اقمولا وبلىسى ەرەيمەنتاۋ اۋداندىق اۋرۋحاناسىنىڭ جان ساقتاۋ بولىمىنە ءتورت كامەلەتكە تولماعان بالا ءتۇستى. ولار ۇيقىعا جاتاردا 15-تەن فينلەپسين تابلەتكاسىن ءىشىپ، بۇلشىق ەتىن وسىرمەك بولعانى انىقتالدى دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.

جاسوسپىرىمدەر اۋداندىق اۋرۋحاناعا تاڭەرتەڭ ساعات ۇشتەن كەيىن بىرىنەن كەيىن ءبىرى تۇسكەن. ولار 16، 14 جانە 13 جاستا. ءبارى ولجاباي باتىر اۋىلىندا تۇرادى.  

اقمولا وبلىسى دەنساۋلىق ساقتاۋ باسقارماسىنىڭ مالىمەتىنشە، بالالار اۋىر جاعدايدا بولعان، قاتتى ۋلانعاننان دەنەلەرى قۇرىسىپ، جۇيكە جۇيەسى زاقىمدانعان.  

"جاسوسپىرىمدەر فينلەپسين پرەپاراتى ارقىلى بۇلشىق ەتىن وسىرمەك بولعانى انىقتالدى. ءارقايسىسى 15 تابلەتكادان ىشكەن"، - دەپ حابارلادى وبلىستىق دەنساۋلىق ساقتاۋ باسقارماسى.

بالالارعا ءدارىنى اۋرۋحاناعا تۇسكەندەردىڭ ءبىرى بەرگەن. ايتا كەتەيىك، ول "ەپيلەپسيا" دياگنوزىمەن ديسپانسەردە ەسەپتە تۇرادى.

قازىرگى تاڭدا جاسوسپىرىمدەر جان ساقتاۋ جانە قارقىندى تەراپيا بولىمدەرىندە جاتىر. بالالاردىڭ ءبىرى ەسىن جيدى.

فينلەپسين پرەپاراتى ەپيلەپسيانى ەمدەۋدە، سونىڭ ىشىندە ناۋقاستىڭ ۇستاماسى ۇستاعان جاعدايدا قولدانىلادى. وسىدان كەيىن ءدارى ۇلداردىڭ ءبىرىنىڭ قولىنا قالاي تۇسكەنى ايتپاسا دا تۇسىنىكتى بولسا كەرەك. پرەپاراتتى مولشەردەن تىس تۇتىنۋ جۇرەك پەن بۇيرەكتىڭ جۇمىسىن، قان ءتۇزۋ، تىنىس الۋ جۇيەسىن بۇزادى. بۇلشىق ەتتى ءوسىرۋ اسەرى دارىگەرلەرگە بەلگىسىز.

ۇسىنعان: ماقپال سەمباي