قىتايدىڭ حەنشۋە قالاسىندا شاحماتتتان IMSA World Masters چەمپيوناتى اياقتالدى. جانسايا ابدىمالىك ەكس-چەمپيون الەكساندرا كوستەنيۋكتى «التىنسىز» قالدىردى دەپ حابارلايدى Qamshy.kz اقپارات اگەنتتىگى شاحمات فەدەراسياسىنىڭ باسپا ءسوز قىزمەتىنە سىلتەمە جاساپ.
قازاقستان شاحماتشىلارى مۇنداي ءىرى سايىسقا ءبىرىنشى رەت شاقىرىلىپ وتىر. قازاقستان اتىنان جارىسقا چەمپيوناتتىڭ ەڭ جاس ويىنشىسى اتانعان حالىقارالىق گروسسمەيستەر جانسايا ابدىمالىك باردى. شاحماتتىڭ راپيد پەن بليس كەزەڭدەرى بويىنشا الەمنىڭ ەڭ ۇزدىك 16 شاحماتشىسى ءوزارا سىنعا تۇسكەن ەدى. الماتىلىق شاحماتشى الەمنىڭ بىرنەشە ەكس-چەمپيوندارىنان ايلاسىن اسىرا ءبىلدى.
«مەنىڭ قارسىلاستارىم ءار جىلدارى الەمدىك بىرىنشىلىكتە توپ جارعان شاحماتشىلار. سول سەبەپتى، ءبىر سەكۋند تا ايالداۋعا قاقىم بولعان جوق. راپيد سايىسى بويىنشا مەن 2017-2018 جىلعى الەم چەمپيونى تان ءچجۋنيدى جەڭدىم. سونىمەن بىرگە، نانۋ دزاگنيدزە، يرينا كرۋش سەكىلدى مىقتى شاحماتشىلاردان دا مەرەيىم ۇستەم بولدى. بليس كەزەڭىندە ماريا مۋزىچۋكتان 2:0 ەسەبىمەن ەسەمدى قايتاردىم. ءدال وسىنداي ەسەپپەن حامپي كونەردى جەڭدىم»، - دەيدى جانسايا ابدىمالىك.
ءتۋرنيردىڭ قورىتىندىسى بويىنشا، جانسايا ابدىمالىك ءوز رەيتينگىن 2414-كە كوتەردى. ول قازىرگى ۋاقىتتا شاحماتتىڭ كلاسسيكا، راپيد جانە بليس كەزەڭدەرى بويىنشا ەلو دەڭگەيى بار بىردەن-بىر قازاقستاندىق شاحماتشى ەكەنىن ايتا كەتۋ كەرەك.
«جانسايا سايىس قورىتىندىسى بويىنشا راپيد پەن بليس بويىنشا جەتىنشى ورىن الدى. ول كەرەمەت ويىن كورسەتتى. الەمنىڭ ۇزدىك شاحماتشىلارىن ۇتىپ قانا قويماي، قىتايلىق فاۆوريت لەي تينسزىمەن تەڭ ءتۇستى. الەمنىك ەكس-چەمپيونى اننا ۋشەنينوۆا مەن الەكساندرا كوستەنيۋكپەن وتكەن پارتيانى تەڭ اياقتادى. الايدا جانسايا ءبىر پارتيا بويىنشا اتاقتى ويىنشىلاردان ايلاسىن اسىردى. ءدال جانسايادان جەڭىلۋى سەبەپتى كوستەنيۋك بۇل چەمپيوناتتا التىن مەدالىنەن ايىرىلدى»، - دەيدى قازاقستان شاحمات فەدەراسياسىنىڭ اتقارۋشى ديرەكتورى يرينا گريششەنكو.
چەمپيوناتقا الەمنىڭ 36 ەلىنەن 170 شاحماتشى قاتىستى. IMSA World Masters Championship ەڭ العاش رەت 2008 جىلى وتكەن ەدى. چەمپيوناتقا وسىعان دەيىن اناتوليي كارپوۆ، سەرگەي كارياكين، حيكارۋ ناكامۋرا، ليەۆون ارونيان، الەكساندر گريششۋك، حوۋ يفان، دجۋ ۆەندزۋي سەكىلدى الەمگە ايگىلى شاحماتشىلار قاتىسقان.
ۇسىنعان: ماقپال سەمباي
