ايماقتا العاش رەت ۇيىمداستىرىلعان چەمپيوناتقا 10 اۋداننان جانە تاراز قالاسىنان جاساقتالعان 18 كوماندادان 300-دەن اسا سپورتشى قاتىسىپ، ۇزدىك كوماندانى انىقتاۋدا. سونداي-اق بۇل سپورت دوداسىنىڭ ءوڭىردىڭ فۋتبولىن دامىتۋعا سەپ بولماق. سەبەبى، مىقتى اياقدوپشىلار اۋەسقويلاردىڭ، ونىڭ ىشىندە اۋىلدىڭ قارا دومالاقتارىنان شىعاتىندىعى بەلگىلى. وسىناۋ يگى سپورتتىق شارانىڭ اشىلۋ سالتاناتىنا وبلىس اكىمى اسقار مىرزاحمەتوۆ قاتىسىپ، فۋتبولشىلارعا ساتتىلىك تىلەدى.
– بۇگىن وڭىردە ەرەكشە ماڭىزدى كۇن ورىن الىپ وتىر. جاستاردى بارىنشا سپورتقا باۋلۋ ءۇشىن، ولاردىڭ اراسىنان تالانتتاردى تابۋ ءۇشىن سپورتتىق شارالار كوپتەپ ءوتۋى ءتيىس. سونىڭ ىشىندە فۋتبول سالاسى بويىنشا دا ارنايى شەشىم قابىلدانىپ، وبلىستىق چەمپيونات وتكىزۋدى قولعا الدىق. مۇنداعى ماقسات بىرەۋ ول – جاس تالانتتاردى انىقتاپ، ولارعا قولداۋ كورسەتۋ. وسىلايشا، جامبىل فۋتبولىنىڭ دارەجەسىن ارتتىرۋ، – دەپ اتاپ وتكەن اسقار يسابەك ۇلى جارىسقا قاتىسۋشى كوماندالارعا ساتتىلىك تىلەدى.
شاراعا ارنايى كەلگەن داڭقتى فۋتبول ارداگەرى سەيىلدا بايشاقوۆ قازاقستان فۋتبول فەدەراسياسى اتىنان سپورتشىلاردى اتالمىش چەمپيوناتتىڭ باستالۋىمەن قۇتتىقتاپ، تالانتتى فۋتبولشىلار اۋىلدان شىعاتىنىن قاداپ ايتتى. سونداي-اق ول ءوز سوزىندە بايزاق اۋدانىن مىسالعا الىپ، اتالعان اۋداننان وزىنەن بولەك ازامات نيازىمبەتوۆ، نۇركەن مازبايەۆ جانە قازىرگى تاڭداعى ۇلتتىق قۇرامانىڭ نەگىزگى ويىنشىسى باۋىرجان يسلامحان سىندى اياق دوپ شەبەرلەرىنىڭ شىققانىن اتاپ ءوتتى. سوندىقتان ول ءوڭىر اۋىلدارىنان حاس تالانتتاردىڭ الىدە شىعاتىنىنا سەنىم ءبىلدىردى.
مۇنان سوڭ وبلىس اكىمى اسقار مىرزاحمەتوۆ پەن سەيىلدا بايشاقوۆ وسىناۋ چەمپيوناتتىڭ تۇساۋكەسەر ويىنىن وتكىزگەن سارىسۋ جانە تالاس اۋداندارى اراسىنداعى ماچتىڭ دوبىن ويىنعا قوسىپ بەردى. ويىن سالتاناتتى تۇردە باستالعاننان كەيىن كورشىلەس قوس اۋدان اراسىنداعى ويىن جانكۇيەرلەردىڭ دەلەبەسىن قوزدىردى. العاشى مينۋتتاردا ءبىر-بىرىنىڭ وسال جەرلەرىن اڭدىسقان قوس كوماندار ءبىرىنشى تايمنىڭ بەل ورتاسىنان باستاپ وتكىر شابۋىلدارعا يەك ارتتى. دەگەنمەن بۇل ويىندا تاكتيكالىق جاعىنان تالاستىقتاردىڭ قارسىلاس كوماندادان ءبىر باس جوعارى ەكەندىگى كورىنىپ تۇردى. ولار ماچ بويى ساۋاتتى قورعانىپ، شابۋىلدارىن ءساتتى اياقتاپ جاتتى. ەسەسىنە، سارىسۋلىق كومانداعا ەش مۇمكىندىك بەرمەدى. قورىتىندى ەسەپ 9:0 تالاستىقتاردىڭ پايداسىندا.
نەگىزىنەن، وڭىردە تۇڭعىش رەت ۇيىمداستىرىلعان چەمپيوناتتىڭ العاشقى جارىس كۇنىندە بۇدان وزگە ءۇش ماچ ءوتتى. ناقتىراق ايتقاندا، شۋ اۋدانىنىڭ اياق دوپشىلارى مويىنقۇمدىق كوماندانىڭ قاقپاسىنا جاۋاپسىز 3 گول سوعىپ چەمپيوناتتى ءساتتى باستادى. ال مەركىلىكتەر ت.رىسقۇلوۆ اۋدانىنىڭ كومانداسىنا 10 گول سوعىپ، ايقىن باسىمدىلىق تانىتتى. ءبىراق ءوز قاقپالارىنا ەشقانداي گول دارىتقان جوق. ءوز كەزەگىندە بايزاق جانە جۋالى اۋداندارى اراسىنداعى ماچ تارتىسقا تولى ءوتتى. ويىن بارىسىندا بايزاقتىقتاردىڭ سوققان 3 گولىنا جۋالىلىقتار 2 گولمەن جاۋاپ قاتتى.
جالپى، چەمپيونات 2 كەزەڭنەن تۇراتىن توپتىق جۇيە بويىنشا وتكىزىلسە، توپتىق ويىندار اينالمالى جۇيەمەن ءوربيدى. العاشقى كەزەڭدە بارلىق كوماندالار 3 توپقا ءبولىنىپ ءوزارا جاسىل الاڭدا ءوزارا كىل مىقتىنى انىقتاماق. اتاپ ايتقاندا، 1توپتا شۋ، قورداي، مويىنقۇم، مەركى، تۇرار رىسقۇلوۆ اۋداندارى ب ا ق سىنايتىن بولادى. سونىمەن قاتار 2 توپتا تالاس، سارىسۋ، جامبىل، بايزاق، جۋالى اۋداندارى جاسىل الاڭدا ويىن ورنەگىن كورسەتپەك. ال 3 توپتا تاراز قالاسىنىڭ 8 كومانداسى توپتان شىعۋ ءۇشىن ارلارىن ورتاعا سالماق. وسىلايشا، چەمپيوناتتىڭ 2 كەزەڭىندە 1،2 توپ جەڭىمپازدارى جانە 3 توپتان 2 كوماندا اينالمالى جۇيەمەن وبلىس جەڭىمپازدارى مەن جۇلدەگەرلەرىن انىقتايدى. ايتا كەتەرلىگى، مامىر ايىندا باستالعان بۇل چەمپيونات قازان ايىندا قورىتىندىلاناتىن بولادى.
باقىت جالعاس
پىكىر قالدىرۋ