سيريادان ورالعان ءتورت اقتوبەلىك قاماۋعا الىندى، دەپ حابارلايدى Qamshy.kz اقپارات اگەنتتىگى Hola News سايتىنا سىلتەمە جاساپ.

ول تۋرالى اقتوبە وبلىستىق سوتى مالىمدەدى.

اقتوبەدە سيريادان ورالعان ءۇش ەركەك پەن ءبىر ايەلدى قاماۋعا الۋعا سوت سانكسيا بەردى. ولار لاڭكەستىك توپتىڭ قۇرامىندا بولىپ، تەرروريزمدى ناسيحاتتاعان جانە ءدىني الاۋىزدىق تۋدىرعانى ءۇشىن ايىپتالىپ وتىر.

قامالۋشىلاردىڭ تورتەۋى دە اقتوبە وبلىسىنىڭ تۇرعىندارى، ولاردى جاقىندا سيريادان «جۋسان-2» ارنايى وپەراسياسى بارىسىندا الىپ كەلگەن. الايدا، ولار ەلگە كەلگەننەن كەيىن بىردە-بىر جاقىندارىمەن سويلەسپەي، بىردەن تەرگەۋگە جىبەرىلگەن. ولاردىڭ سيرياعا قاشان، قالاي كەتكەنى ازىرگە انىقتالمادى.

«تەرروريستىك توپتىڭ ارەكەتىنە نەمەسە ونى جاسايتىن تەرروريزم اكتىلەرى قاتىسقان دەپ كۇدىكتەلگەن الماعامبەتوۆا، تورەحانوۆ، قۋانوۆ جانە ءسابيتۇلىنا قاتىستى كۇزەتپەن ۇستاۋ تۇرىندەگى بۇلتارتپاۋ شاراسىن قولدانۋ نەگىزدى دەپ تانىلدى»، - دەپ ايتتى اقتوبە وبلىستىق سوتىنىڭ باسپا ءسوز حاتشىسى انار ايتجانوۆا. 

ۇسىنعان: مارجان سابەت