قاراعاندىنىڭ ورتالىق ساياباعىندا بالالار ويناپ جاتقان باتۋتتى جەل ۇشىرىپ كەتتى. كەلەڭسىز وقيعا ناتيجەسىندە ءبىر بالا قايتىس بولىپ، ەكى بالا اۋىر جاراقات العان دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ.
"25-مامىر كۇنى قاراعاندى قالاسىنىڭ ورتالىق ساياباعىنداعى باتۋت قولايسىز اۋا-راي اسەرىنەن اۋدارىلىپ كەتتى. ناتيجەسىندە 11 جاستاعى بالا وقيعا ورىنىندا اۋىر جاراقات سالدارىنان قازا تاپتى. تاعى دا ەكى بالا ءتۇرلى جاراقات الىپ، اۋرۋحاناعا جەتكىزىلگەن"، - دەپ مالىمدەدى وبلىستىق پوليسيا دەپارتامەنتى.
توتەنشە جاعدايلار كوميتەتىنىڭ مالىمەتىنشە، ومىردەن وتكەن بالا 2007 جىلى تۋعان. اتالعان وقيعا بويىنشا ق ر قك 306-بابىنىڭ 3-تارماعىنا سايكەس، "قاۋىپسىزدىك شارالارىن ساقتاماي قىزمەت كورسەتۋ ارقىلى ادام ولىمىنە سەبەپ بولۋ" ايىبىمەن ءىس قوزعالدى.
قاجەتتى ساراپتامالار تاعايىندالعان. توتەنشە جاعدايلار كوميتەتى ساياباقتاردا اتتراكسيونداردى ورناتۋعا رۇقساتتى ايماق اكىمشىلىگى بەرەتىنىن مالىمدەدى.
"اتا-انالاردان اۋا-رايى قولايسىز كۇندەرى ءتۇرلى كەلەڭسىز جاعدايلار ورىن الماس ءۇشىن بالالاردى كوشەدەگى باتۋتتارعا الىپ بارماۋىن سۇرايمىز" - دەدى توتەنشە جاعدايلار كوميتەتىنىڭ رەسمي وكىلى نۇرسۇلتان نۇراحمەتوۆ.
اۋدارعان: ادىلەت مادەنيەت
