قازاقستاننىڭ پرەزيدەنتتىگىنە ۇمىتكەر كانديداتتار سايلاۋدىڭ الدىندا دەبات وتكىزەدى دەپ حابارلايدى Qamshy.kz اقپارات اگەنتتىگى قازاقستان رەسپۋبليكاسى ورتالىق سايلاۋ كوميسسياسىنىڭ مۇشەسى ءلاززات سۇلەيمەنوۆانىڭ مالىمدەمەسىن نەگىزگە الىپ.

2019 جىلعى 24 مامىردا قازاقستان رەسپۋبليكاسى ورتالىق سايلاۋ كوميسسياسىنىڭ وتىرىسى ءوتىپ، قاتىسۋشىلار اراسىندا سايلاۋالدى دەبات وتكىزۋ ماسەلەسى تالقىلاندى. 

«دەباتتى 2019 جىلى 29 مامىردا نۇر-سۇلتان قالاسىندا وتكىزۋدى ۇسىنىپ وتىرمىز»، - دەدى سۇلەيمەنوۆا.

ورتالىق سايلاۋ كوميسسياسىنىڭ اپپاراتىنا  اتالعان شەشىمدى قازاقستان پرەزيدەنتتىگىنە ۇمىتكەرلەردىڭ سايلاۋالدى شتابى مەن "حابار" اگەنتتىگىنە حابارلاۋ تاپسىرىلدى. سونىمەن قاتار سايلاۋالدى تەليەۆيزيالىق تالقىلاۋ مەن دەبات وتكىزۋ ماسەلەسى بويىنشا "حابار" اگەنتتىگىمەن كەلىسىم شارت جاسالادى.

دەباتتىڭ ءبىرىنشى كەزەڭىنىڭ تاقىرىبى – "قازاقستاننىڭ ەكونوميكالىق دامۋ باسىمدىقتارى". بۇل كەزەڭنىڭ ءوزى ەكى بولىمنەن تۇرادى. ءبىرىنشى بولىمدە سايلاۋعا تۇسۋشىلەردىڭ ءارقايسىسى ءوزىنىڭ سايلاۋالدى باعدارلاماسىن تانىستىرادى. ەكىنشى بولىمدە ءاربىر قاتىسۋشى قارسىلاستارىنا سۇراق قويىپ، پىكىرتالاس وتكىزەدى. سايلاۋعا تۇسۋشىلەر  وزدەرىنىڭ وپپونەنتتەرىنە ەكى سۇراقتان قويىپ، سونداي-اق ەكى سۇراققا جاۋاپ بەرە الادى.

ەكىنشى كەزەڭنىڭ تاقىرىبى – "قازاقستاننىڭ الەۋمەتتىك جاڭعىرۋى". ءبىرىنشى بولىمدە اتالعان تاقىرىپ بويىنشا ءسوز سويلەيدى. ەكىنشى كەزەڭدە جۇرگىزۋشى بارلىق قاتىسۋشىلارعا ءبىر سۇراق قويادى.

ءۇشىنشى كەزەڭ – «سايلاۋشىلارعا ءسوز». بۇل كەزەڭدە داۋىس بەرۋشىلەر پرەزيدەنتتىككە ۇمىتكەرلەرگە تىكەلەي ساۋال جولداي الادى.

وسك-نىڭ ايتۋىنشا، دەبات 80 مينۋتقا سوزىلۋى مۇمكىن.

دايىنداعان: مارجان سابەت