىعارعاندا رەسپيراتور بولمادى. جۇمىس اياقتالعان كەزدە ونى شەشىپ تاستاعان سياقتى. ەگەر رەسپيراتور بولعاندا امان قالار ەدى"، - دەدى توتەنشە جاعدايلار كوميتەتىنىڭ باسشىسى ۆلاديمير بەككەر.

دايىنداعان: ميات كاشىباي